ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ

АДЫГЭ ПСАЛЪЭ

КъБР-м

 И ПАРЛАМЕНТЫМРЭ ПРАВИТЕЛЬСТВЭМРЭ

Я ГАЗЕТ

сайт газеты «Адыгэпсалъэ»

газетыр 1924 гъэм и мэкъуауэгъуэ мазэм и 1 лъандэрэ къыдокI

ХЪЫБАРЫЩIЭХЭР

ТХЫДЭ

ХЪЫБАРЕГЪАЩIЭ

ТХЫГЪЭХЭР

АРХИВЫР

english

адыгэбзэ

русский

МэшбащIэ Исхьэкъ и пщIэ лъагэр

Урысей Федерацэм и Президентым деж щыIэ Жылагъуэ палатэм хагъэхьащ адыгэ тха­кIуэ щэджащэ МэшбащIэ Исхьэкъ.

КэшбащIэ Исхьэкъ Къэбэрдей-Балъкъэрми, Къэрэшей-Шэрджэсми, Адыгейми я цIыхубэ тхакIуэ цIэ лъапIэхэр зэрехьэ, СССР-м, Урысей Федерацэм я къэрал саугъэтхэм, Шолохов Ми­хаил и цIэкIэ ят дунейпсо саугъэ­тым я лауреатщ.

   Бзэ куэдкIэ зэдзэкIауэ дунейм къытехьащ МэшбащIэ Исхьэкъ и тхыгъэ гъуэзэджэхэр. ТхакIуэм и къа­лэмыпэм къыщIэкIащ ады­гэ­ лъэпкъхэм я тхыдэр лъабжьэ зы­хуэхъуа роман пщыкIутхум щIигъу. Абыхэм иджыблагъэ аргуэру зы къахэхъуащ: Мейкъуапэ къыщыдэкIащ тхакIуэм и тхы­гъэщIэ - “КъуэкIыпIэмрэ къухьэ­пIэм­рэ” романыр. Абы и лъаб­жьэ­­ри ди лъэпкъ тхыдэщ - тха­кIуэм ди пащхьэ кърилъхьащ XII-XVI лIэщIыгъуэхэм Египетым пащ­тыхь щыхъуауэ щыта адыгэ мамлюкхэм я гъащIэмрэ я Iуэху­щIа­фэхэмрэ.

   Дигурэ ди псэкIэ дохъуэхъу адыгэ тхакIуэшхуэм Урысей Фе­де­рацэм и Жылагъуэ палатэм зэ­рыхагъэхьамкIэ, псоми ди гуапэщ, абы и пщIэр нэхъри лъагэ хъу­мэ, и къалэм Iумахуэм и гуа­щIэр нэхъ­ри къеблмэ.

“Адыгэ псалъэ” газет.

Адыгэ махуэгъэпс

Мыгувэу дунейм къытехьэнущ 2006 гъэм и Адыгэ­ махуэгъэпс. Ар зэрыщыту ди лъэпкъым теухуащ.

Календарым ихуащ Къэбэрдей-Балъкъэрым, Адыгэ Республикэм, Къэрэшей-Шэрджэсым, Шапсы­гъым щыщ адыгэ тхакIуэхэр, артистхэр, композиторхэр, сурэтыщIхэр, еджагъэшхуэхэр, цIыху цIэрыIуэхэр. Абы щыбгъуэтынущ зэман зэмылIэужьы­гъуэхэм дунейм, Урысейм, ди республикэхэм къыщыхъуахэм ятеухуа хъыбархэр, бжы­гъэ гъэщIэ­гъуэн­хэр, усыгъэ­хэр, жы­Iэгъуэхэр, чэнджэщхэр, цIыху Iущхэм я гупсысэхэр, нэгъуэщI куэди.

   Махуэгъэпсым къыщы­гъэлъэгъуар щIыпIэ зэманырщ: дыгъэр къыщыщIэ­кIыр, щыкъухьэжыр, ма­хуэм и кIыхьагъыр Налшык, Мейкъуапэ, Черкесск те­щIы­хьащ.

   Адыгэ календарыр къызэ­ры­дэкIынур урысыбзэщ, стIолыщхьэу, къызэбгъэ­дзэкIыу щытынущ. Зэхэзылъхьар КъБР-м щIыхь зиIэ и журналист Уэрыш Нур­хьэлийщ. Елэжьыжар икIи редакторыр Къэбэрдей Адыгэ Хасэм и тхьэмадэ ХьэфIыцIэ Мухьэмэдщ.

ГЪУКIАКЪУЭ Инал.

ЗекIуэм и тхыдэм аргуэру ироплъэж

Иджыблагъэ дунейм къытехьащ «Черкесское наездничество - ЗекIуэ» тхы­лъым и етIуанэ къыдэ­кIы­гъуэр. Ар зи къалэм къы­щIэ­­кIар тхыдэ щIэ­ны­гъэхэм я кандидат, правительствэм ейуэ щымыт «Кавказ форум» зэгухьэны­гъэм и къы­зэгъэпэщакIуэхэм ящыщ Мэрзей Аслъэнбэчщ.

   Тхылъым куууэ щызэпкъ­ры­хащ илъэс мин куэдкIэ адыгэ­хэм къадэгъуэгурыкIуа зекIуэм и тхыдэр икIи ар куэд­кIэ къыщхьэщокI япэм щыIа апхуэдэ къэхутэныгъэ лэ­жьы­­гъэ­хэм. Абы щызэхуэхьэсащ Къэбэрдей-Балъкъэрым и Лъэпкъ музейм и фондым къы­хаха,  XIX - XX  лIэщIы­гъуэ­хэм ящIа сурэтхэр, адыгэхэм я Iэщэ-фащэ телъыджэхэр. Урысейм ЩIэныгъэхэмкIэ и академием этнологиемкIэ и институтым щIэныгъэлIым и къэхутэныгъэ лэжьыгъэхэр мыхьэнэшхуэ зиIэу къыщалъытащ.

  Мэрзей Аслъэнбэч тхылъым щелэжьыжар лъэхъуэщырщ - зэры­мы­щIэкIэ гуауэ къыIэщIэщIэри ягъэ­тIысауэ иджыпсту щысщ. Ауэ абы зэ­ры­­­­щыIэм ­хуэдэурэ, иджыри къэху­тэ­­­­­­­­ны­гъэ лэжьы­гъэхэр ирегъэкIу­экI.­­­­­­­­­­­­­­­­­­

   «Черкесское наездничество - ЗекIуэ» тхылъым и тиражыр мащIэ дыдэщ, ар спонсорхэм я ахъшэкIэ къыдагъэкIауэ аращ. Ар къыщыпщэху хъунущ Налшык дэт «Адыгэ унэ» тыкуэным. Тыкуэным и унафэщI IутIыж Мэжид «Регнум» хъы­барегъащIэ агентствэм и журналистым иджыблагъэ зэ­рыжриIамкIэ, тхылъым къы­­щIэкI ахъшэр Аслъэнбэч и щхьэгъусэм иратынущ. Мэрзейм бын цIыкIуищ иIэщ.

Щэуей Хьэщауэ.

ФеужьэрэкI

ПщIэ зыхуэтщI ди ныб­жьэгъу лъапIэхэ! Сабийхэм папщIэ къыдэкI «Нур» журналым Iэ щытебдзэ хъуну пIалъэр и кIэм нэблэгъащ.

   Лъэпкъым къыщIэ­хъуэ щIэблэм ди тхыдэр ящIэу, хабзэр я Iэпэгъуу, я къау­хьым зиужь зэпыту къэтэ­джын папщIэ мыхьэ­нэшхуэ зиIэ а журналыр уна­гъуэ псоми илъып­хъэщ.

   «Инэмыкъуэ», «Жаншэрхъ», «Адыгэ хабзэ», «Ну­рым и гъу­джэ», «Фы­къакIуэ, фыкъы­щIы­хьэ, фыкъэпсалъэ» жы­хуи­Iэ напэкIуэцIхэм цIыкIухэр зы­хуеину куэд кърагъуэтэнущ, езыхэм зэхалъхьа усэхэр, рассказхэр, ящIа сурэтхэр къытрадзэнущ.

  Мазэ къэс къыдэкI жур­налым илъэс ныкъуэм и уа­сэр сом 32,04-рэщ, и индексыр 73912-щ.

   Тхыгъэ щхьэпэхэмкIэ фи ­цIыкIухэм яхуэупсэ журналым Iэ зэрытевдзэным феу­жьэрэкI.

Жэмтхьэлэдэсхэм я зэфIэкIыр ягъэлъагъуэ

БэнэкIэ зэмылIэужьыгъуэхэмкIэ дунейпсо спорт фестивалу иджыблагъэ Москва щекIуэ­кIам щыIащ Жэмтхъэлэ дэт сабий-ныбжьыщIэ спорт еджа­пIэм алыдж-урым бэнэкIэмкIэ и гъэсэнитху.

   Ди республикэм и бэна­кIуэхэр зыхэхуа гупым хэтащ Украинэм, Сербие-Черногорием, Белоруссием, Азербайджаным, Тыркумэным, Марий-Элым я командэхэр. Япэ зэIущIэм бжыгъэр 8:3-уэ Къэбэрдей-Балъкъэрыр Тыркумэным те­кIуащ. ИужькIэ Марий-Элыр 7:4-уэ хигъэщIащ. Финалым и Iыхьэ ныкъуэм икIын папщIэ ди щIалэхэр текIуэн хуейт Украинэм и командэ лъэщым. Япэ щIыкIэ бжыгъэр зэхуэдэу екIуэ­кIащ, 4:4-м нэсыхукIэ. ИужькIэ нэхъ хьэлъэхэм я зэIущIэхэм ди бэнакIуэхэр нэхъ щыхуэмыхуу къыщIэкIри, бжыгъэр 7:4-уэ зэпеуэр тфIахьащ.

   Финалым щызэхуэзащ Украи­нэмрэ Москварэ и командэхэр. Япэ увыпIэр москвадэсхэм яу­бы­дащ.

   Къэбэрдей-Балъкъэрым и командэм и тренер нэхъыщхьэ ГъуэплъащIэ Замир зэрыжи­Iам­кIэ, Жэмтхьэлэ и бэнакIуэхэм ящыщу Бэджий Анзоррэ Со­къур Артуррэ зэIущIищым, Гъуэ­п­лъащIэ Аслъэнрэ Жамгуразов Азрэтрэ - тIум щытекIуахэщ.

  Зэхьэзэхуэм япэ увыпIэр къы­щызыхьахэмрэ призер щы­­­хъуахэмрэ медалхэр, фэеплъ саугъэтхэр къратащ.

Хьэщыкъуей Олег.

ссылки

хъыбархэр

сурэт

къыдэкIыгъуэхэр

Copyright © 2005 Buch e-mail: [email protected]