Къанкъул Ислъам и фильмыр Налшык щагъэлъагъуэ
2020-10-17
- Налшык и Къэрал киноконцерт гъэлъэгъуапIэм утыку къыщрахьащ Горький Максим и цIэр зезыхьэ Урыс къэ-рал драмэ театрым и артист, режиссёр щIалэ Къанкъул Ислъам и «Судьба» фильмыр.
- Зэхыхьэ гуапэм цIыху куэд зэхуишэсащ, Урыс драмэ театрым и артистхэмрэ IуэхущIапIэм и унафэщI Николаевэ ФатIимэрэ я пашэу.
- «Судьба» фильмыр теухуащ щIалэгъуалэм къыхахыну гъащIэ гъуэгуанэм. Абы хэтщ Къэбэрдей-Балъкъэрым и драмэ театрхэм я артистхэр.
- Николаевэ ФатIимэ и псалъэм къыхигъэщащ Къанкъул Ислъам куэдкIэ узыщыгугъ хъуну артист, режиссёр щIалэу зэрыщытыр, киногъуазджэм абы езым и лъагъуэ зэрыщыхишыр, и еплъыкIэ щIэщыгъуэхэр и лэжьыгъэхэм къызэрыщигъэлъагъуэр. Спектаклхэм щыджэгу къудей мыхъуу, сабийхэм яхуэгъэза гъэлъэгъуэныгъэ хьэлэмэтхэри Къанкъулым егъэув.
- Фильмыр ягъэлъэгъуа нэужь, кърихьэлIахэм Къанкъул Ислъам псалъэ гуапэхэмкIэ зыхуагъэзащ, дяпэкIи ехъулIэныгъэ и куэдыну ехъуэхъуащ, удз гъэгъахэм-кIэ хуэупсащ.
- ТЕКIУЖЬ Заретэ.