Бухарест и медалхэр
2021-06-10
- Румынием щекIуэкIащ алыдж-урым, бэнэкIэ хуитымкIэ ныбжьыщIэхэм я дунейпсо зэхьэзэхуэ. Парвулеску Дмитрийрэ Йорга Василерэ я фэеплъ зэпеуэм Къэбэрдей-Балъкъэрым щыщ бэнакIуэхэм ехъулIэныгъэ щызыIэрагъэхьащ.
- Зи хьэлъагъыр килограмм 74-м нэблагъэхэм я зэпэщIэтыныгъэр фIы дыдэу езыгъэжьа Хьэтанэ Идар финалым къыщыпэщIэхуащ хэгъэрей бэнакIуэр. Ари хигъащIэри ди спортсменым зэхьэзэхуэм и дыщэ медалыр зыIэригъэхьащ.
- Килограмм 82-м нэблагъэ алыдж-урым бэнакIуэ Гъуэныбэ Iэуес кIэух зэIущIэр 5:5-уэ иригъэухуащ, ауэ къыщыхагъэщIауэ къалъытащ, иужьрей баллыр фIахьати. Абы къефIэкIащ Нидерландхэм щыщ Стеркенбург Марсель икIи адыгэ щIалэм дыжьын медалыр къыхуагъэфэщащ.
- ЖЫЛАСЭ Замир.