ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ

АДЫГЭ ПСАЛЪЭ

КъБР-м

 И ПАРЛАМЕНТЫМРЭ ПРАВИТЕЛЬСТВЭМРЭ

Я ГАЗЕТ

сайт газеты «Адыгэпсалъэ»

2006 гъэм мэлыжьыхьым (апрелым)и1

газетыр 1924 гъэм и мэкъуауэгъуэ мазэм и 1 лъандэрэ къыдокI

ХЪЫБАРЫЩIЭХЭР

ТХЫДЭ

ХЪЫБАРЕГЪАЩIЭ

ТХЫГЪЭХЭР

АРХИВЫР

english

адыгэбзэ

русский

Хьэрычэт IуэхумкIэ Къэбэрдей-Балъкъэр Республикэм и

Президентым и деж щыIэ советым теухуауэ

Къэбэрдей-Балъкъэр Республикэм и Президентым и Указ

   Бизнесым и IэнатIэм хуэгъэза къэрал политикэр тэмэму пхыгъэкIын, хьэрычэт Iуэхур къэралым зэрыдиIыгъ Iэмалхэмрэ хэкIы­пIэхэмрэ егъэфIэкIуэн, апхуэдэу ахэр лэжьэн папщIэ щытыкIэфI Къэбэрдей-Балъкъэр Республикэм къащыхузэгъэпэщын мурадкIэ унафэ сощI:

   1. Хьэрычэт IуэхумкIэ Къэбэрдей-Балъкъэр Республикэм и Президентым и деж щыIэ советым теухуа Положенэмрэ а советым хэтхэмрэ мы Указым зэрыщIыгъум хуэдэу къэщтэн .

   2. Къару ямыIэжу къэлъытэн:

   «Хьэрычэт IуэхумкIэ Къэбэрдей-Балъкъэр Республикэм и Президентым и деж щыIэ советым теухуауэ» 2002 гъэм накъыгъэм и 2-м Къэбэрдей-Балъкъэр Республикэм и Президентым къыдигъэкIа Указ №55-м;

   «Хьэрычэт IуэхумкIэ Къэбэрдей-Балъкъэр Республикэм и Президентым и деж щыIэ советым теухуауэ» 2004 гъэм мазаем и 13-м Къэбэрдей-Балъкъэр Республикэм и Президентым къыдигъэкIа Указ №41-УП-м;

   Къэбэрдей-Балъкъэр Республикэм и Президентым 2004 гъэм мазаем и 13-м къыдигъэкIа Указ №41-УП-мкIэ «Хьэрычэт IуэхумкIэ Къэбэрдей-Балъкъэр Республикэм и Президентым и деж щыIэ советым хигъэхьахэм ящыщхэр зэхъуэкIыным теухуауэ» Къэбэрдей-Балъ­къэр Республикэм и Президентым 2004 гъэм мэкъуа­уэгъуэм и 9-м къыдигъэкIа Указ №68-УП-м;

   «Хьэрычэт IуэхумкIэ Къэбэрдей-Балъкъэр Республикэм и Президентым и деж щыIэ советым хэтхэм ящыщхэр зэхъуэкIыным теухуауэ» Къэбэрдей-Балъкъэр Республикэм и Президентым 2005 гъэм мэлыжьыхьым и 6-м къыдигъэкIа Указ №20-УП-м.

   3. Мы Указым къару егъуэт Iэ щыщIэздза ма­хуэм щегъэжьауэ.

Къэбэрдей-Балъкъэр Республикэм и

   Президент             Къанокъуэ Арсен

Налшык къалэ

2006 гъэм гъатхэпэм и 23-м

№36-УП

ЛIыс Мухьэмэд ягъэлъапIэ

   Урысей Федерацэм и Президентым 2006 гъэм гъатхэпэм и 19-м къы­дигъэкIа Указ №228-мкIэ “Урысей Федерацэм щIэныгъэмкIэ щIыхь зиIэ и лэжьакIуэ” цIэ лъапIэр къы­фIащащ щIэныгъэхэм я доктор, профессор, “Бгы   лъагэ геофизикэ институт” къэрал IуэхущIапIэм и къудамэм и унафэщI ЛIыс Мухьэмэд Индрис и къуэм.

Жыджэрхэр ягъэпажэ

   Гъатхэпэм и 30-м Урысей ахъшэ хъумапIэ банкым и Къэбэрдей-Балъкъэр къудамэм зэIущIэ гуапэ щекIуэ­кIащ.

   Урысей ахъшэ хъумапIэ банкым Кавказ Ищхъэрэм щиIэ и къудамэхэм 2005 гъэм ядригъэкIуэкIа зэпеуэ-еп­лъыныгъэм ди республикэ къудамэм ещанэ увыпIэр къыщихьащ, апхуэдэуи “Те­кIуэныгъэм ерыщу зэрыщIэбэным папщIэ” унэтIыны­гъэм пашэныгъэ щызыIэри­гъэхьащ. Абы къыхэкIыу къы­хуагъэфэща жэз кубокымрэ щIыхь тхы­лъымрэ къудамэм и тхьэмадэ Урысбий Хьэмидбий къритыжащ Урысей ахъшэ хъумапIэ банкым Кавказ Ищхъэрэм щиIэ банкым и правленэм и Iэтащ­хьэм и къуэдзэ Артамонов Игорь.

   Абы жиIащ ди республикэм щыIэ банкым узыгъэгушхуэ лэжьыгъэ купщIафIэ зэрыри­гъэкIуэкIыр, къызэдакIуа илъэ­си 5-м къриубыдэу, гу­гъуехь гуэрхэм ирихьэлIами, лъагапIэщIэхэр зыIэрагъэ­хьэу къызэрыгъуэгурыкIуэр. Ставрополь къикIа хьэ-     щIэр банкым и лэжьакIуэхэм ехъуэ­­хъуащ, я ехъулIэ­ны­гъэхэм хэхъуэ зэпыту екIуэ­кIыну зэригуапэр жиIащ.

   - Ди лэжьыгъэр хъарзынэу зэтеубла зэрыхъуар къегъэ­лъагъуэ нобэрей махуэм, - жиIащ Урысбий Хьэмидбий. - Ар зи фIыщIэр нэхъыфIым щIэкъуу, япэкIэ плъэуэ къыдбгъэдэт ди лэжьэгъухэрщ. Мыпхуэдэ текIуэныгъэхэм жэзыр и къыщIэдзапIэу аращи, дыщэ кубокри зэ­ры­зыIэрыдгъэ­хьэным дыху­щIэкъунщ.

   2005 гъэм банкымрэ хьэрычэт лэжьыгъэ цIыкIум пэрыт и лэжьэгъухэмрэ я зэпыщIэныгъэр гъэбыдэн папщIэ, Урысей ахъшэ хъумапIэ банкым и Кавказ Ищхъэрэ къудамэм иригъэкIуэкIа зэпеуэм щытекIуахэм щIыхь тхылъхэр иратыжащ. “Хьэрычэт лэжьыгъэ цIыкIум щыпашэ” унэ­тIы­ныгъэм текIуэныгъэ къыщихьащ щхьэзакъуэ хьэрычэтыщI ЛIуп Аслъэн, “Нэхъ зэфIэкIышхуэ зиIэ лэжьэгъу” унэ­тIыныгъэм япэ увыпIэр щиубыдащ щхьэзакъуэ хьэ­ры­чэтыщI Мэртазэ Ахъмэт, “Жыджэрагъ зыхэлъ лэжьэгъу” унэтIыны­гъэм щытекIуащ “Денеб” ООО-м и унафэщI Шыбзыхъуэ Мухьэмэд.

НэщIэпыджэ Замирэ.

Сурэтыр КЪУЩХЬЭ Чэлим трихащ

Хьэрычэт IуэхумкIэ Къэбэрдей-Балъкъэр

Республикэм и Президентым и деж щыIэ

советым хэтхэр:

   Къанокъуэ А. Б. - Къэбэрдей-Балъкъэр Республикэм и Президентыр (Советым и тхьэмадэщ)

   Ажахъуэ Къ. М. – «Бум-Банк» ООО коммерческэ банкым и правленэм и унафэщIыр, Къэбэрдей-Балъкъэр Республикэм и коммерческэ зэгухьэны­гъэхэм я союзым («Налшык» бизнес-клубым) и тхьэмадэр (зэгурыIуауэ)

   Бахъсэн С. А. - Къэбэрдей-Балъ­къэр Республикэм и Президентым и чэн­джэщэгъур (Советым и секретарщ)

   Быф А. Ж. – «Минерал-плюс» ООО-м и генеральнэ директорыр, Къэбэрдей-Балъкъэр Республикэм и Парламентым и депутатыр (зэгурыIуауэ)

   Бышэн А. А. - Къэбэрдей-Балъ­къэр Республикэм финансхэмкIэ и минист­рыр

   Болэ А. Р. – «КапиталЪ Медицинэ стра­хованэ» акционер обществэ зэ­хуэщIам и Къэбэрдей-Балъкъэр Iуэху­щIапIэм, «КапиталЪ Страхованэ» акционер обществэ зэIухам и Къэбэрдей-Балъкъэр IуэхущIапIэм я гъэзэщIакIуэ директорыр (зэгурыIуауэ)

   Бутерус Р. Э. – «Кавказкабель» кабель завод» акционер обществэ зэхуэ­щIам и генеральнэ директорыр, Къэбэрдей-Балъкъэр Республикэм и Парламентым и депутатыр (зэгурыIуауэ)

   Геккиев З. Д. - Къэбэрдей-Балъ­къэр Республикэм и Парламентым Экономикэ политикэмкIэ и комитетым и унафэщIыр (зэгурыIуауэ)

   Говоров С. А. – Петровхэ я цIэ­кIэ щыIэ колхозым и унафэщIыр, Къэбэрдей-Балъкъэр Республикэм и Парламентым и депутатыр (зэгу­рыIуауэ)

   Гупзешэ А. Хь. – «Тэрчокъуэм и цIэр зезыхьэ цIыхубэ предприятэ» акционер обществэ зэхуэщIам и унафэщIыр (зэгурыIуауэ)

   Къаздэхъу А. Б. – «Нарткъалэ спирт завод» акционер обществэ зэIухам и генеральнэ директорыр (зэгурыIуауэ)

   Къылъшыкъуэ А. И. - «Росгосстрах-Юг» - Къэбэрдей-Балъкъэр Республи-  кэм щыIэ Управленэ ООО-м и къудамэм и унафэщIыр, хьэрычэт Iуэху мыиныр дэIыгъынымкIэ «ЩIэгъэ­къуэн» урысейпсо жылагъуэ Iуэху­щIа­пIэм и щIыналъэ къудамэм и Iэтащ­хьэр (зэгурыIуауэ)

   Къуэжьокъуэ А. Ж. - «Налшык» уни­вермаг» акционер обществэ зэIу­хам и директорыр, хьэрычэт Iуэху мыи­­нымрэ хьэрычэт Iуэху курытымрэ я лэжьакIуэхэм я профессиональнэ союзым и Къэбэрдей-Балъкъэр республикэ комитетым и тхьэмадэр (зэгу­рыIуауэ)

   Къудэлий М. Хь. – «Налшык» хьэл­вэ завод» акционер обществэ зэIухам и генеральнэ директорыр, Къэбэрдей-Балъкъэр Республикэм и Парламентым и депутатыр (зэгурыIуауэ)

   Къуршэ В. Ч. - Къэбэрдей-Балъ­къэр Республикэм и хьэрычэт лэжьакIуэхэм я союзым и правленэм и тхьэмадэр (зэгурыIуауэ)

   Мэремкъул К. Н. – «Минерал» ООО-м и директорыр (зэгурыIуауэ)

   Мокаев Р. Д. – «Шэрэдж -1» ООО-м и директорыр (зэгурыIуауэ)

   Мусуков А. Т. - Къэбэрдей-Балъ­къэр Республикэм экономикэ зыужьыны­гъэмрэ сатумкIэ и министрыр

   Овсянников В. Г. – «Къэббалъкъгипс» ООО-м и генеральнэ директорыр (зэгурыIуауэ)

   Пономаренкэ Р. Н. – «Электрон» ООО-м и директорыр (зэгурыIуауэ)

   Синеглазов С. В. – «Гидрометаллург» акционер обществэ зэIухам и ге­не­ральнэ директорыр, Къэбэрдей-Балъ­къэр Республикэм и Парламентым и депутатыр (зэгурыIуауэ)

   Тау П. Къ. - Къэбэрдей-Балъкъэр Республикэм и профессиональнэ союзхэм я зэгухьэныгъэм и тхьэмадэр, Къэбэрдей-Балъкъэр Республикэм и Парламентым и депутатыр (зэгурыIуауэ)

   Ткаченкэ А. А. – Федеральнэ налог IуэхущIапIэм и Управленэу Къэбэрдей-Балъкъэр Республикэм щыIэм и унафэщIыр (зэгурыIуауэ)

   ЛIэужь А. Б. - «Тэрчалмаз» акционер обществэ зэIухам и генеральнэ директорыр, Къэбэрдей-Балъкъэр Республикэм и Парламентым и депутатыр (зэгурыIуауэ)

   Тхьэзэплъыж М. ТI. - Къэбэрдей-Балъкъэр Республикэм и Правительст­вэм и УнафэщIым и япэ къуэдзэр

   Урысбий Хь. Хь. – Урысей Федера­цэм и ХъумапIэ банкым и Кавказ Ищхъ­эрэ банкым и Къэбэрдей-Балъкъэр къудамэ №8631-м и унафэщIыр (зэгурыIуауэ)

   Шыбзыхъуэ М. Б. - «Денеб» ООО-м и генеральнэ директорыр, опт сатум и IуэхущIапIэу Къэбэрдей-Балъкъэр Республикэм щыIэхэм я ассоциацэм и президентыр, Къэбэрдей-Балъкъэр Республикэм и Парламентым и депутатыр (зэгурыIуауэ)

   Щоджэн Р. М. – «Агро-плюс» ООО-м и генеральнэ директорыр (зэгуры­Iуауэ)

   Эндреев Б. А. – «Налшык» ООО банкым и правленэм и тхьэмадэр, Къэбэрдей-Балъкъэр Республикэм и банкхэмрэ страховщикхэмрэ я ассоциацэм и президентыр, Къэбэрдей-Балъкъэр Республикэм и Парламентым и депутатыр (зэгурыIуауэ)

   Ерчэн Т. Хъу. – «ЗЭТ» концерным и генеральнэ директорыр, «Къэбэрдей-Балъкъэр Республикэм и промышленникхэмрэ хьэрычэтыщIхэмрэ я союз» щIыналъэ зэгухьэныгъэм и президентыр (зэгурыIуауэ).

Ди къуэш республикэм

Хэплъэну къагъэгугъэ

   Мейкъуапэ. Адыгейм щы­Iэ «Шэрджэс конгрессым» Европэ Зэгухьэны­гъэм хуигъэхьа тхыгъэм и жэуап къыIэрыхьэжащ. Ар теухуауэ щытащ республикэм и статусым ехьэлIауэ ирагъэкIуэ­кIы­ну кърахьэжьа референ­ду­мым.

   Европэ зэгухьэныгъэм къигъэхьыжа тхыгъэм итщ «Шэр­джэс конгрессыр» зыгъэпIейтей Iуэхугъуэхэм мыгувэу зэрыхэплъэнур, икIи Адыгейм нобэ щыIэ щы­тыкIэм теухуа хъыбар зэра­Iэ­рыхьамкIи фIыщIэ ин къыхуащI.

Я еплъыкIэр зэтехуэркъым

      Сыхъум. Куржы-аб­хъаз зэпэщIэувэныгъэр зэтес щIыжынымкIэ Грузием и Президентым и чэнджэщэгъуу Аласание Ираклий зэрагъэувам Абхъазым псалъэмакъ зэтемыхуэхэр къыщишащ.

   АБХЪАЗЫМ нэгъуэщI къэрал IуэхухэмкIэ и министр Шамбэ Сергей къызэри­лъы­тэмкIэ, Аласание Ираклий цIыху тэмэмщ, удэлажьи хъунущ. Апхуэдэ гупсысэхэр иIэщ Шынагъуэнша­гъэмкIэ Советым и унафэщI Лакобэ Станислави. «Си деж­кIэ абы и кандидатурэр къезэгъщ. ЗэрысщIэмкIэ, зэ­хэщIыкI зиIэ цIыхущ ар», - жиIащ абы.

   ЩIыпIэ Парламентым и де­путат Ачугбэ Теймураз абыкIэ арэзыкъым: «Абхъазымрэ Грузиемрэ я зэху­щытыкIэр Саакашвилищ зэ­лъытар. Аласание чэнджэщэгъуу зэрагъэуву куржы журналистхэм хъыбар зэбграгъэхащ абы и адэр Аб­хъазым щаукIа хуэдэу. А цIы­хум фIы къытхуихьыну­къым».         

Хабзэр къызэпауд

   Черкесск. Къэрэшей-Шэрджэсым и ХэхакIуэ комиссэм иджыблагъэ Республикэм и Суд Нэ­хъыщхьэм кассационнэ тхьэусыхафэ хуигъэ­хьащ.

   «Интерфаксым» къызэ­ри­тамкIэ, абы и щхьэусы-гъуэр Карачаевск районым и унафэщIыр хэхыным теухуауэ иджыблагъэ куейм щекIуэкIа хэхыныгъэхэм ныкъусаныгъэ куэд зэрыхалъэгъуарщ. КъШР-м и ХэхакIуэ комиссэм а хэхыныгъэхэр екIуэкIауэ къилъытэркъым.

Хьэщыкъуей Олег.

Академием и гуащэ Iулыдж Мадинэ

   Ди республикэм иужь зэманым мардэ щыхъуащ пщащэ нэхъ дахэр къыхэхынымкIэ студент зэпеуэхэр. Мызыгъуэгум еджапIэ нэхъыщхьэм и гуащэр къыхэхыныр щекIуэкIар Къэбэрдей-Балъкъэр къэрал мэкъумэш академиерщ. А зэпеуэм псом нэхърэ нэхъ дахэу къыщалъытар, “Академием и гуащэ-2006” зыфIащар мы сурэтым щыфлъагъу, а еджапIэм и 4-нэ курсым щеджэ Iулыдж Мадинэщ (я кум дэтщ).

Сурэтыр ТОЛГУРОВ Камал трихащ.

“Алмэстыхэр” утыку къохьэ

   ЩоджэнцIыкIу Алий и цIэр зезыхьэ адыгэ драмтеатрым лэжьыгъэщIэ ща­гъэ­лъэгъуащ: режиссер Дзудтагов Казбек игъэуващ “Алмэстыхэр” спектаклыр, дагъыстан тхакIуэ Абу-Бакар Ахъмэтхъан и “Снежные люди” повестым къытращIыкIар.

   Спектаклым къыщы­гъэ­лъэгъуар 1960 гъэхэм бгырыс къуажэ цIыкIум къыщыхъуа Iуэхугъуэщ. Абы хэт лIыхъужьхэм я Iуэху бгъэдыхьэкIэмкIэ, я ду­ней тетыкIэмкIэ, я зэху­щытыкIэмкIэ я щыIэкIэ-псэукIэр, къуажэдэсхэр нэхъ зыгъэгузавэ Iуэху­гъуэ­­хэр, нэгъуэщIхэри на­Iуэ къохъу. А псор уи нэгу къыщIагъэувэу спектаклым щоджэгу театрым и артистхэу Хъыдзэдж Борис (Алий-Хужьэ), КIэмыргуей Валентин (Къарэ-Хьэртун), Жэнэтей Марьянэ (ХьэIишэт), Хьэщэ Къанщобий (Хьэжбэчыр), Хьэмырзэ Ахьмэд (Хьэмзэт), КIарэ Ларисэ (Хьэуа), Лу Рэмэзан (Iэдэм), Бозий Рустам (Рэджаб) сымэ.

   “Алмэстыхэр” комедием щIэлъ гупсысэм зиужьын щIедзэ япэ дакъикъэм щы­щIэдзауэ. Спектаклым ще­кIуэкI Iуэхугъуэхэр псори къытхуэзыIуатэ Алий-Хужьэ утыкум къохьэри, зы­ми ямылъэгъуа, ауэ псоми зэрыщытыр ящIэ алмэстым и гугъу кIэщIу къыт­хуещI. Спектаклыр зытеухуар гурыIуэгъуейкъым, хэтхэм я зэхущытыкIэр IупщIщ, зэпадзыж псалъэ шэрыуэхэм щIагъыбзэ да­хэ, гушыIэ щIэлъщ. ГъэщIэ­гъуэнщ икIи узыгъэды­хьэшхщ Хьэжбэчыррэ Хьэуарэ я зэхущытыкIэр, а зэ­щхьэгъусэхэр зыхэт теп­лъэгъуэхэр. Хьэжбэчыр ефэндыр и гъусэу Iэнэм здыпэрысым, Хьэуа къихьа лэпс пщтырым ес. Абы къигъэгубжьа Хьэжбэчыр жиIэнкIэ Iэмал зимыIэ псалъэхэр къыжьэдокI. Ар зэхэзыха ефэндыр зыхуеиххэр арати, Хьэжбэчыр и щхьэгъусэм нэгъуэщI лIым нэчыхь хуригъэтхыу зы жэщ нэхъ мыхъуми, абы деж щыIэн хуейуэ, армырамэ, и щхьэгъусэм дэпсэу мыхъуну жеIэ. Гуимыхужу мэ­джэгу Хьэуа и ролыр зы­­­гъэ­­­защIэ КIарэ Лариси  абы “пIалъэкIэ” щхьэгъусэ хуэхъу Iэдэми (Лу Рэмэзан). Иужьрейр къуажэ жьа­кIэупсщ, щIыбыкъэ нэ­джэIуджэщ. ИтIани, и унэм къашэу къыхущIагъэтIыс­хьа Хьэжбэчыр и щхьэгъусэр псалъэ дахэхэмкIэ къыдехьэх, ар и лIым иримытыжынуи мурад ещI. Зы лъэ­ныкъуэкIэ къыщытщ Хьэжбэчыррэ Iуэхум хэу­ны­кIыну мурад зыщIа ефэн­дымрэ, адреймкIэ - Iэдэмрэ абы и дуней тетыкIэр зы­фIэгъэщIэгъуэнхэмрэ.

   Зэ еплъыгъуэкIэ Хьэуа унэ­гуащэр зэрыщытын, цIыхухъум пщIэуэ хуэщIын хуейр къэзыгъэлъагъуэу къыпщохъу. ИтIанэми, Хьэж­­бэчыррэ Iэдэмрэ я кум зэрыдэтым, щхьэусыгъуэхэр къигупсысурэ и лIым деж игъэзэжыну хуэмейуэ къы­зэрыщIэкIым нэгъуэщIхэми урегъэгупсыс.

   Дзудтаговым игъэува лэжьыгъэм и кIэм нэс уеплъа нэужь, наIуэ мэхъу: спектаклым и гупсысэ нэхъыщхьэр бгылъэ щIыпIэр къа­гъа­нэу къуажэдэсхэр тафэм къэIэпхъуэн зэрыхуеярщ. Пэжщ, апхуэдэу языныкъуэхэм ящIащ, къуажэм къыдэнар къыщалъхуа жы­лэжьыр зи гум пымы­кIа­­хэрщ. Спектаклым къызэрыхэщщи, къуажэр ягъэ­Iэпхъуэн щхьэкIэ Iэмал зыбжанэ къагъэсэбэп, уеблэмэ а щIыпIэм алмэстыхэр щыпсэууэ жаIэ.

   Хьэжбэчыр и щхьэгъусэр Iэдэм зэрыримытыжам къыхэкIыу а тIум я кум хьэлэбэлыкъ къыдохъуэ, зэрызехьэурэ Iэдэм кIийуэ бгым щоху. Ар псоми лIа я гугъэщ. Ауэ а махуэм щы­щIэдзауэ къуажэдэсхэр “ал­мэстым” и кIий макъым егъэпIейтей. КъызэрыщIэ­кIымкIэ, алмэсты макъкIэ къэкIийр бгым щыхуа, ауэ псэууэ къэна Iэдэмщ. Нэ­гъуэщIу жыпIэмэ, цIыхухэр игъэшынэныр и гушыIэкIэ хъуауэ аращ.

   ИщхьэмкIэ зи гугъу щыт­щIа IуэхугъуэмкIэ дгъэзэжынщи, жимыIэпхъэ пса­лъэхэр къызыжьэдэкIа лIым и щхьэгъусэр, зы жэщ нэхъ мыхъуми, нэгъуэщIылI бгъэдэсын хуейуэ къэзы­гъэув хабзэр ди лъэпкъым и гъунэгъуу пхужыIэну­къым. ЕтIуанэращи, бгылъэ щIыпIэм къиIэпхъукIыу тафэм къэIэпхъуэнри нобэрей ди гъащIэм пэжыжьэщ. АтIэ сыт Абу-Бакар Ахъмэтхъан и тхыгъэмкIэ спектакль игъэувыну режиссерым къыщIыхихар? АбыкIэ дыщеупщIым, Дзудтагов Казбек къыджиIащ:

   - “Снежные люди” повес­тыр зытха дагъыстан тха­кIуэ гъуэзэджэ Абу-Бакар Ахъмэтхъанрэ сэрэ дызэдеджащ, и IэдакъэщIэкIхэм фIыуэ сыщыгъуазэщ. Зы  лъэныкъуэкIэ сэ сызытхьэ­къуар абы и гушыIэ дахэрщ, адреймкIэ - и тхыгъэм щIэлъ гупсысэ куурщ. Тхы­гъэм дыкъыщеджэм, ар актерхэми занщIэу ягу ирихьащ. Къыхэзгъэщыну сыхуейт, абы спектаклым елэ­жьыныр куэдкIэ нэхъ тынш зэрищIар.

   Дызэрыпэплъа дыдэм хуэ­дэу, цIыхухэр спектаклым гуапэу IущIащ. Ар, шэч хэмылъу, я фIыщIэщ абы щыджэгуа артистхэм. Сэ абыхэм хуабжьу сахуэарэзыщ.

   Режиссерым и псалъэм къы­хигъэщащ тхыгъэмрэ абы къытращIыкIа пьесэмрэ зыкъомкIэ зэрызэщ­хьэ­щы­­­кIыр. Ауэ Дзудтаговыр яужь итащ дагъыстан тха­кIуэм и IэдакъэщIэкIым ар къызыхэкIа лъэпкъым ижь къыщIихуар зэрихъумэным. Арагъэнщ ди лъэп­къым къепхыгъуей Iуэху­гъуэ гуэрхэри, уагъэды­хьэшхын нэхъ мыхьэнэшхуэ ямыIэу, спектаклым щIыхэтлъагъуэр.

   СпектаклыщIэр ягъэлъэ­гъуа­кIэщ икIи еплъахэм я нэхъыбэм ягу ирихьащ, актерхэм я джэгукIэм ­щытхъу псалъэ куэд хужа­Iащ. Абы теухуауэ цIыху зы­тIум жаIам фыщыдгъэ­гъуэзэнщ.

   Вындыжь Марие, журналист:

   - “Алмэстыхэр” спектаклым дэ иджыри зэ хьэкъ тщищIащ ди актерхэм я зэфIэкIыр зэрыиныр. Сэ хуабжьу сигу ирихьащ абы­хэм ящыщ дэтхэнэ зы­ми и ролыр зэригъэзэщIар. Ауэ, си гъусахэми сэри зыжьэу жытIар зыщ: ап­хуэ­диз зэчий зыбгъэдэлъ цIыхухэм гупсысэ куу зы­щIэлъ лэжьыгъэхэр я ма­щIэщ. Гуузщ артист гъуэзэ­джэхэм я зэфIэкIыр гушыIэ мышыу фIэкIа зыхыумы­лъа­гъуэ спектаклхэмкIэ бгъэ­­кIуэдыну. ГушыIэр Тхьэм зэрищIасэр сощIэ, ауэ цIыхухэр зыгъэпIейтей Iуэхугъуэхэр къызыхэщ пьесэхэр ягъэувтэмэ, фIыт.

  Тэнащ Залинэ, КъБКъУ-м и студент:

   - Спектаклыр сигу ирихьащ. Ар нобэ дызыхуэныкъуэ гукъыдэж къозыт, уна­гъуэ зэхущыты­кIэм щыщ гуэрхэр уэзыгъэ­лъагъу лэжьыгъэщ. Си гуа­пэщ адыгэ пьесэхэм я мызакъуэу, нэгъуэщI лъэпкъ къыхэкIа тхакIуэхэм я лэжьыгъэхэми дызэрыща­гъэ­гъуазэр.

   Си тхыгъэм и кIэухыу мы зыри щIызгъужынут театрым и унафэщIхэм яхуэ­гъэ­зауэ: пьесэм елэжьахэмрэ абы щыджэгухэмрэ зэрыт тхылъ цIыкIу премьерэм хуэвгъэхьэзыртэмэ, е ардыдэхэр къалэм къыщыфIадзэ афишэхэм тефтхатэмэ, фи дежкIи, те­ат­рым еплъыну кIуэхэм я дежкIи нэхъыфIт. Зи щхьэ пщIэ хуэзыщIыж театрхэм апхуэдэ хабзэ щокIуэкI.

ИСТЕПАН Залинэ.

Сурэтхэр тезыхар

Къаныкъуэ Заринэщ.

Я лэжьыгъэр йофIакIуэ

   Гъатхэпэм и 30-м ЩIэныгъэхэмкIэ Дунейпсо Адыгэ Академием и Президиумым и зэхуэс Налшык щекIуэкIащ.

   Абы хэтащ ЩIДАА-м и Президент Нэхущ Iэдэм, Къэрал Думэм и депутат, Дунейпсо Адыгэ Хасэм и тхьэмадэ Нэхущ Заурбий, Урысей ЩIэныгъэ Академием и Къэбэрдей-Балъкъэр щIэныгъэ центрым и унафэщI Иуан Петр, Къэбэрдей Адыгэ Хасэм и тхьэмадэ, “Адыгэ псалъэ” газетым и редактор нэхъыщхьэ ХьэфIыцIэ Мухьэмэд, ЩIДАА-м и щIэныгъэ секретарь нэхъыщхьэ Тхьэзэплъ Хьэсэн, КъБКъМа-м и профессор Хъаний Мирон, ЩIДАА-м и Къэрэшей-Шэрджэс къудамэм и унафэщI Темыр Умар, ЩIДАА-м и япэ вице-президент Мекъул ДжэбрэIил (Мейкъуапэ), Гуманитар къэхутэныгъэхэмкIэ Къэбэрдей-Балъкъэр щIэныгъэ институтым и щIэныгъэрылажьэ ЦIыпIынэ Аслъэн сымэ, нэгъуэщIхэри.

   Нэхущ Iэдэм зэIущIэр къызэIуихри, къыхигъэщащ  иджыблагъэ дунейм ехыжа Урысей Федерацэми Къэбэрдей-Балъкъэр Республикэми я щIэныгъэм щIыхь зиIэ и лэжьакIуэ Къумахуэ Башир зэрахэмытыжыр ЩIДАА-м дежкIэ хэщIыныгъэшхуэу зэрыщытыр. Къызэхуэсахэм щIэныгъэлIыр псалъэ гуапэкIэ ягу къагъэ­кIыжри, дакъикъэкIэ хуэщыгъуащ.

   ЩIДАА-м и Президиумым къыбгъэдэкIыу Нэхущыр ехъуэхъуащ икIи академием и ЩIыхь тхылъыр къритащ а махуэм зи ныбжьыр илъэс 60 ирикъу ХьэфIыцIэ Мухьэмэд. Нэхущ Iэдэм жиIащ адыгэ лъэпкъым зиу­жьынымкIэ ХьэфIыцIэм Iуэхушхуэ зэрызэфIигъэкIыр, ар хэкум и къэкIуэным псэемыблэжу хуэлажьэ адыгэлI щыпкъэу зэрыщытыр.

   ЗэIущIэм кърихьэлIахэр тепсэлъыхьащ ЩIДАА-м зэфIигъэкIын хуейуэ къыпэщылъ Iуэхугъуэ нэхъыщхьэхэм. Апхуэдэу ХьэфIыцIэ Мухьэмэд и къэпсэлъэныгъэр триухуащ “Адыгэхэр” фIэщыгъэцIэр иIэу адыгэбзэкIэ, урысыбзэкIэ, тыркубзэкIэ, инджы­лы­зыбзэкIэ, хьэры­пыбзэкIэ игъэхьэзыр альбомыр зэры­гъэпсам, абы епха лэжьыгъэхэр и кIэм зэрынэблэ­гъам, ар мы илъэ­сым и кIэхэм къызэрыдэкIынум. АдэкIэ Мухьэмэд и гугъу ищIащ “Щикъухьащ адыгэр дунеижьым” гъэлъэ­гъуэныгъэ ин адыгэхэм я фэеплъ махуэм ирихьэлIэу Налшык къызэрыщызэригъэпэщынум, ар бжьыхьэм Мейкъуапэ, Сыхъум зэришэнум.

   БзэщIэныгъэм дызыщрихьэлIэ гугъуехьхэм ятеу­хуат ЦIыпIынэ Аслъэн и къэпсэлъэныгъэр. Абы и лъэныкъуэкIэ лъэпкъыр дызыIууэнкIэ хъуну Iуэхугъуэ шынагъуэхэр, абы щхьэусыгъуэ хуэхъур, хэкIыпIэ хуэхъунухэр зэпкърыхауэ утыку кърихьащ щIэны­гъэлIым. ЦIыпIынэм жиIахэр диIыгъыу, езыми и Iуэху еплъыкIэр къигъэлъагъуэу къэпсэлъащ Темыр Умар.

   Нэхущ Iэдэм зыгъэгумэщIыр Къэбэрдей-Балъкъэр, Къэрэшей-Шэрджэс, Адыгэ Республикэхэм щIэ­ны­гъэ технологиемрэ егъэджэныгъэмрэ хуэфащэ зыу­жьыныгъэ зэрыщамыгъуэтырт, апхуэдэуи щIэныгъэлI щIалэхэр зэрыдимащIэм а Iуэхур ефIэкIуэнри къызэрилъахъэр къыхигъэщащ.

   А махуэм Нэхущ Заурбий ЩIДАА-м щIыхь зиIэ и академикыу зэрыхагъэхьамкIэ и дипломыр къратыжащ. Армавир дэт бзэщIэныгъэмкIэ университетым и ректор Сэкий (Согуэ) Риммэ ЩIДАА-м и Президиумым ха­­гъэхьэну унафэ къащтащ.

ЩхьэщэмыщI Изэ.

Дыхуэвгъэсакъ ди щIэблэм

   Лъэпкъым, адэ-анэм я деж­кIэ щIэблэр мылъкушхуэщ. Дунейр зейри лъэпкъым и къэкIуэнури зэлъытар ахэращ. Абы ипкъ иткIэ, абыхэм гулъытэ и чэзум яхуэдмыщI­мэ, дыщIегъуэжынущ.

   Дунейм къытехьагъащIэ сабийм игури и псэри уэс хужьым хуэдэу къабзэщ, абы сыт илъагъуми, сыт зэхихми занщIэу къепхъуатэ. Ар къэзылъхуахэми, зи нэIэ щIэт балигъхэми я фарзщ абы и хьэл-щэныр, и дуней тетыкIэр яубзыхуну.

   Сабийм и гум къыщыуш гупсысэр, ар Iейми фIыми, занщIэу Iэпыбуд хъунукъым. ФIымэ, удэгуфIэн, Iеймэ, нэ­хъыфI зэрыхъунур дахэу гу­ры­бгъэIуэн хуейуэ аращ. Гъэсэныгъэр цIыкIум зихуэпэфу, зитIэщIыжыфу щыхъуам деж къыщожьэ, абдеж щы­щIэ­­дзауэ щихар дахэу игъэ­тIы­лъыжу, зэрыджэгу и хьэпшыпыр Iуихыжыфу егъэсэн хуейщ. Зи гугъу сщIым мыхьэнэ езымытхэр щоуэ, сыт щхьэкIэ жыпIэмэ, Iуэхум и кIуэрабгъур быным зэрызыхебгъэлъхьэфыну щIыкIэм къежьапIэ хуэхъур аращ.

   НыбжьыщIэмрэ адэ-анэмрэ я зэхуаку къыдэхъуэ зэны­къуэкъурщ быныр жыIэмы­да­Iуэ хъуныр къызыхэкIыр. Абы уи макъ зебгъэIэтауэ уепсалъэ хъунукъым, уеущиен хуейуэ аращ. Дауи, адэ-анэм я къалэнщ быныр къуан­шэмэ, ткIийуэ хущытыныр. Ауэ и гур ирамыхыу, псалъэ IейкIэ емыгуауэу къызэре­зэгъ­кIэ епсэлъэн хуейщ.

   Зым дежкIи щэхукъым иджы­рей гъащIэр зэрыгу­гъур. Адэ-анэм зэрахузэфIэкI­кIэ сабийр абы щахъумэ. Пэжщ, я щIэблэм яфI зыхэлъщ ялэ­жьыр, ауэ а гъа­щIэм хэлъ гугъуехь псори бы­ным щыб­зы­щIыныр, адэ-анэм я фэм дэ­кIыр емыгъэщIэ­ныр тэмэм­къым.

   Быным дэтхэнэ и зы лъэба­къуэри гулъытэншэ умыщIу акъылкIэ, чэнджэщкIэ, гуп­сы­сэкIэ зебгъэкIуэфын хуейщ. А псом къыдэкIуэу, апхуэдэ ущием и лъабжьэм зэи мыужьых фIылъагъуныгъэр зэ­ры­щIэлъыр зэхегъэщIапхъэщ. Быныр щыцIыкIум щегъэжьауэ гущIэгъу хэлъу къэгъэ­тэджын хуейщ, ныбжьэгъуми гъунэгъуми ядэгъуэгурыкIуэ­фу, зи ныбжь хэкIуэтахэми защIигъэкъуэфу, дэтхэнэ зы цIыхуми хуэфащэ пщIэ хуи­щIыфу егъэсапхъэщ.

   Сабийхэр зыхуей хуэгъэзэныр адэ-анэм я къалэнщ, ауэ ебгъэлейуэ щхьэзыфIэфI пщIын­ри Iэмал зимыIэщ. Абыхэм адэр я щапхъэу щытын хуейщ, и плъэкIэ къудейм, и зы псалъэм фIэлIы­кIыу.

   Ди адыгэ хабзэр Iэмал хъарзынэщ бын ирибгъэсэну. Абы хуабжьу щIэгъэкъуэнышхуэ хуэхъурт нэхъапэм ди къэралым щыIэу щыта сабий, щIалэгъуалэ зэгухьэныгъэхэр. Ауэ, ди жагъуэ зэрыхъущи, хабзэр зи унагъуэ илъхэмрэ апхуэдэ зэгухьэныгъэхэр щылажьэ жылэхэмрэ иджы закъуэтIакъуэххэщ.

   Хуабжьу сигу къоуэ ди хъы­джэбз цIыкIухэм я зыхуэ­пэ­кIэр. КIэ кIэщIхэмрэ ящы­къу­зэжауэ ящыгъ цIыхухъу гъуэн­шэджхэмрэ щхьэ ямы­лъа­гъурэ адэ-анэм? Дауи, зи ны­бжьыр мыщIалэж езы бзы­лъхугъэхэми ар щащыгъ­кIэ, абы щапхъэ тезых щIэ­б­лэр бгъэкъуаншэ хъунукъым. Си щхьэкIэ, мыхъумыщIагъэ зыдэслъагъу сабий ныкъуэ­хъур згъэкъуаншэркъым, къуан­шэр ар апхуэдэу къы­дэзыгъэкI адэ-анэрщ. Щхьэ адыгэм тфIэфI апхуэдизу ди щхьэм пщIэ хуэд­мыщIыжы­ныр?

   Къуажэ къэсыхукIэ щызэхэту щытащ тхьэмадэхэм, бзылъхугъэхэм я зэгухьэны­гъэ­хэр. Абыхэм сытым дежи я дэIэпыкъуэгъут къуажэ уна­фэщIхэр, егъэджакIуэхэр, щIэблэм хабзэншагъэ ямылэжьыным зи нэIэ тет Iуэху­щIа­­пIэхэр. А псори зэрызэдэлажьэрт, унагъуэм и къалэн псори зэрыщагъэзащIэрт щIэ­блэ узыншэ къыщIытщIэ­хъуэри.

   Си псалъэмакъым и кIэу­хыу мыри щIызгъужынут: быным нэхъыфIрэ нэхъ IэфI­рэ щыIэкъым икIи ар зэрыбгъэса щIыкIэмрэ хэплъхьа цIыхугъэмрэ куэд елъытащ. Абыхэм я Iуэху ефIэкIуэху­кIэ ди лъэпкъми зиужьынуращи, дызэкъуэувэу ди щIэблэм яфI къэтлъыхъуэн хуейуэ аращ.

Балъкъэр Борис,

Джылахъстэней Адыгэ Хасэм и тхьэмадэ.

“Шагъдий” фильмхэм пащэ

   КъБР-м и Президентым пщэрылъ къызэрыщи­щIам ипкъ иткIэ Курортхэмрэ туризмэмкIэ министр Фырэ Руслан иригъэкIуэкIащ адыгэш лъэпкъыр хъумэным, гъэбэгъуэным, егъэфIэкIуэным теу­хуа зэIущIэ.

   Абы хэтащ КъБР-м ветеринариемкIэ и управленэм и унафэщI, адыгэш лъэпкъыр егъэфIэкIуэнымкIэ советым и тхьэмадэ ЛIуп Резиуан, абы и гъэзэщIак1уэ директор, профессор, РАЕН-м и академик Къагъырмэс Цорай, шы спорт школым и директор Дау Вячеслав, профессор Ашэбокъуэ Леонид, шы спортымкIэ УФ-м щIыхь зиIэ и тренер Къуныжь Мухьэрбий, налшык шыгъэжапIэм и тренер Дер СулътIан, “Налшык” ОРТК-м и генеральнэ директор Вэрокъуэ Владимир сымэ.

   ЗэIущIэм кърихьэлIахэр еплъащ адыгэш лъэп­къым теухуа “Шагъдий” фильмитIым. япэр 1970 гъэхэм я пэщIэдзэм трихащ республикэм щыцIэрыIуэ кинорежиссер Вэрокъуэ Владимир, етIуанэр нэгъабэ трихащ УФ-м гъуазджэмкIэ щIыхь зиIэ и лэжьакIуэ, Урысейм и “Ника” киноакадемием хэт режиссер Цориев сулътIан. Абыхэм еплъу тепсэлъыхьыжа нэужь, къызэхуэсахэм унафэ ящIащ мы фильмхэм адэкIи пищэну Вэрокъуэ Владимир пщэрылъ щащIыну. ЩIэныгъэ консультанту щытынухэщ ЛIуп Резиуан, Къагъырмэс Цорай, Ашэбокъуэ Леонид, Къуныжь Мухьэрбий сымэ. Апхуэдэу къызэхуэсахэр зэгурыIуащ 2006-2015 гъэхэм адыгэш лъэпкъым зегъэужьыным теухуа программэ зэман гъунэгъум зэхалъхьэну.

Бэрыкъуэ НэхъуатIэ.

ГушыIэ махуэ апщий!

IутIыж Борис и апрелыпэ гушыIэхэр

   Угъатхэ лъэнкIапIэрэ джэд пыхусыхур къыщысынум упэплъэу уздэщысым, угушыIэн, удыхьэшхын жыхуэпIэр – ар Iуэху тыншхэм ящыщкъым. ИтIани IутIыж Борис мурад ищIащ зэрыхъукIэ нобэ тIэкIу къывдэгушыIэну, зы тIэкIунитI-тI-тIэ нэхъ мыхъуми фи гукъыдэжым хигъэхъуэнуи, Тхьэм къригъэхъулIэ.

   Аращи, мис, IутIыжым фхузэхилъхьа гушыIэ тхыгъэ кIэщIхэм феджэ, абыхэм теухуауэ ищIа сурэтхэм феплъ, езы IутIыж Борис и псалъэхэмкIэ дэри зыфхудогъазэ: гушыIэ махуэ апщий!

   Мэлыжьыхьым и 1-р гушыIэм, нэжэгужагъэм я махуэу зэрыщытыр къэтлъытэри, дэ мурад тщIащ Агъ Зэрэгъыжыр зи псевдоним IутIыж Борис и гушыIэ тхы­гъэ «Гуащэпэж» жыхуиIэр нобэ щыщIэдзауэ Iыхьэ-Iыхьэурэ теддзэну.

   Упенсионеру, илъэс 65-рэ ухъуауэ ар здэгушыIэну зызрипщытам зеппщытын жыхуэпIэр – уэдыдыд!.. Езым зрипщытащи, езым зэхрегъэкIыж, дэ къытлъысращи, моуэ дехъуэхъунщ: Гуащэпэж и къалэн нэхъыщхьэм илъэс зытIощIрыпщI хуэдэкIэ тезыгъэхьэулеикIыфын пенсионер Тхьэм уищI, Борис.

ХьэфIыцIэм и администрацэ.

XIX  лIэщIыгъуэ

Щыст Демон, хэсу гупсысэшхуэм:

Лермонт тхьэмыщкIэр къаукIат.

Темытт дунейм зы усакIуэшхуэ…

Ацкъанри зэкIэ къамылъхуат.

«Зи насып!»

Мы щIалэжьым и цIэр Моцэщ.

И унэцIэр Темыужщ.

Пщыхьэщхьэ къэскIэ и тIроцэщ.

Махуэ къэскIэ и IутIыжщ.

Зэрымылъ пэ лъагэ

ПфIэделэщ псори уэ. Зыхош. Зогъэкъ…

Аращ къыщыщIыр делэм… щыхъукIэ фIэкхъ.

Гъуэтыгъуей

Ущылъыхъуапэу щытмэ мы дунейм,

Къыщыбгъуэтынущ удэзыхьеин.

Драхьеям и дежкIэ гъуэтыгъуейр

КъыщехуэхыжкIэ къэзыубыдынщ.

Хъер ухъу!

Апрелыпэ пщIыхь

Гугъусыгъуурэ сыжейуэ сыздэщылъым,

СопщIыхь мыпхуэдэу: Путин и жьэгу пащхьэм

Пэрысщ зы лIы къуэгъу цIыкIу, коньякыр щIишрэ

Чэнджэщ ириту ди къэрал Iэтащхьэм.

«Вэлодэ, - жи абы, - ущымыуэну

Ухуеймэ, мыдэ къызэдаIуэ… ПщIэрэ

Уэ, псалъэм папщIэ, мы ди Къэрал Думэм

ЕщIапхъэр? ПщIэркъым. Сэ бжесIэнщ-тIэ…» Арти,

Пкърыпкъыу зэпкърехри Къэрал Думэр,

Зэпкърелъхьэжыр ар зэрыщытыпхъэу

Къилъытэм хуэдэу: депутат щэ ныкъуэ

ФIэкIа къэмынэу «зэбгреху»… ИтIанэ

Пхыхуа ди экономикэм и дагъуэр

Кърелъхьэ ВВП и пащхьэ нэхуми,

ГугъупIэм зэуэ дизышыну лъагъуэр

Ирегъэлъагъур… Путин йогупсысыр:

«Мыпхуэдэ тхьэгурымагъуэ ди къэралым

Зэрисыр къызжамыIэу си блыгущIэтхэм

Щхьэ нобэм къэскIэ сщабзыщIа?!» Губжьарэ

И губжьыр нэхъ зытекъутапхъэр хэтми

Къилъыхъуэу Путин здэщысым, зэуэ

«Тхьэгурымагъуэм» зыкъызэкъуепхъуэтри,

ЙоупщIыр ди Iэтащхьэм: «Уа, Вэлодэ,

Тхьэм щхьэкIэ, умыбзыщIу мыр къызжеIэт:

Умыадыгэу пIэрэ уэ? Дэ нобэ

Адыгэ куэд къыдогъуэтыжыр… Пэжу,

Щолэхъур тIэщIэкIащ. Мис а тхакIуэшхуэ

Щолэхъухэ Мышэ… Мышэ тIэщIэкIами,

Ди спискIэм иттхэжащ дэ лIы лъэрыхьхэр.

Мес, псалъэм папщIэ, - Михаил Шемякин!

Ар бампIэу щыIэт США-ми, къедгъэблагъэщ,

Къардэнхэ яхэттхэжри, тщIащ адыгэ:

Иреплъ уадыгэныр гугъурэ тыншрэ!..

Сокъурхэ Сашэ къытхуэгъэшыщакъым.

Абы зегъэяпоныр хуабжьу. Ауэ,

Къыдэплъщ, зэплъыжри, ари гупсысэшхуэм

Хэхуауэ ежьэжащ!.. Аращи, кхъыIэ,

Жэуап къыдэт ди спискIэм уизытхэну

ЩIэбэгыу нобэ сыкъэзыгъэкIуахэм.

Дыщыуэу щытмэ, ари щIумыхъумэу

КъыджеIэ пэжыр: уадыгэ… хьэмэ?..»

«Iагъу-гъу! – жи Вэлодэ. – Догуэ абы шэчрэ

Шубхьэрэ щхьэ къытефхьагъэххэ? Путин

УнэцIэр сэ мыбы щызесхьэ щхьэкIэ,

Гъуэгунокъуэхэ сарейщ!..» Абдеж кIэнтIыIур

КъыхоузыкIри, сыкъоушыр… «Хъер ухъу!»

ЖызоIэ, сегупсысурэ: «Уа, хэт зэзгъэщхьыр

А чэнджэщ тынкIэ апхуэдизу Iэзэр? –

А-а-а, ХьэIупэ ДжэбрэIилщ!  Си ныбжьэгъужьырщ!!!»

ссылки

газетым и лэжьак1уэхэр

къыдэкIыгъуэхэр

KAVKAZWEB

Kavkaz Banner Network

Copyright © 2005 Buch e-mail: [email protected]