Iэтауэ щагъэлъэпIащ
2020-09-22
- Тхьэмахуэ махуэм, фокIадэм и 20-м, адыгэ щыпсэу сыт хуэдэ щIыпIи хуэдэу, ди щIыналъэми щагъэлъэпIащ Адыгэхэм я махуэр. ГуфIэгъуэм хуэгъэпса дауэдапщэхэр щекIуэкIащ Бахъсэн районым хыхьэ жылэхэм, онлайн щытыкIэм иту. АбыкIэ хъыбар дагъэщIащ щIыпIэ администрацэм и пресс-IэнатIэм и лэжьакIуэхэм.
- Лъэр щIэзыгъэкI лъэпкъ къафэхэмрэ адыгэ уэрэдыжьхэмкIэ къызэIуахащ гуфIэгъуэр. Утыкухэм хуарзэу итащ лъэпкъ фащэхэр зэкIупс адыгэ щIалэ къуданхэмрэ пщащэ дахэхэмрэ. Абыхэм къакIэлъыкIуащ адыгэ шхыныгъуэхэм я гъэлъэгъуэныгъэхэр, ди нэхъыжьыфIхэмрэ къытщIэхъуэ щIэблэмрэ я зэхуэзэхэр. А зэIущIэхэм щытепсэлъыхьащ ди блэкIам, лъэпкъыр зэрыт нобэрей щытыкIэм, къэкIуэнум хуаIэ мурадхэмрэ хъуэпсапIэхэмрэ.
- ХьэтIохъущыкъуей къуажэм дэт ЩэнхабзэмкIэ унэм а махуэм ирихьэлIэу къыщызэрагъэпэщат гъэлъэгъуэныгъэ гъэщIэгъуэн. Абы и утыку кърахьахэм яхэлът адыгэхэм нэхъапэм зэрахьэу щыта хьэпшып хьэлэмэтхэр, пхъэм, гъущIым къахэIущIыкIа Iэмэпсымэхэр, пщIэфIапIэм щызэрахьэу щыта хьэкъущыкъухэр, ди лъэпкъ фащэм щыщ Iыхьэхэр. А хьэпшыпхэр яфIэхьэлэмэтащ абы щыгъуазэ зыхуэзыщIа куэдым.
- Щэнхабзэм и унэм къедза утыкушхуэм деж щапщэфIащ лъэпкъ шхыныгъуэ зэмылIэужьыгъуэхэр. ЩIыпIэ-щIыпIэхэмкIэ лэгъупыкъухэр щызэфIадзат, лы ягъавэрт, жьэрымэ щагъэурт. Махуэшхуэм хэтахэм Iэмал яIащ адыгэхэм зэхыхьэ зэмылIэужьыгъуэхэм ирихьэлIэу дгъэхьэзыр хабзэ хьэлыуэр зэрызэхэлъыр зрагъэщIэну, ар зэрапщIэфI щIыкIэм кIэлъыплъыну. Хьэлыуэр хьэзыр хъуа нэужь, ар IэшкIэ цIыкIу ящIурэ зыфIэфIхэм хуагуэшащ.
- Адыгэхэм ди зы гуфIэгъуэ зэхыхьэ зэфIэкIыркъым къафэрэ джэгурэ щымыIэу. ЛъэныкъуэкIэ утыкум щызэхаша джэгум къыдэкIуэу махуэшхуэм и къызэгъэпэщакIуэхэм, Бахъсэн щIыналъэм щэнхабзэмкIэ и лэжьакIуэхэм, къызэхуэсахэр щыгъуазэ хуащIащ ди лъэпкъым игъащIэ лъандэрэ къыдекIуэкI хабзэхэм, щэнхэм, Iуэху зехьэкIэхэм. ЩIыналъэм и нэхъыжьфIхэм ящыщ Бырхьэм Мухьэмэд щIалэгъуалэм яхутепсэлъыхьащ лъэпкъ фащэр зэрызэхэлъ Iыхьэхэмрэ абыхэм ягъэзащIэ мыхьэнэмрэ. Зи щIалэгъуэхэр дихьэхауэ едэIуащ нэхъыжьыфIым и псалъэм икIи фIыщIэ ин хуащIащ адыгэ фащэм теухуа апхуэдэ щIэныгъэ гъэщIэгъуэн къазэрыбгъэдилъхьам папщIэ.
- Махуэшхуэр зыгъэдэха творческэ гупхэм ящыщщ «Кавказ» ансамбль цIэрыIуэр. Абыхэм ягъэзэщIа адыгэ уэрэдхэмрэ къафэхэмрэ гунэс зыщымыхъуа къахэмыкIами ярейщ Iуэхум кърихьэлIахэм.
- ЕтIанэгъэ пIалъэ фIыкIэ дынэсыну хъуахъуэри, гуфIэгъуэр адыгэ джэгу дахэкIэ зэхуащIыжащ.
- ЖЫЛАСЭ Маритэ.