|
|
|
ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ |
|
|
||||||||
АДЫГЭ ПСАЛЪЭ |
|
|||||||||||
|
КъБР-м И ПАРЛАМЕНТЫМРЭ ПРАВИТЕЛЬСТВЭМРЭ Я ГАЗЕТ |
|
|||||||||||
|
сайт газеты «Адыгэпсалъэ»
2006 гъэм мазаем и9 |
||||||||||||
|
газетыр 1924 гъэм и мэкъуауэгъуэ мазэм и 1 лъандэрэ къыдокI |
||||||||||||
|
ХЪЫБАРЫЩIЭХЭР
ТХЫДЭ
ХЪЫБАРЕГЪАЩIЭ
ТХЫГЪЭХЭР
|
english |
адыгэбзэ |
|
|||||||||
|
Къэбэрдей-Балъкъэр Республикэм и Президентым 2006 гъэм мазаем и 3-м къыдигъэкIа Указ №11-УП-мкIэ къищтащ Граждан жылагъуэм ехьэлIа IуэхущIапIэхэм зегъэужьыным зыщIэгъэкъуэнымрэ цIыхум и хуитыныгъэхэмкIэ Къэбэрдей-Балъкъэр Республикэм и Президентым и деж щыIэ комиссэм хэтхэр Къанокъуэ А.Б. - Къэбэрдей-Балъкъэр Республикэм и Президентыр (Комиссэм и унафэщIщ) Беппаев С.У. - Комиссэм жэуап зыхь и секретарыр Бабаев Хъу.Хь. - Къэбэрдей-Балъкъэр Республикэм и Парламентым Лъэпкъ зэхущытыкIэхэмкIэ и комитетым и унафэщIхэм ящыщ зыр (зэгурыIуауэ) Балъкъыз З.Хь. - Аруан районым и щIыпIэ самоуправленэм и Iэтащхьэр (зэгурыIуауэ) Бобылев В.Н. - Къэбэрдей-Балъкъэр Республикэм и православнэ члисэхэм я Iэтащхьэр (зэгурыIуауэ) Борэ А.Хь. - “Бэрбэч Хь.М. и цIэр зезыхьэ Къэбэрдей-Балъкъэр къэрал университет” щIэныгъэ нэхъыщхьэ щрагъэгъуэт къэрал IуэхущIапIэм и Социально-гуманитар институтым дунейпсо тхыдэмкIэ и кафедрэм и унафэщIыр (зэгурыIуауэ) Вэрыкъуэ В.Хъ. - ЩэнхабзэмкIэ урысей фондым и Къэбэрдей-Балъкъэр къудамэм и тхьэмадэр, “Налшык” жылагъуэ телерадиокомпание” акционер обществэ зэIухам и генеральнэ директорыр (зэгурыIуауэ) Гончаренкэ М.В. - Къэбэрдей-Балъкъэр Республикэм и Парламентым Лъэпкъ зэхущытыкIэхэмкIэ и комитетым и унафэщIхэм ящыщ зыр (зэгурыIуауэ) Думэн Хь.М. - Къэбэрдей-Балъкъэр Республикэм и Правительствэмрэ ЩIэныгъэхэмкIэ урысей академием и Къэбэрдей-Балъкъэр щIэныгъэ центрымрэ Гуманитар къэхутэныгъэхэмкIэ я институтым и унафэщIыр ДыщэкI М.Р. - Къэбэрдей-Балъкъэр Республикэм и Парламентым ЗаконодательствэмкIэ, къэрал ухуэныгъэмкIэ, щIыпIэ самоуправленэм и IуэхухэмкIэ и комитетым и унафэщIыр (зэгурыIуауэ) Жыгун Хь.Л. - Къэбэрдей-Балъкъэр Республикэм и Адвокат палатэм и президентыр (зэгурыIуауэ) Зумакулов А.М. - Урысей Федерацэм Мэкъумэш хозяйствэмкIэ и министерствэм и “Къэбэрдей-Балъкъэр къэрал мэкъумэш академие” щIэныгъэ нэхъыщхьэ щрагъэгъуэт федеральнэ къэрал еджапIэм и проректорыр (зэгурыIуауэ) Любуня Н.Г. - Тэрч-Балъкъ къэзакъ округым щыщу Къэбэрдей-Балъкъэр Республикэм и щIыналъэм хиубыдэм и атаманыр (зэгурыIуауэ) ПщыхьэщIэ I.М. - Къэбэрдей-Балъкъэр Республикэм и Муслъымэнхэм я IуэхущIапIэм и тхьэмадэр (зэгурыIуауэ) Сэхъу В.Къ. - Къэбэрдей-Балъкъэр Республикэм и Парламентым Лъэпкъ зэхущытыкIэхэмкIэ и комитетым и унафэщIхэм ящыщ зыр (зэгурыIуауэ) Тау П.Къ. - Къэбэрдей-Балъкъэр республикэм и профессиональнэ союзхэм я IуэхущIапIэхэм я зэгухьэныгъэм и тхьэмадэр, Къэбэрдей-Балъкъэр Республикэм и Парламентым и депутатыр (зэгурыIуауэ) Темиржанов М.О. - Шэрэдж районым и щIыпIэ самоуправленэм и Iэтащхьэр (зэгурыIуауэ) ХьэфIыцIэ М.М. - “Адыгэ псалъэ” газетым и редакцэ” къэрал IуэхущIапIэм и редактор нэхъыщхьэр (зэгурыIуауэ) Шабаев Л.М. - Налшык къалэ дэс журтхэм я дин зэгухьэныгъэм и раввиныр (зэгурыIуауэ) ШыкIэбахъуэ М.Хь. - Зауэм, лэжьыгъэм, IэщэкIэ ЗэщIэузэда къарухэм, хабзэхъумэ органхэм я ветеранхэм (пенсионерхэм) я Къэбэрдей-Балъкъэр республикэ жылагъуэ зэгухьэныгъэм и советым и тхьэмадэр (зэгурыIуауэ).
Абы и фэеплъыр кIуэдыжынкъым Республикэм и творческэ союзхэм, лъэпкъ-щэнхабзэ центрхэм, жылагъуэ организацэхэм, цIыхухэм куэдрэ зыкъызэрыхуагъазэм къыхэкIыу КъБР-м и Президентым и унафэкIэ комиссэ къызэрагъэпэщащ Къэбэрдей-Балъкъэр Республикэм и япэ Президент КIуэкIуэ В.М. и фэеплъыр мыкIуэдыжын щIыным хуэунэтIа Iуэхугъуэхэр гъэхьэзырын и лъэныкъуэкIэ. Дыгъуасэ КъБР-м и Парламентым и спикер Бечелов Ильяс и унафэм щIэту щекIуэкIащ а Комиссэм и зэIущIэ. Абы кърихьэлIащ Президентым и Администрацэм и УнафэщI Шондыр Олег, Парламентым и УнафэщIым и къуэдзэ Бозий Натбий, Правительствэм и УнафэщIым и къуэдзэхэу Балъкъыз Михаилрэ Чеченов Ануаррэ, Президентымрэ Правительствэмрэ я лIыкIуэу Парламентым, суд органхэм щыIэ Къуэшрокъуэ Залым, Налшык къалэм и щIыпIэ самоуправленэм и Iэтащхьэ Берд Хьэзрэталий, комиссэм хэт нэгъуэщIхэр. ЗэIущIэр къызэIуихри, Бечелов Ильяс къызэхуэсахэм ягу къигъэкIыжащ творческэ союзхэм, лэжьакIуэ коллективхэм, жылагъуэ организацэхэм къабгъэдэкIыу Президентымрэ Парламентымрэ чэнджэщ пыухыкIахэр къазэрыIэрыхьар. Комиссэ хэха къызэрагъэпэщащ, абы хэтхэм а къыхалъхьа чэнджэщхэр зэхалъхьэжу хэплъэн хуейщ. Бахъсэн къалэ округым и Iэтащхьэ АфэщIыж Юрий жиIащ Бахъсэн Октябрыр илъэс 60 зэрырикъуам и цIэр зезыхьэу щыта уэрамым КIуэкIуэ Валерий и цIэр зэрыфIащар, апхуэдэуи чэнджэщ щыIэщ республикэм и япэ Президентым и цIэр ар щеджа школым фIэщынымкIэ. Парламентым и вице-спикер Бозий Натбий Налшык дэт Къэрал киноконцерт залым КIуэкIуэ В.М. и цIэр фIащыну жылагъуэ организацэхэм къызэрагъэувар ягу къигъэкIыжри, езым къыхилъхьащ япэ Президентым и цIэр театрхэм я Уардэунэ яухуэм фIащыну. АтIэми а Уардэунэр ухуэныр зигу къэкIауэ щытар аращ. Комиссэм хэтхэм ар даIыгъащ. Апхуэдэуи ахэр акъылэгъу хъуащ Бозийм къыхилъхьа нэгъуэщI IуэхумкIи: Аруан районым, Нарткъалэ я щIыпIэ самоуправленэм и органхэр а куейр зэфIэувэнымрэ зиужьынымрэ куэд хэзыщIыхьа цIыхум и фэеплъыр мыкIуэдыжын щIыным, къапщтэмэ, Нарткъалэ и уэрамхэм ящыщ зым абы и цIэр фIэщыным егупсысыну пщэрылъ яхуэщIынымкIэ. Налшык къалэм и щIыпIэ самоуправленэм и Iэтащхьэ Берд Хьэзрэталий акъылэгъу хъуащ республикэм и къалащхьэм и уэрамхэм ящыщ зым КIуэкIуэ В.М. и цIэр фIэщын хуейуэ жылагъуэ организацэхэм, къэпсэлъахэм ящыщ зыбжанэм къызэрагъэувамкIэ. Парламентым и комитетым и унафэщI Иванов Игорь къыхилъхьащ Налшык къалэм ЗэгурыIуэныгъэмкIэ и утыкум (Советхэм я Унэм и гупэм деж) КIуэкIуэ В.М. и фэеплъ щагъэувыну. Депутатым къызэрилъытэмкIэ, республикэм мамырыгъэрэ зэгурыIуэныгъэрэ щыIэныр къызэригъэпэщыну зыхузэфIэкIа цIыхум ар нэхъ хуэфащэщ ЩIы хъурейм и шар абы ирагъэувам нэхърэ. ФIыуэ егупсысауэ Iуэху къыхилъхьащ Къэбэрдей-Балъкъэр мэкъумэш академием и ректор Жэрыкъуэ Борис, а еджапIэр къэзыуха КIуэкIуэ В.М. и цIэр Академием фIэщын икIи абы и фэеплъыр Лениным и цIэр зезыхьэ уэрамымкIэ плъэуэ вузым и гупэм щыгъэувын и лъэныкъуэкIэ. А Iуэхур комиссэм хэт псоми ягу ирихьащ. Парламентым и комитетым и унафэщIым и къуэдзэ Абазэ Руслан япэ Президентыр къыщалъхуар Тырныауз къалэр арауэ зэрыщытыр ягу къигъэкIыжри, КIуэкIуэ В.М. и цIэр Кавказ къуршым и щыгу лъагэ цIэншэхэм ящыщ зым фIэщын хуейуэ къыхилъхьащ. А гупсысэм адэкIэ зригъэубгъуащ Парламентым и комитетым и унафэщI Жанатаев Сэлим: Булунгу къуажэм газ шэныр щаухым абы щыпсэухэм апхуэдэ унафэ къащтащ, уеблэмэ апхуэдэ щыгу лъаги къагъуэтащ, къэнэжыр документхэмкIэ щIэгъэбыдэнырщ. Абазэ Руслан апхуэдэуи къыхилъхьащ КIуэкIуэ В.М. щыпсэуа унэм и блыным мемориальнэ пхъэбгъу кIэралъхьэну икIи япэ Президентым теухуа гукъэкIыжхэр щызэхуэхьэса тхылъ къыдагъэкIыну. Вице-премьер Балъкъыз Михаил Щэнхабзэмрэ хъыбарегъащIэ IэнатIэхэмкIэ министерствэм чэнджэщ иритащ КIуэкIуэ В.М. теухуа кино-сурэт-видеоматериалхэр зэхуэхьэсыныр икIи хъумэныр къызэригъэпэщыну икIи республикэм и япэ Президентым и гъащIэмрэ и лэжьыгъэмрэ теухуа документальнэ фильм ягъэхьэзырыну. Парламентым и УнафэщI Бечелов Ильяс «Къэбэрдей-Балъкъэр Республикэм и пащхьэм щиIэ фIыщIэхэм папщIэ» медаль зэрагъэувар ягу къигъэкIыжри, къыхилъхьащ, а медалым и япэ экземплярыр КIуэкIуэ Валерий Мухьэмэд и къуэм (лIауэ) хуагъэфэщэну КъБР-м и Президент Къанокъуэ Арсен деж лъэIу къыщаIэтыну. ЗэIущIэм щекIуэкIа псалъэмакъыр зэхилъхьэжкIэрэ, Бечелов Ильяс псоми фIыщIэ яхуищIащ республикэм и япэ Президентым и фэеплъыр мыкIуэдыжын щIын Iуэхум жыджэру зэрыхэтахэм щхьэкIэ. КъБР-м и Парламентым и пресс-IуэхущIапIэ.
Дунейпсо Гъавэ Корпорацэм и IуэхущIапIэ Къэбэрдей-Балъкъэр Республикэм и Президент Къанокъуэ Арсен бэрэжьей махуэм яIущIащ «Гленкор Интернейшнл АГ» швейцар компанием, Дунейпсо Гъавэ Компанием я лIыкIуэхэм. Ахэр ди деж къэкIуащ инвестицэ проектхэр гъэзэщIэн икIи КъБР-м компанием и IуэхущIапIэ къыщызэгъэпэщын и лъэныкъуэкIэ республикэм щыIэ Iэмалхэм щыгъуазэ защIын папщIэ. «Гленкор Грейн» компанием и управляющэ Крис Махони жиIащ компанием илъэс къэс доллар мелард 70-м нэблагъэ зэрызэблигъэкIыр. Ар металлхэм елэжьын, щIы дагъэ къыщIэшын, фIамыщI къыщIэхын, энергетикэм и продуктхэр, мэкъумэш продукцэ къэлэжьын я лъэныкъуэкIэ дунейм щыпашэхэм ящыщ зыщ, гъавэмрэ дагъэ зэмылIэужьыгъуэхэмрэ я дунейпсо рынокым илъэс 25-м щIигъуауэ щолажьэ, дунейм и къэрал 20-м езым и представительствэхэр щиIэщ, абыхэм я нэхъ ин дыдэхэм ящыщ зыр - Урысейм. Управляющэм зэрыжиIамкIэ, компаниер нэхъ дэзыхьэхыр КъБР-м и мэкъумэш IэнатIэрщ. «Мыхьэнэшхуэ иIэщ щIыпIэм щыIэ мэкъумэшыщIэхэм езыхэм я лэжьыгъэм и мыхьэнэр зыхуэдэр зыхащIэу щытыным икIи къалэжь продукцэр щыпхагъэкI рынокыфI яIэным. Дэ сыт щыгъуи фIыуэ икIи и зэманым продукцэм и пщIэр ядот, гъавэр хэщIыныгъэ имыгъуэту дохъумэ. Фирмэр нэгъуэщI IэнатIэ зэмылIэужьыгъуэхэми зыубгъуауэ щылэжьэнкIэ хъунущ. Къапщтэмэ, дэ гулъытэ худощI щIыдагъэ къыщIэшыным, Тырныауз горно-обогатительнэ комбинатым, туризмэм», - къигъэлъэгъуащ Крис Махони икIи щIэлъэIуащ а унэтIыныгъэхэмкIэ справкэ иратыну. Дунейпсо Гъавэ Корпорацэм - «Гленкор Грейн» Урысейм щиIэ стратегие дзейм и генеральнэ директор Огнев Юрий жиIащ гъавэ щыIах Солдатскэ предприятэм Дунейпсо Гъавэ Корпорацэм и IуэхущIапIэ къыщызэIухыным и Iуэхум къанэ щIагъуэ щымыIэу унафэ тещIыхьа зэрыхъуар. Абы и япэ къуэдзэ Щоджэн Iэуес дыщIигъуащ элеватор, техническэ станц зэраухуэнур, лэжьапIэ IэнатIэщIэхэр къызэрызэрагъэпэщынур. «Iэмал имыIэу дынывдэIэпыкъунщ, щIэгъэкъуэн фыхуей хъумэ зыкъытхуэвгъазэ, - жиIащ Президентым. - ПщIэшхуэ зиIэ фи фирмэм хуэдэм и унэтIыныгъэхэм ящыщ зымкIэ нэхъ мыхъуми ди деж щылажьэу щIидзэмэ, ар адрей инвесторхэм я дежкIи щапхъэ хъунущ, мыбы Iуэху щызехьэнымкIэ щытыкIэфIхэр зэрыщыIэм щыхьэт техъуэ щапхъэ». ХьэщIэхэм Къанокъуэ Арсен къратащ фэеплъ саугъэт - керамикэм къыхэщIыкIа хьэкъущыкъу, жьыкIэ ягъэлажьэ щхьэлхэм, къуажэ унэхэм я сурэтхэр тещIыхьауэ. ЗэIущIэм хэтахэщ «Гленкор Грейн» и трейдер нэхъыщхьэ Тео Шкипер, экономикэ зыужьыныгъэмрэ сатумкIэ министр Мусуков Алий, «Юнис» компанием и унафэщI Семэн Юрий. КъБР-м и Президентымрэ Правительствэмрэ я пресс-IуэхущIапIэ.
Зы ЩIэин. Зы Хэку. Зы лъэпкъ Адыгэр зы дыхъужыным, шэч хэмылъу, дэтхэнэ ди зы лъэпкъэгъури щIохъуэпс. Ауэ ущIэхъуэпс къудейкIэ зэфIэкIкъым - Мазаем и 3-м Налшык, Дунейпсо Адыгэ Хасэм и унэм, зэIущIэ щхьэпэ щекIуэкIащ. Ар къызэригъэпэщащ щIышылэм и 17-м ятха Дунейпсо Адыгэ Зэкъуэшыныгъэ цIыхубэ организацэм. Абы и къызэгъэпэщакIуэ комитетыр зэхыхьащ илъэс и пэкIэ. Хьэлэмэтращи, ДАЗ-м и жэрдэмщIакIуэри, ар зэфIэзыгъэувари щIалэгъуалэрщ. Тхьэмадэу хахар щIалэщIэ дыдэ Шыхъуэ Замирщ. Хэкужьым ис адыгэхэмрэ нэгъуэщІ къэрал щыІэхэмрэ яку зэпыщІэныгъэ быдэ дэлъхьэным теухуа мурадырщ Дунейпсо Адыгэ Зэкъуэшыныгъэм щIэдзапIэ хуэхъуар. Шэч хэлъкъым: лъэпкъым и тхыдэр, бзэр, щэнхабзэр, зэхэтыкIэр, хабзэ дахэр ди зэхуэдэ щІэинщ. А псор тхъумэжыныр дэтхэнэ зы адыгэми ди хъуэпсапIэми, дуней псом дызэрыщикъухьам ди къарур щIех. Абы къыхэкIыу ДАЗ-м япэ иригъэщыну и мурадхэм ящыщщ дэнэ щIыпIи щыIэ ди лъэпкъэгъухэр зэпищIэныр, лъэпкъым теухуауэ тхылъхэр, тхыгъэхэр зэхуэхьэсыныр икIи мыпхуэдэ унэтIыныгъэхэр егъэпс: - тхыдэм, ІуэрыІуатэм, адыгэ Іуэхум теухуа хьэпшыпхэр зэхуэхьэсын; - адыгэ щыпсэу щІыпІэхэм щыгъуазэ зыщIын; - хабзэр щІэблэм нэсу егъэщІэн; - адыгэхэм тетхыхьахэм, ІуэрыІуатэм и лэжьакІуэхэм я лекцэхэр, семинархэр къызэгъэпэщын; - лъэпкъыр зы хъужын гупсысэм дуней псом зыщегъэубгъун. ЩІэблэм адыгэ Іуэхур щІэщыгъуэ щащІын мурадкIэ проект зыбжанэ зэхалъхьащ. Абыхэм ящыщщ мыхэр: «Дунейпсо адыгэ сурэтылъэ». Абы илъынущ адыгэм пасэ зэманым щыщІэдзауэ нобэ пщІондэ къыдекІуэкІа Іуэхухэм теухуа сурэтхэр, Кавказым и дахагъэр, ди псэукIэр, щыгъын зэрахьэу щытахэр уи нэгу къыщIэзыгъэувэхэр. А псом къищынэмыщIауэ абы хэтынущ адыгэ сурэтыщIхэм я лэжьыгъэхэр. Сайтым махуэ къэсыхукІэ сурэтыщІэхэр иралъхьэнущ. КIуэ пэтми ар адыгэм теухуауэ сыт хуэдэ сурэтри щыбгъуэт сурэтылъэ хъунущ. «Адыгэ информацэ гъэлъэгъуапIэ». Абы щызэхуэхьэсащ адыгэм и гъащІэм теухуа хъыбархэр, макъамэхэр, уэрэдхэр. КIэщIу жыпIэмэ, лъэпкъ хабзэр, щэнхабзэр щІэблэ къэкIуэнум хуихъумэным ехьэлIа Iуэхугъуэхэр. «Дунейпсо адыгэ акъылылъэ». Мыбы зэхуэхьэса щыхъунущ ди лъэпкъым теухуа тхыгъэхэр, щІэныгъэлІ цIэрыIуэхэм я лэжьыгъэхэр, нэгъуэщIхэри. Дэтхэнэ цIыхуми Дунейпсо адыгэ акъылылъэм езым и Iуэху еплъыкIи къыхилъхьэфынущ. Іуэхугъуэ зэмылІэужьыгъуэхэм теухуауэ нобэ абы тхыгъи 150-рэ щызэхуэхьэсащ. «Адыгэбзэ». Ар анэдэлъхубзэр джыным и электроннэ Iэмалщ, Урысей Федерацэм щыпсэухэм я мызакъуэу, хамэ къэралхэм щыIэ ди лъэпкъэгъухэми яхуэгъэзауэ. Мы Iуэхум елэжьыну гукъыдэж зиIэ псори къадэлэжьэну къыхураджэ. «Адыгэ on-line тхылъылъэ». Ди тхакІуэхэм я лэжьыгъэхэр дуней псом тет ди лъэпкъэгъухэм абыкIэ лъагъэІэсыфынущ. Иджыпсту абы нэхъыбэу щызэхуэхьэсар епщыкIубгъуанэ лІэщІыгъуэм щыпсэуа тхакIуэхэм я къалэмыпэм къыщIэкIахэмрэ ди лъэпкъ IуэрыIуатэмрэщ. «ЛъыхъуакIуэ». Ди жагъуэ зэрыхъущи, Урыс-Кавказ зауэм адыгэ куэд зэфIигъэкIуэдащ. Зы лъэпкъым и цIыхуу а зауэм дуней псом трипхъахэр зэрыгъэгъуэтыжынырщ проектым къалэн нэхъыщхьэу зыхуигъэувыжыр. Адыгэхэм ди шхыныгъуэхэр мыкIуэдыжын папщIи проект щхьэхуэ щыIэщ. Абы ипкъ иткIэ шхыным и гъэхьэзырыкIэр видеокIэ трах. А Iуэхугъуэр гъэмахуэм и пэхэм яухыну я гугъэщ, итIанэ ар CD, DVD дискхэм тету къыдагъэкIыжынущ. Уэрэдыжьхэмрэ макъамэхэмрэ зэхуахьэсыжынурэ, ахэри цIыхубэм Iэрагъэхьэнущ. КъищынэмыщIауэ, хамэ къэрал щыпсэу адыгэхэр я адэжь Хэкум къашэурэ я нэгу зрагъэужьынущ. Накъыгъэм и 21-р адыгэхэм я фэеплъ махуэщ. Абы ирихьэлIэу ДАЗ-м хэтхэр Iуащхьэмахуэ дэкIыу лъэпкъ бэракъыр абы и щыгум щаIэтыну я мурадщ. ГъэщIэгъуэнращи, ди лъэпкъым и цIыхухэм зэгъусэу зэдэтIэту дгъэлъапIэ махуэ диIэкъым. Абы къыхэкIыу адыгэхэм я махуэ лъапIэ ягъэувыну мурад ящIащ - ар вагъуэ пщыкIутIыр зытет ди бэракъыр дунейм къыщытехьа махуэм иребгъэхьэлIэ хъуну куэдым къалъытэ, ауэ унафэ пыухыкIа иджыри тращIыхьакъым. ИщхьэкIэ зи гугъу щытщIа лэжьыгъэ псори тэмэму, нэгъэсауэ зэфIэгъэкIыныр къелъахъэ Дунейпсо Адыгэ Зэкъуэшыныгъэм мылъку къызэремэщIэкIым. Ар гулъытэ зыхуэныкъуэщ.
ЖЫЛАСЭ Замир, КъБКъУ-м и студент.
УIэгъэ
Зэманми хуэгъэхъужкъым си уIэгъэр. ЛIэщIыгъуэ дапщэ хъуауэ иIыгъ гъэру, Къыщиудыжрэ щIэрыпсу си лъы ткIуэпсхэр Гъущыж ямыIэу теткIуэу гум и къуэпсхэм. Ауэ зыпэмылъэщыр зыщ зэманыр - Абы ириудыфыркъым си гугъэр. СфIигъэкIуэдыфыркъым адэжьхэм я щIэину Къысхуагъэнауэ щыта адыгагъэр. Зэманым зэхегъэкIыр хэт и лIыгъи, Дуней хеящIэу тщIыгъущи махуэ къэскIэ. Зэман блэкIахэм япсыхьа си гугъэр Си гущIэм илъыхункIэ псэр къэмыскIэ. А гугъэм игъэхуабэу, игъэкъабзэу, Гугъуехьхэм си акъылыр ягъэжабзэу, КъыщызокIухьыр си щIыналъэм махуэ къэскIэ. Аращ зымыгъэункIыфIыр гум и хъуаскIэр. Сызэпроплъыр куэдрэ хы адрыщIкIэ, - АбыкIи щыIэщ зэджэ адыгэщIкIэ - Ахын и толъкъун уэрхэр къыщиунэщIкIэ Кхъузанэу изогъэжыр псыр псэ лъащIэм, Хэт ищIэрэ жыхуэсIэу: Псэ кхъузанэм КъизэрыхьынкIэ хъунщ зы адыгэпсэ. Хы адрыщIкIи хуабэу щопсыр дыгъэр, Хы адрыщIми щыкIуэдакъым гугъэр. Адыгэр хы адрыщIми щызокIуэ. Ауэ жэщ къэсыхукIэ Хым и щIагъым Гуузу къыщIоIукI «ИстамбылакIуэр». 2006 гъэ, мазае.
ХабзэщIэхэм япкъ иткIэ 2006 гъэм мазаем и 26-м къыщыщIэдзауэ къару егъуэт «ЦIыхухэм езыхэм я щхьэкIэ къагъэсэбэпыну хьэпшыпхэу Урысей Федерацэм и таможнэ гъунапкъэмкIэ къызэпрашхэм зыуэ щыт таможнэ пошлинэхэмрэ налогхэмрэ ятелъхьэным теухуауэ
2003 гъэм щэкIуэгъуэм и 29-м Урысей Федерацэм и Правительствэм къыдигъэкIа унафэ №718-м зэхъуэкIыныгъэхэр хэлъхьэным и IуэхукIэ» Урысей Федерацэм и Правительствэм 2006 гъэм щIышылэм и 23-м къищта унафэ №29-м.
* * * ЗэхъуэкIыныгъэхэр ехьэлIащ хьэрычэтыщI лэжьыгъэм пымыщIа цIыхухэм езыхэм я щхьэ, унагъуэ IуэхухэмкIэ къагъэсэбэпын папщIэ Урысей Федерацэм и щIыналъэм пошлинэ щIамыту кърашэ хьэпшыпхэм мардэхэр яхуэгъэувыным. Псалъэм и хьэтыркIэ, килограмм 50-м щIимыгъу икIи псори зэхэту сом мин 65-м щхьэпрымыкI уасэ зиIэ хьэпшыпхэр езым я щхьэкIэ къагъэсэбэпын мурадкIэ пошлинэхэмрэ налогхэмрэ ямыту цIыхухэм ди къэралым кърашэ хъууэ щытамэ, мазаем и 26-м и ужькIэ пошлинэхэр зыщIамыт хьэпшыпхэр килограмм 35-м нэсу ягъэмэщIэнущ, квотэ уасэр къэнэжу. ЗэхъуэкIыныгъэхэр ялъэIэсынущ цIыхухэм таможнэ гъунапкъэр зэрызэпаупщI куэдагъми. Мы зэманым льготэхэр яIэщ таможнэ гъунапкъэр тхьэмахуэ зэхуакум зэ фIэкIа зэпызымыупщIхэм. ХабзэщIэхэм япкъ иткIэ льготэхэр зыхуагъэувынур таможнэ гъунапкъэр мазэм къриубыдэу зэ нэхърэ нэхъыбэ зэпызымыупщIхэрщ. Апхуэдэ щIыкIэкIэ 2006 гъэм мазаем и 26-м къыщыщIэдзауэ зы цIыхум пошлинэхэр имыту зы мазэм хьэпшыпу килограмм 35-рэ икIи псори зэхэту зи уасэхэр сом мин 65-м щIимыгъу хьэпшыпхэр къишэ хъунущ. КъБР-м и таможнэм и пресс-IуэхущIапIэ.
Гуманитар къэхутэныгъэхэмкIэ институтымрэ “Адыгэ щIэин” фондымрэ я нэIэм щIэту дунейм къытехьащ КIэш Заремэ зэлэжьа “Танцевальная и музыкальная культура кабардинцев во второй половине ХХ века” тхылъыр. Ар Котляровхэ Мариерэ Викторрэ тхылъ тедзапIэм къыщыдэкIащ. Редакторыр тхыдэ щIэныгъэхэм я доктор Къущхьэбий Анзорщ. Адыгэхэм я къафэ щэнхабзэр зэрызэфIэувам, а гъуазджэ лIэужьыгъуэм 1940 - 1980 гъэхэм игъуэта зыужьыныгъэм, 90 гъэхэм абы ича лъэбакъуэхэм теухуащ тхылъым и япэ Iыхьэр. ЕтIуанэ Iыхьэр ар зи IэдакъэщIэкIым зыхухихар зи гугъу тщIа лъэхъэнэхэм адыгэхэм я макъамэ щэнхабзэм зэрызиужьарщ. КIэшым зэритхымкIэ, лъэпкъым и гъащIэм увыпIэшхуэ щызыубыд къафэхэм яхъумэрт псэукIэмрэ псэмрэ ехьэлIауэ цIыхубэм зэригъэпэщыфа беягъэр. Дэтхэнэ лIэщIыгъуэми, езыр зыхуэныкъуэм, и зыужьыныгъэр здынэсам елъытауэ къигъэщIырт къафэ “тхыпхъэщIыпхъэхэр”, макъамэхэр. ЦIыхухэм, цIыхумрэ ар къэзыухъуреихь дунеймрэ я зэхущытыкIэр къыхощ къафэ, макъамэ гъуазджэм. ИСТЕПАН Залинэ.
|
|
|||||||||||
|
ссылки |
къыдэкIыгъуэхэр |
|||||||||||
|
|
|
Copyright © 2005 Buch e-mail: [email protected] |
|
|
||||||||
|
|
||||||||||||
А псори зэрекIуэкIым щыгъуазэ зыщІыныр нэхъ тынш хъун папщІэ интернетым сайт къыщызэІуахащ: www.adygaunion.com. Абы итхэр цIыху псоми къагурыIуэн папщIэ тхыгъэхэр бзитхукIэ ягъэхьэзыр: адыгэбзэкIэ, урысыбзэкIэ, инджылызыбзэкIэ, нэмыцэбзэкIэ, тыркубзэкIэ.
