ЗэфIэкI лъагэ зиIа дохутыр икIи егъэджакIуэ
2020-04-21
- Урысей Федерацэмрэ Къэбэрдей-Балъкъэр Республикэмрэ я дохутыр зэгухьэныгъэм хэщIыныгъэшхуэ игъуэтащ.
- Хуабжьу ди жагъуэ зэрыхъуащи, мы махуэхэм дунейм ехыжащ медицинэ щIэныгъэхэм я доктор, КъБКъУ-м и медицинэ факультетым и кафедрэхэм ящыщ зым и унафэщI, профессор, КардиологиемкIэ урысей зэгухьэныгъэм и Къэбэрдей-Балъкъэр къудамэм и унафэщI, ЩIэныгъэмкIэ Урысей Академием ГеронтологиемкIэ и зэгухьэныгъэм и вице-президент, РАН-м ГеронтологиемкIэ и зэгухьэныгъэхэм Къэбэрдей-Балъкъэрым щиIэ къудамэм и унафэщI, ЩIДАА-м и член-корреспондент Инэрокъуэ Аллэ Музрач и пхъур.
- Инэрокъуэ Аллэ и дохутыр лэжьыгъэр 1975 гъэм Налшык дэт къалэ сымаджэщым терапиемкIэ езанэ къудамэм дохутыр-ординатору къыщыщIидзащ. 1977 гъэм ар Къэбэрдей-Балъкъэр къэрал университетым медицинэмкIэ и къудамэм ягъэкIуащ. ТерапиемкIэ, кардиологиемкIэ, геронтологиемкIэ, узыншагъэр хъумэнымкIэ IэщIагъэлIу щыткIэрэ абы илъэс зыбжанэкIэ иригъэкIуэкIащ щIэныгъэ-къэхутэныгъэ лэжьыгъэхэр, иужькIэ апхуэдэ проект зыбжанэми я унафэщIу щытащ.
- Москва дэт КардиологиемкIэ союзпсо центрым Мясников А. А. и цIэр зэрихьэу КардиологимкIэ и щIэныгъэ-къэхутэныгъэ институтым и кандидат лэжьыгъэр щыпхигъэкIащ. 1999 гъэм и доктор диссертацэр Терапиемрэ профилактикэ медицинэмкIэ лъэпкъ къэхутэныгъэ центрым (Москва) утыку къыщрихьэри, Инэрокъуэр кардиологие унэтIыныгъэмкIэ КъБР-м и бзылъхугъэхэм ящыщу япэу медицинэ щIэныгъэхэм я доктор хъуащ. Абы и диссертацэ лэжьыгъитIырщ а зэманым къэунэхуа «Автодорожная медицина» унэтIыныгъэм и лъабжьэр зыгъэтIылъар.
- Инэрокъуэ Аллэ республикэм и геронтологие IэнатIэм зиужьыным хэлъхьэныгъэшхуэ хуищIащ. Абы и унафэм щIэту КъБКъУ-м гериатриемкIэ ординатурэ къыщызэIуахащ. Абы щагъэхьэзыр ГеронтологиемкIэ республикэ центрым, а унэтIыныгъэмкIэ щIыналъэм и районхэм щыIэ сымаджэщхэм щылэжьэну IэщIагъэлIхэр. Апхуэдэуи, Аллэ и жэрдэмкIэ а центрым и лэжьыгъэм зэхъуэкIыныгъэфIхэр игъуэтащ.
- ЩIэныгъэ лэжьыгъэу 300-м щIигъу иIэщ абы, ахэр Урысейм и мызакъуэу, хамэ къэралхэми я медицинэ къыдэкIыгъуэхэм ихуащ. Инэрокъуэм щIэх-щIэхыурэ иригъэкIуэкIырт дунейпсо, федеральнэ мыхьэнэ зиIэ проектхэмкIэ щIэныгъэ-къэхутэныгъэ лэжьыгъэхэр икIи ахэр щIыналъэ медицинэм зегъэужьыным хуэунэтIат.
- Инэрокъуэ Аллэ и псэ- емыблэж лэжьыгъэм хуэфэщэн гулъытэ игъуэтащ. Ар мызэ-мытIэу ягъэпэжащ КъБР-м Узыншагъэр хъумэнымкIэ и министерствэм, КъБКъУ-м и щIыхь тхылъхэмкIэ. 2018 гъэм «КъБР-м щIыхь зиIэ и дохутыр» дамыгъэр къыхуагъэфэщащ, 2019 гъэм РАН-м и Президиумым и унафэкIэ «Егъэджэныгъэмрэ щIэныгъэмкIэ щIыхь зиIэ и лэжьакIуэ» цIэ лъапIэр къыфIащащ.
- Инэрокъуэ Аллэ Музрач и пхъур зэфIэкI лъагэ зиIэ дохутыру, къэхутакIуэу, щIэныгъэлIу, егъэджакIуэу, ныбжьэгъу пэжу, чэнджэщакIуэ Iущу, гъэсэныгъэшхуэ зыхэлъу щытащ. Ар псэ къабзэ зиIа цIыхут икIи и гъащIэ псом хуэпэжащ медицинэм. Абы и фэеплъ нэхур дэ сытым дежи ди гум илъынущ.
- Бэрбэч Хь.М. и цIэр зезыхьэ
- Къэбэрдей-Балъкъэр къэрал университетым
- и администрацэр, профсоюз комитетыр,
- егъэджакIуэхэр, жылагъуэзэгухьэныгъэхэр.