Дамыгъэ лъапIэхэр зыхуагъэфэщахэр
2022-05-13
- КъБР-м и Iэтащхьэ КIуэкIуэ Казбекрэ Урысей Федерацэм и лъэпкъ гвардием Кавказ Ищхъэрэм щиIэ и къудамэм и унафэщI, генерал-лейтенант Захаров Сергейрэ Росгвардием и IуэхущIапIэу КъБР-м щыIэм и зауэлIхэм къэрал саугъэт лъапIэхэр, къулыкъум къыщыхэжаныкIахэм я адэ-анэхэм фIыщIэ тхылъхэр иратащ.
- Ди зауэлIхэм нобэ къалэн щагъэзащIэ къэралым и шынагъуэншагъэмрэ Донбассым и цIыху мамырхэм къащхьэщыжынымрэ теухуауэ Iуэхугъуэхэр щекIуэкI псэзэпылъхьэпIэ щIыпIэхэм. Урысей Федерацэм и Президент Путин Владимир и унафэкIэ я лIыхъужьыгъэм, хахуагъэм, къимыкIуэту къалэным зэрыпэрытым папщIэ ЛIыгъэм и орденыр хуагъэфэщащ ди республикэм и зауэлIитхум. ЦIыхуитIым «Жылагъуэм я псэукIэр хъумэным къыщигъэлъэгъуа зэфIэкIым папщIэ» медалхэр иратащ.
- ЗауэлIхэм я дамыгъэхэр я адэхэм щаритыжым, республикэм и Iэтащхьэм жиIащ: «ПщIэ фхуэтщIу, фэркIэ дыгушхуэу, дзэ къалэн зыгъэзащIэхэм я цIэхэр жыдоIэ. ИкIэщIыпIэкIэ текIуэныгъэ диIэну сохъуахъуэ! Нобэ къулыкъу гугъу езыхьэкI щIалэхэм я унагъуэхэм фIыщIэ яхузощI я шыIэныгъэм, я бынхэм ятеухуауэ къагъэлъагъуэ лIыгъэм папщIэ».
- Захаров Сергей къыхигъэщащ зауэлIхэм я къалэныр пылъхьэншэу зэрагъэзащIэр, лIыгъэ къызэрагъэлъэгъуар. «Си гуапэу согъэзащIэ ди къэралым и Президент Путин Владимиррэ Лъэпкъ гвардием и дзэм и унафэщI, армэм и генерал Золотов Николайрэ пщэрылъ къысщащIар. Къытпэщылъ къалэнхэр гугъущ, ауэ ди фIэщ мэхъу ахэр гъэзэщIа зэрыхъунур»! – жиIащ абы.