2017-05-18
- Щыгъуэ-щIэж махуэм зыхуагъэхьэзыр
- Адыгей.Урыс-Кавказ зауэр зэриухрэ илъэси 153-рэ зэрырикъум, абы хэкIуэдахэм я Щыгъуэ-щIэж махуэм зыхуэгъэхьэзырынымкIэ къызэгъэпэщакIуэ комитетым и къыкIэлъыкIуэ зэIущIэ Мейкъуапэ щекIуэкIащ.
- Адыгейм лъэпкъ IуэхухэмкIэ, хэкуэгъухэм хуаIэ зэпыщIэныгъэхэмрэ цIыхубэ хъыбарегъащIэ IэнатIэхэмкIэ и комитетым и унафэщI Щхьэлахъуэ Аскэр зэрыжиIамкIэ, Урыс-Кавказ зауэм хэкIуэдахэм я Щыгъуэ-щIэж махуэм теухуа Iуэхугъуэ зэмылIэу-жьыгъуэ 72-рэ щекIуэкIынущ Мейкъуапэрэ республикэм и щIыналъэхэмрэ.
- Абыхэм ящыщщ республикэм и библотекэм къыщызэIуах «Кавказ зауэр иджырей щIэблэм я нэкIэ» тхылъ гъэлъэгъуэныгъэр. «Адыгэ макъ» газетым и редакцэм щекIуэкIынущ «Тхыдэмрэ ди зэманымрэ» зыфIаща зэIущIэр.
- Фэтэр 600-м щIигъу
- Абхъаз.Абхъазым щыIэ урысеидзэм къулыкъу щызыщIэхэм папщIэ 2017 гъэм и кIэм нэсыху фэтэр 600-м щIигъу яухуэнущ.
- Абы и фIыгъэкIэ унэ яIэ хъунущ офицерхэм, прапорщикхэмрэ контрактIэ дзэ къулыкъур езыхьэкIхэмрэ. Ипщэ дзэ округым и унафэщI Дворников Александр апхуэдэуи унафэ яхуищIащ Гудаутэ дэт дзэ къалэ цIыкIум и щIыпIэм щаухуэ сабий садыр и кIэм нагъэсыну.
- ЩIыуэпс Iуэху
- Къэрэшей-Шэрджэс.Накъыгъэм и 22-м республикэм щекIуэкIынущ «Пластикыншэ махуэ» щIыуэпс Iуэху. Абы хэтынухэм полиэтилен пакетхэр къагъэсэбэпынукъым зы жэщ-махуэм.
- «Урысей цIыхубэ фронтым» и щIыналъэ къудамэм хэтхэм цIыхухэр къыхураджэ зы махуэ нэхъ мыхъуми пластик, полиэтилен пакетхэр уэим ящIыну, тыкуэнхэм тхылъымпIэм, щэкIым къыхэщIыкIа, щIыуэпсым зэран хуэмыхъун пакетхэр къыщащэхуну.
- УЭРДОКЪУЭ Женя.