Саугъэтхэр хуагъэфащэ
2023-06-17
- Хабзэ хъуауэ, ди къэралым гъэ къэс щокIуэкI предмет зэмылIэужьыгъуэхэмкIэ школ олимпиадэхэр. Абыхэм къыхэжаныкIа ныбжьыщIэхэри яхуэфащэ дыдэу яIэт, ягъэлъапIэ.
- Ди республикэми гулъытэ лъагэ щегъуэт а Iуэхум. КъБР-м и Iэтащхьэ КIуэкIуэ Казбек иджыблагъэ къыдигъэкIа унафэм ипкъ иткIэ, саугъэт зэмылIэужьыгъуэхэр хуагъэфэщащ ШколакIуэхэм я урысейпсо, щIыналъэпсо олимпиадэхэм щытекIуа ныбжьыщIэхэм, ахэр зыгъэхьэзыра егъэджакIуэхэм.
- Республикэм и УнафэщIым и саугъэтыр иратынущ ШколакIуэхэм я урысейпсо олимпиадэм и кIэух зэпеуэм текIуэныгъэ къыщызыхьа еджакIуи 3-м, абы къыхэжаныкIауэ зым, къэралпсо зэпеуэм и щIыналъэ Iыхьэм щытекIуа ныбжьыщIэ 42-м, анэдэлъхубзэхэмкIэ екIуэкIа республикэпсо олимпиадэхэм пашэ щыхъуа школакIуи 6-м. Апхуэдэу щIыналъэ Iэтащхьэм и саугъэтыр хуагъэфэщащ ныбжьыщIэхэр зэпеуэ зэмылIэужьыгъуэхэм хуэзыгъэхьэзыра егъэджакIуэ Iэзэу 47-м.
- НыбжьыщIэхэм ехъулIэныгъэхэр щызыIэрагъэхьа унэтIыныгъэхэм, предметхэм уатепсэлъыхьмэ, апхуэдэхэщ хамэ къэралыбзэхэр, гъащIэр шынагъуэншэу щытыным и лъабжьэхэр (ОБЖ), биологиер, химиер, технологиер, физкультурэр, апхуэдэуи экологиер, тхыдэр, географиер, математикэр, информатикэр, обществознаниер, литературэр, гъуазджэр, нэгъуэщIхэри.
- Фигу къэдгъэкIыжынщи, КъБР-м и Iэтащхьэм къыбгъэдэкI саугъэтыр ягъэувауэ щытащ 2021 гъэм. Абы и мурад нэхъыщхьэр егъэджэныгъэ-гъэсэныгъэ IэнатIэм ехъулIэныгъэ лъагэ щызыIэрызыгъэхьэ ныбжьыщIэхэмрэ абыхэм я егъэджакIуэхэмрэ къэрал дэIэпыкъуныгъэ, гулъытэ лъагэрэ пщIэрэ яхуэщIынырщ, я творческэ зэфIэкIхэм адэкIи зегъэужьынырщ.