ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ

АДЫГЭ ПСАЛЪЭ

Кинофестивалым кърикIуахэр

2019-10-24

  • Налшык къалэм щызэхуащIыжащ Кавказ Ищхъэрэм киномрэ телевиденэмкIэ и «Кунаки» XIII фестиваль зэIухар. Зэхыхьэр щиухым къэпщытакIуэ гупым хэтхэм абы кърикIуахэр зэхалъхьэжащ икIи зэхьэзэхуэм и унэтIыныгъэхэм щытекIуахэмрэ Гран-Прир зыхуагъэфэщахэмрэ я цIэхэр къагъэнэIуащ.

  • Кавказ Ищхъэрэм киномрэ телевиденэмкIэ и «Кунаки» XIII фестивалыр теухуауэ щытащ ар къызэзыгъэпэща икIи абы и президенту щыта, культуролог, журналист Кусовэ Сулиетэ и фэеплъым. Мы гъэм фестивалыр ирагъэкIуэкIащ Президент грантхэм я фондым щыщ мылъкукIэ. Абы щытекIуахэм иратащ ахъшэ саугъэту сом мин 70 — 100. Фестивалыр егъэкIуэкIынымкIэ дэIэпыкъуэгъу хъуащ республикэм и властхэр, Урысейм и Журналистхэмрэ Кинематографистхэмрэ я зэгухьэныгъэхэр, КъБР-м ЩэнхабзэмкIэ и министерствэр, Кавказым щыпсэу лъэпкъхэм я Урысей конгрессыр.
  • Фестивалым хэтыну лъэIу тхылъхэр къагъэхьащ Сербием, Къэзахъстаным, Къыргъызым, Эстонием, Абхъазым, Урысейм и щIыналъэ куэдым щыщхэм. Махуитхум къриубыдэу Налшык и къэрал киноконцерт гъэлъэгъуапIэм щыхэплъащ абыхэм я лэжьыгъэхэм. Зэхыхьэм и къэпщытакIуэ гупым хэтхэм КъБКъУ-м мастер-классхэр щатащ. ГъуазджэхэмкIэ Кавказ Ищхъэрэ къэрал институтым художественнэ фильмхэр щагъэлъэгъуащ. Кинохутэ икIи сценарист Черджиевэ Индирэ утыку кърихьащ 1986 гъэм Гамзатов Расул и тхыгъэм къытращIыкIа «Сказание о храбром Хочбаре» фильмыр. СССР-м и къэрал саугъэтым и лауреат, Тыркумэн ССР-м и цIыхубэ артист Нарлиев Ходжакули игъэлъэгъуащ Айтматов Чингиз и тхыгъэм къытращIыкIа, 1990 гъэм «Туркуменфильм» киностудием щытраха «Манкурт»-р.
  • Кинофестивалым и Гран-При-р иратащ режиссёр зэадэзэкъуэхэу Соломинхэ Валерийрэ Евгенийрэ я «Отец и сыновья из Кротово» фильмым. Ар теухуащ Сыбырым хыхьэ Кротовэ къуажэ пхыдзам щыпсэу мэкъумэшы-щIэ Абрамов Василий и гъащIэм. ЛIыр и закъуэ дыдэщ, и къуэхэр 2005 гъэм ягъэтIысащи Фильмыр илъэсипщIкIэ трахащ икIи ар документальнэ кином и классик Соломин Валерий и иужьрей лэжьыгъэ хъуащ. Ар и кIэм нагъэсащ Валерий и къуэхэм.
  • Мы гъэм «Кунаки» фестивалым и къызэгъэпэщакIуэ комитетым иджыри къыхилъхьащ Кусовэ Сулиетэ и цIэкIэ ягъэува Гран-Прир. Абы ипхъу Эланэ саугъэт нэхъыщхьэр иритыжащ Къыргъызстаным щыщ режиссёр Аджибаев Ибадыллы, и «Учитель» фильмым папщIэ.
  • «Щэнхабзэмрэ гъуазджэмрэ» унэтIыныгъэм пашэ щыхъуащ режиссёр Семибратов Дмитрий и «Империя балета» фильмыр. «Телевизионнэ фильмхэмрэ программэхэмрэ» унэтIыныгъэм нэхъыфIу къыщалъытащ режиссёрхэу Василенкэ Владимиррэ Самойлов Альбертрэ я «Хождение по мукам» жыхуиIэр. «Унагъуэмрэ жылагъуэмрэ» унэтIыныгъэм щытекIуащ режиссёр Турдуматовэ Айназ (Къыргъызстан) и «Далеко» фильмыр. «ФIэщхъуныгъэмрэ гугъэмрэ» унэтIыныгъэм бжьыпэр щиубыдащ Леонтьевэ Галинэ и «Искусственное дыхание»-м. «БлэкIамрэ къэкIуэнумрэ» унэтIыныгъэм текIуэныгъэр щызэдагуэшащ режиссёрхэу Ваттахудинов Павелрэ («Сны о России») Хаханов Берикрэ («Наследие предков») я лэжьыгъэхэм.
  • Фестивалым хэтахэм фIыщIэ, фэеплъ саугъэтхэр иратащ республикэм и гъэзэщIакIуэ властым и органхэм я лIыкIуэхэм. Щэнхабзэ зэхыхьэр гуфIэгъуэкIэ щызэхуащIыжам абы хэтахэмрэ зыкърезыгъэхьэлIахэмрэ ехъуэхъуащ КъБР-м щэнхабзэмкIэ и министрым и къалэнхэр зыгъэзащIэ Къумахуэ Мухьэдин, КъБР-м граждан жылагъуэ институтхэм ядэлэжьэнымрэ лъэпкъ IуэхухэмкIэ и министрым и къалэнхэр зыгъэзащIэ КIурашын Андзор, КъБР-м лэжьыгъэмрэ цIыхухэр социальнэу хъумэнымкIэ и министрым и къалэнхэр зыгъэзащIэ Асанов Алим, КъБР-м спортымкIэ и министрым и къалэнхэр зыгъэзащIэм и къуэдзэ Анаев Аслъэн сымэ, нэгъуэщIхэри.
  • ТЕКIУЖЬ Заретэ.