Сурэттеххэм я лэжьыгъэхэр
2020-12-01
- СурэтыщI гъуазджэхэмкIэ музейм, Ткаченкэ Андрей и цIэр зезыхьэм, щагъэлъагъуэ республикэм и сурэттеххэм я лэжьыгъэхэр щызэхуэхьэса «Свой стиль» выставкэр.
- Гукъыдэж зиIэхэм Iэмал яIэщ музейм и щхьэгъубжэхэм къыIуагъэува а лэжьыгъэхэм еплъыну. Апхуэдэу щIащIэр коронавирус уз зэрыцIалэм зыщахъумэн папщIэщ.
- — Сурэтхэм къызэщIаубыдэ гъэм и зэманхэм я теплъэгъуэ телъыджэхэр, портретхэр, къалэм и уэрамхэр, нэгъуэщIхэри. Витринэхэр къэдгъэсэбэпурэ мы лэжьыгъэхэр япэу утыку къитхьащ. КъыдэхъулIэмэ, дяпэкIи выставкэхэр къыщызэдгъэпэщкIэ а Iэмалыр щIэгъэкъуэн къэтщIынущ, — жеIэ художник Подвэ Александр.
- КъищынэмыщIауэ, зи сурэтхэр зыгъэлъэгъуэну мурад зыщIа дэтхэнэми гулъытэ игъуэтащ. Гъэлъэгъуэныгъэм хагъэхьащ Журт Хьэсэн, Бекуев Геннадий, Байсиев Ахъмэт, Коркин Родион, Ванинэ Наталье, Нефедов Виктор, Къарей Элинэ, Подвэ Александр, Лукьяненкэ Иван сымэ я IэдакъэщIэкIхэр. Выставкэм хагъэхьэну я лэжьыгъэхэр сурэтхэр тезыхахэм езыхэм къыхахыжащ.
- Подвэ Александр къызэрыхигъэщамкIэ, утыку кърахьа дэтхэнэ зы сурэтри гъэщIэгъуэнщ, щIэупщIэ зиIэщ. Псом хуэмыдэу абы щIэщыгъуэ щыхъуащ Журт Хьэсэн и Iуэху бгъэдыхьэкIэхэр. А щIалэм къуалэбзухэм сурэтхэр ятрих къудейкъым, атIэ къыпэщылъ Iуэхум гупсэхуу зыхуегъэхьэзыр, мыхьэнэ зимыIэу къыпщыхъу зымащIэми гулъытэ хэха хуищIу. Выставкэр зэхэтынущ дыгъэгъазэм ику пщIондэ.
- АРЩЫДАН Гуащэлинэ.
- Сурэтыр КЪАРЕЙ Элинэ трихащ.