Лъэпкъ и зыпкъ кIуэдыркъым
2020-09-22
- Хабзэ дахэ зэрыхъуауэ, Адыгэхэм (шэрджэсхэм) я дунейпсо махуэр фокIадэм и 20-м ягъэлъэпIащ.
- КъБР-м ЩэнхабзэмкIэ и министерствэм къызэригъэпэща Iуэхугъуэ дахэхэм ящыщщ Къэбэрдей-Балъкъэрым и Лъэпкъ музейм къыщызэIуаха гъэлъэгъуэныгъэр. Республикэм ис IэпщIэлъапщIэхэм утыку кърахьащ адыгэхэм къагъэсэбэпу щыта хьэпшыпхэр. Апхуэдэуи сурэтыщIхэм я гъэлъэгъуэныгъэ щекIуэкIащ Ткаченкэ Андрей и цIэр зезыхьэ сурэтыщI гъуазджэмкIэ музейм.
- ФокIадэм и 17-м щегъэжьауэ Налшык къалэм зыщрагъэубгъуащ махуэшхуэм теухуа Iуэхугъуэхэм. Къапщтэмэ, Дунейпсо Адыгэ Хасэм иригъэкIуэкIа «стIол хъурейхэр» теухуауэ щытащ ди хабзэхэмрэ Iущыгъэхэмрэ, апхуэдэуи адыгэхэм Урысей къэралыгъуэм щаIэ мыхьэнэм.
- ФокIадэм и 19 — 20 махуэхэм цIыхухэм япэIэщIэу гъуазджэм и лэжьакIуэхэм онлайн-концерт ятащ. Налшык щыпсэухэмрэ абы и хьэщIэхэмрэ Iэмал яIащ Вэрокъуэ Владимир дэфтэрхэр и лъабжьэу триха, Идар Темрыкъуэ ипхъу Гуащэнэрэ (Марие) урыс пащтыхь Грозный Иванрэ ятеухуа фильмым.
- ФокIадэм и 20-м ягъэлъэгъуащ Нэгъаплъэ Аскэрбий и «Шагъдий» фильмри.
- Къыхэгъэщыпхъэщ махуэшхуэм ирихьэлIэу, лъэпкъым зэрызиужьар и лъабжьэу «Адыгэ псалъэ», «Адыгэ макъ», «Черкес хэку», «Нарт», «Жьынэпс» (Тыркум къыщыдокI) газетхэм зэгъусэу номер зэхэт зэрагъэхьэзырар. Адыгэхэм я махуэм республикэ телевиденэмрэ радиомрэ нэтын гъэщIэгъуэн куэд къатащ, политикэм, щIэныгъэм, щэнхабзэм, гъуазджэм, спортым, нэгъуэщI IэнатIэхэми ехъулIэныгъэ къыщызыхьахэр къыхэщу.
- НэгъуэщI зы Iуэху гуапи жэпуэгъуэм зэхэтхынущ, Дунейпсо Адыгэ Хасэм игъэхьэзыр «Народная дипломатия адыгов (черкесов) — мост дружбы между народами» тхылъыр къыдагъэкIыну траухуащи.
- БАГЪЭТЫР Луизэ.