ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ

		*ФИФI ФЫМЫГЪЭПУД, ФИ IЕЙ ФЫМЫГЪЭПЩК*IУ
	АДЫГЭ ПСАЛЪЭ
КъБР-м И ПАРЛАМЕНТЫМРЭ ПРАВИТЕЛЬСТВЭМРЭ Я ГАЗЕТ
	сайт газеты «Адыгэпсалъэ» 2006 гъэм мазаем и 10
	газетыр 1924 гъэм и мэкъуауэгъуэ мазэм и 1 лъандэрэ къыдокI
ХЪЫБАРЫЩIЭХЭР ТХЫДЭ ХЪЫБАРЕГЪАЩIЭ ТХЫГЪЭХЭР АРХИВЫР	english				адыгэбзэ	русский
	ИлъэсиплI къэс зэ Мазаем и 10-м Турин гуфIэгъуэкIэ къыщызэIуах ХХ ЩIымахуэ Олимп джэгухэр. Ди олимпийцхэм я пашэу щытыну хуагъэфэщащ лъэрыжэкIэ къызэдэжэнымкIэ зэфIэкIышхуэ къэзыгъэлъэгъуа Дорофеев Дмитрий - аращ Урысей Федерацэм и къэрал ныпыр зыхьынур. Сыт щыгъуи хуэдэу, Олимп джэгухэр ехьэжьауэ къызэIуахынущ. Абы кърихьэлIэнущ къэрал куэдым я унафэщIхэр, спортсмен лъэрызехьэхэр, турист минхэр. Итальян уэрэджыIакIуэ цIэрыIуэ Паваротти Лучано олимп зэщIэхъееныгъэм и гимныр игъэзэщIэнущ. Олимпиадэр гуфIэгъуэкIэ къызэIуаха и ужькIэ, спорт зэпеуэхэм щIадзэнущ икIи щэбэтымрэ тхьэмахуэмрэ япэ чемпионхэр наIуэ хъунущ. Дауи, куэдкIэ дащогугъ зи зэфIэкIыр сыт щыгъуи ин ди спортсменхэм. Турин щыщIэзыдзэ Олимп Джэгухэм Урысей Федерацэм и хьэрхуэрэгъу лъэщхэр нэхъыбэж зэрыщыхъунум шэч хэлъкъым. Америкэм и Штат Зэгуэтхэм, Швецием, Финляндием, Германием, Норвегием, Франджым, нэгъуэщI къэралхэми я спортсменхэм ар наIуэ къыщытщащIащ илъэсиплI и пэкIэ Солт-Лейк-Сити америкэ къалэм щыIа Олимпиадэм. Иджыри ахэр къызэримыкIуэтынур гурыIуэгъуэщ. АрщхьэкIэ ди къэралми и плъапIэхэр мащIэкъым - медаль 25-рэ мынэхъ мащIэ. Псом хуэмыдэу дыщогугъ лъэрыжэкIэ къызэдэжэным, биатлоным, лъэрыжэкIэ фигурнэу къэжыхьыным. Иужьрей илъэсхэм дыкъагъэщIэхъуми, Урысей Федерацэм хоккеймкIэ и командэ лъэщ иджы зэхуэшэса хъуащ - хэт ищIэн, ари Олимп Джэгухэм и дыщэ медалхэм щIэбэныфыну къыщIэкIынщ. А псори тхьэмахуитIкIэ екIуэкIыну зэпеуэхэм къагъэлъэгъуэнщ. Жыласэ Заур. Иджы хуэдэ икIагъэ нэхъапэхэм зэи ялэжьакъым Данием, иужькIэ Норвегиемрэ Франджымрэ я прессэм бегъымбарым и карикатурэхэр зэрытрадзар бзаджэнаджагъэ дыдэщ, жиIащ КъБР-м и Муслъымэнхэм я IуэхущIапIэм и унафэщI ПщыхьэщIэ Iэнас. А псоми дунейм тет муслъымэнхэр къамыгъэлыбынкIэ Iэмал иIакъым. А ауаныщI сурэтхэр зэрытрадзар икIагъэу зэрыщытыр ислъам зыIыгъхэм я мызакъуэу, уеблэмэ католикхэми, чыристанхэми, нэгъуэщI динхэм я телъхьэхэми жаIащ. Абы игъэгубжьащ дунейпсо интеллигенцэмрэ жылагъуэмрэ. Ялэжьар хьэдэгъуэдахэщ. Уеблэмэ Инджылми жеIэ: «Сыт хуэдэ гъэпудыныгъэри къыпхуэгъунущ, арщхьэкIэ цIыхухэм къахуэгъунукъым Тхьэр ягъэпуду». Дунейм псори щыIащ: зауэхэри, зэхэкъутэныгъэхэри, факъырагъэри, зэрыпхъуэныгъэхэри, ауэ иджы хуэдэу жылагъуэ икIагъэ нэхъапэм зэи ялэжьакъым. Мыпхуэдэ нэхъапэм цIыхум и тхыдэм къыщыхъуакъым. Хэт сыт хуейми итхыну зэрыхуитымкIэ зыщIауфэурэ зыри ириджэгу хъунукъым муслъымэн мелардым щIигъум я гурыщIэхэмрэ абыхэм ягъэлъапIэхэмрэ. Дэ демократием дрителъхьэщ, ислъамым и хабзэхэми пщIэ хуащI хуитыныгъэм, ауэ мы къэхъуар цIыхухэр, динхэр зэщызыгъэIеин, зыгъэпуд мыхъумыщIагъэщ. Къэбэрдей-Балъкъэрым и Муслъымэнхэм я IуэхущIапIэм и унафэщIу, муфтийуэ сыщыткIэрэ, сэ дунейпсо жылагъуэм, карикатурэхэр къыщытрадза къэралхэм я Iэтащхьэхэм республикэм щыпсэу муслъымэн псоми я цIэкIэ захуэзгъэзэну сыхуейщ: муслъымэн мамырхэмрэ зи щхьэр къэзыIэта щIэпхъаджащIэхэмрэ, муслъымэн мамырхэмрэ лъы зыгъажэ бзаджэнаджэхэмрэ зэхуагъадэ хъунукъым. Абы и зэранкIэ муслъымэнхэр Iумпэм ящI хъуащ. Сэ къызогъэув Данием и правительствэм и Iэтащхьэри, мы Iуэху фIейр дэзыIыгъа къэралхэм я унафэщIхэри дунейм и муслъымэн псоми хуагъэгъуну елъэIун, а хабзэншагъэр зылэжьахэр жэуап ткIийм ирашэлIэн хуейуэ. МАХЪШОКЪУЭ Мухьэмэд. Урысейр ягъэкъуаншэ Сыхъум. Грузием и лIыкIуэу ООН-м щыIэ Адамие Реваз Урысей Федерацэр игъэкъуэншащ, Абхъазым щыпсэуа куржыхэм геноцид ярищIылIауэ, лъапсэрых зауэ щIыналъэм щригъэкIуэкIауэ жиIэри. Грузием и лIыкIуэм къыхигъэщащ лъэпкъ зэпэщIэувэныгъэхэр Абхъазым къыщежьам щыгъуэ куржыуэ цIыху мин 300 щIыналъэм къызэрырахуар, мини 10-м нэблагъэ зэраукIар. Абы къыхэкIыу ООН-р къыхуриджащ абхъаз-куржы щIыналъэхэм мамырыгъэр щызэтезыIыгъэу щыIэ урысей сэлэтхэр нэгъуэщI къэралым щыщхэмкIэ зэрахъуэкIыну. Адамие Реваз и жэрдэмыр ООН-м зэкIэ жэуапыншэу къигъэнащ. Грузиер Урысей Федерацэм иужьрей илъэсым фIы дыдэу къыхущыткъым. Ауэ иджырей псалъэмакъыр нэхъыбэу къызэрыкIар куржыхэм я деж газыр зэрыкIуэ бжьэмийр къагъауэу цIыхухэр хуабэншэу къызэрагъэнарщ. АбыкIэ Урысейри ягъэкъуэншащ. «Путиным мызэ-мытIэу жиIащ урысхэмрэ куржыхэмрэ зэрызэкъуэшыр, сыт и лъэныкъуэкIи Грузием дэIэпыкъуну Урысей Федерацэр зэрыхьэзырыр. Зы лъэныкъуэкIэ ар узэрыгушхуэнщ. Ауэ, нэгъуэщIу уеплъмэ, щIымахуэ жьычым зы къуэшым адрей и къуэшыр унэ щIыIэм къыщIинэркъым, электротокыр пичыркъым», - жиIащ Грузием и парламентым и комитетым и тхьэмадэ Бакрадзе Давид. Путин Владимир Щэумэным йодаIуэ Мейкъуапэ. *Адыгейм и УнафэщI Щэумэн Хьэзрэт иджыблагъэ Москва щыIущIащ Урысей Федерацэм и Президент Путин Владимир.* Щэумэн Хьэзрэт къэралым и лIыщхьэр щигъэгъуэзащ 2005 гъэм Адыгейм иригъэкIуэкIа социально-экономикэ Iуэхугъуэхэм къарикIуахэм, зыхунэмысу къэнахэм, къапэщылъ къалэнхэм. Путин Владимир фIэгъэщIэгъуэну едэIуащ республикэм щыIэ щытыкIэм теухуауэ Щэумэным жиIахэм. Псалъэм папщIэ, щIыналъэм къыщIигъэкI промышленнэ, мэкъумэш продукцэхэм, цIыхухэм я улахуэм хэхъуэ зэпытщ, лэжьапIэ IэнатIэщIэхэр, IуэхущIапIэщIэхэр къызэIуах. Щэумэн Хьэзрэт тепсэлъыхьащ республикэм щаухуэ курыт еджапIэхэм, сымаджэщхэм, жылагъуэхэм газ зэрырашалIэ щIыкIэм. Абы УФ-м и Президентым гу лъригъэтащ Краснодар, Шапсыгъ псы хъумапIэхэм къашэ гугъуехьхэм, Мейкъуапэрэ Дыгъэмысрэ зэпызыщIэ автомобиль гъуэгур ухуэным ехьэлIа Iуэхугъуэхэм. Хьэщыкъуей Олег. Тыркум трагъазэ Мазаем и 8-м Налшык и «Спартакыр» Тыркум кIуащ, Урысей Федерацэм футболымкIэ и премьер-лигэм мы гъэм щекIуэкIыну зэхьэзэхуэм зыхуэгъэхьэзырыным пищэну. Футболистхэр абы тхьэмахуитIкIэ щыIэнущ. Нартсанэ къикIыжа и ужькIэ ди командэм и унафэщIхэм яутIыпщыжащ зыкIэлъыплъахэу Дериглазовыр, Буклеевыр (тIури Самарэ и «Крылья Советовым» и дублым щыщщ), Билялетдиновыр (Кострома и «Спартак»), Нефедовыр (Одессэ и «Черноморец»). Ди жагъуэ зэрыхъущи, абыхэм яхэтщ иджыпсту Хабаровск и «СКА-Энергием» щыщ ХъуакIуэри. Я Iэзагъым щыкIэлъыплъыну Тыркум здашащ Краснодар и «Кубаным» и футболистхэу Тонгэ, Такам, Джефтон. КъищынэмыщIауэ, ди «Спартакым» хэту адэкIи загъэхьэзырынущ гъуащхьэтетхэу Чихрадзерэ Кращенкэрэ, гъуащхьэхъумэхэу Заруцкэм, Мостовой, Скворцов, Битокъум, Бердыевым, Джудович, Иванов, Кокоевым, гъуащхьэхъумэныкъуэхэу Мэшыкъуэм, Къудейм, Ксанаевым, Гогуа, Хинчаговым, Ходжавэ, Ланько, Балэм, Пилипчук, Тарловскэм, Смирнов, гъуащхьауэхэу Къуныжьым, Порошиным, Оганян, Гуртуевым, Корчагиным. «Спартак» футбол клубым и генеральнэ директор Балэ Владимир зэрыжиIамкIэ, командэм хагъэхьэн папщIэ иджыри зыми контракт иращIылIакъым. А Iуэхур нэхъыбэу щызэфIэкIынур Тыркум къикIыжа иужькIэу къыщIэкIынущ. Ди командэм а щIыпIэм зэныбжьэгъугъэ зэIущIэхэр щыдригъэкIуэкIынущ Польшэмрэ Украинэмрэ я лигэ нэхъыщхьэхэм щыджэгухэу Краков и «Вислам», Запорожье и «Металлургым», Харьков и «Харьковым», нэгъуэщIхэми. Къаудыгъу Заурбэч. «Спартакым» и дублыр гъуэгу тоувэ Мазаем и 13-м къыщыщIэдзауэ и 24 пщIондэ «Спартакым» и дублым Тырныауз зыщигъэсэнущ. Командэм и тренер нэхъыщхьэ Гъубж Вячеслав къызэрыджиIамкIэ, абы топджэгу 26-рэ хэтщ. Гъатхэпэм и 1-14-хэм «Спартакым» и дублыр Сочи кIуэнущ. Абы командэм зэныбжьэгъугъэ зэIущIэ зыбжани щригъэкIуэкIынущ. Тренерхэм я къалэн нэхъыщхьэщ премьер-лигэм щыджэгуну ди «Спартакым» и щIэблэ ягъэхьэзырыну. Гъубжым къызэрыхигъэщамкIэ, илъэситI-щы дэкIмэ, ди республикэм и командэ нэхъыщхьэм хэбгъэхьэ хъун топджэгухэр щIалэщIэхэм яхэтщ. ХЬЭЩЫКЪУЕЙ Олег.
	ссылки		ГАЗЕТЫМ И ЛЭЖЬАКIУЭХАР				къыдэкIыгъуэхэр
				Copyright © 2005 Buch e-mail: [email protected]

АДЫГЭ ПСАЛЪЭ