АкъылыфIэхэр утыку йохьэ
2018-05-31
- Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым иджыблагъэ къыщызэрагъэпэщащ «АкъылыфIэхэр КъБКъУ-м щызэIуощIэ» джэгу-зэпеуэр. Абы и жэрдэмщIакIуэщ КъБР-м и курыт школхэм я 10-нэ классхэм щIэсхэр еджапIэ нэхъыщхьэхэм щIэтIысхьэным хуэзыгъэхьэзыру университетым иIэ къудамэм и IэщIагъэлIхэр.
- Налшык, Бахъсэн къалэхэм, Бахъсэн, Тэрч, Прохладнэ, Аруан, Май, Лэскэн щIыналъэхэм къикIа гупи 9-р, апхуэдэу КъБКъУ-м и Школ академие цIыкIум и гъэсэнхэр жыджэру хэтащ зэпеуэ хьэлэмэтым. Ар езыгъэкIуэкIым и упщIэ зэмылIэужьыгъуэхэм жэуап тэмэм занщIэу иратын хуейт зэхьэзэхуэм хэтхэм. УпщIэхэр ятеухуат лъэпкъ тхыдэми, щэнхабзэми, гъуазджэми, ныбжьыщIэхэр дэзы-хьэх нэгъуэщI унэтIыныгъэхэми.
- Iыхьэ зыбжанэу зэщхьэщыхауэ екIуэкIа джэгу-зэпеуэм щытекIуащ Налшык щыщ ныбжьыщIэхэр. Абыхэм хуагъэфэщащ Iуащхьэмахуэ мы гъэм щыIэну «Августёнок» гъэмахуэ школым и лэжьыгъэм хэтыну хуит зэращIам щыхьэт техъуэ сертификатыр.
- Iуэхур къызэзыгъэпэща IэнатIэм и унафэщI КIэрашэ Оксанэ хьэщIэхэм защыхуигъазэм, къыхигъэщащ ныбжьыщIэхэм щIэныгъэ куу зэрабгъэдэлъыр зэригуапэр. Абы фIыщIэ хуищIащ проектыр гъащIэм хэпщэнымкIэ сэбэп къыхуэхъуахэу щIыналъэхэм егъэджэныгъэмкIэ и IэнатIэхэм я унафэщIхэм, егъэджакIуэхэм, КъБКъУ-м и Студентхэм я зэгухьэныгъэм и пашэм, джэгу-зэпеуэр къызыхуэтыншэу езыгъэкIуэкIа Къалэбэч Ибрэхьим сымэ, нэгъуэщIхэми.
- ЖЫЛАСЭ Маритэ.