«Спартак-Налшыкым» и фо кIадэр
2020-09-22
- «Черноморец» (Новороссийск) — «Спартак-Налшык» (Налшык) — 0:2 (0:1). Новороссийск. «Центральный» стадион. ФокIадэм и 20-м. ЦIыху 300 еплъащ.
-
Новороссиск щытекIуахэр.
Судьяхэр Федотов (Великий Новгород), Магомедов (Мэхъэчкъалэ), Шаламов (Санкт-Петербург).
- «Черноморец»: Щоджэн Аз., Гараев, Омаров, Мустафин (Курбанов, 46), Гришин, Ахьэмэдхъан, Машэжь, Климов (Пономарёв, 55), Пацев (Барцов, 46), Магомедов, Матюшенкэ (Тимошенкэ, 63).
- «Спартак-Налшык»: Антипов, Мэкъуауэ, Ольмезов, Дзэмыхь (Уэрэзей, 79), Шумахуэ, Бахъсэнокъуэ (Ашу, 71), Хьэшыр (ХъутIэ, 72), Дэхъу, Джатэрывэ, Iэпщацэ (Багъэтыр, 81), Гугуев (Бацэ, 65).
- Топхэр дагъэкIащ: Iэпщацэм, 36 (0:1). Ашум, 82 (0:2).
- Дагъуэ къыхуащIащ: Гугуевым, Iэпщацэм, Пацевым, Гараевым, Ольмезовым, Мэкъуауэм, Ахьэмэдхъаным, Гришиным.
- Мы гъэм и фокIадэ мазэр хуабжьу хуэугъурлащ «Спартак-Налшыкым»: Урысей Федерацэм футболымкIэ и етIуанэ дивизионым и Япэ гупым 2020 — 2021 гъэхэм щекIуэкI зэхьэзэхуэм ипкъ иткIэ а лъэхъэнэм къыщыпэщылъа зэIущIищми ар щытекIуащ икIи зэпеуэм къыщыкIэрыху командэхэм къахэкIри, курыт зэфIэкI зиIэхэм яхыхьащ.
- Адыгэхэм (шэрджэсхэм) я дунейпсо махуэр щыдгъэлъапIэ фокIадэм и 20-м «Спартак-Налшыкыр» Новороссийск къалэм щыIущIат сыт щыгъуи лъэщ щIыпIэ «Черноморец»-м. Ди щIалэхэр абы ирихьэлIат япэ къита джэгугъуитIым щытекIуарэ я гукъыдэжыр ину. Хэгъэрейхэм я Iуэхухэр нэгъуэщIт: Урысей Федерацэм и кубокыр къэхьыным теухуа зэпеуэм ипкъ иткIэ бэрэжьейм къахуэкIуа премьер-лигэм хэт Къэзан и «Рубин»-м 2:4-уэ къыхигъэщIат. МахуиплI ипэкIэ зэхэта а зэIущIэм «Черноморец»-м и футболистхэм я къарур ихьат икIи гурыIуэгъуэт дыдейхэм щадэджэгуну тхьэмахуэ махуэм ирихьэлIэу зэрызэфIэмыувэжыфынур. Пэж дыдэуи, новороссийскдэсхэр вэсэмахуэ еша-елIауэ къытщыхъуащ икIи «Спартак-Налшыкым» псынщIагъкIэ хэпщIыкIыу къыпикIуэтащ. ЩытыкIэр дэгъуэу къагъэсэбэпащ ди щIалэхэм.
- Джэгум и япэ дакъикъэхэм щыщIэдзауэ налшыкдэсхэр хэгъэрейхэм ефIэкIащ. Ахэр ерыщу дэтхэнэ топми щIэбэнырт икIи апхуэдэ щIыкIэкIэ тепщэныгъэр яIыгът. «Черноморец»-м къыщыхэжаныкIырт фэбжь зэригъуэтам къыхэкIыу мы зэIущIэми хэмыта «Спартак-Налшыкым» и капитан Щоджэн Борис и къуэш нэхъыщIэ Азэмэтрэ иджыблагъэ Новороссийск Iэпхъуа ди гъуащхьауэу щыта Машэжь Ратмиррэ. Зым хъарзынэу хэгъэрейхэм я гъуэр ихъумащ, адрейм ди гъуащхьэхъумэхэр хуабжьу игъэпIейтеящ.
- Бжыгъэр къызэIуха щыхъуар 36-нэ дакъикъэращ. Налшыкдэсхэм я зи чэзу ебгъэрыкIуэныгъэм хуэфэщэн кIэух иритащ Iэпщацэ Марат. Абы иужькIэ нэрылъагъуу «Черноморец»-м и футболистхэм я лъэр щIэхуащ — къагурыIуагъэнщ Iуэхур зэрагъэзэкIуэжыну къару зэрамыIэр.
- Загъэпсэхуу къихьэжа иужькIэ новороссийскдэсхэр хущIэкъуащ бжыгъэр зэхуэдэ ящIыну. АрщхьэкIэ «Спартак-Налшыкым» аргуэру псынщIэ дыдэу тепщэныгъэр зыIэщIилъхьэжащ. «Черномоморец»-м и ебгъэрыкIуэныгъэ закъуэтIакъуэр гугъу емыхьыщэу къызэпаудащ а махуэм щыуагъэншэу джэгуа гъуащхьэтет Антипов Антон зи пашэ гъуащхьэхъумэхэм. А псом ищIыIужкIэ етIуанэ топри Щоджэн Азэмэт худагъэкIащ. Къызэрихьэрэ дакъикъэ зыбгъупщI фIэкIа мыхъуа Ашу Мурад апхуэдизу Iэзэу гъуэм еуати, къызэребгъэгъэзэфын щыIэтэкъым.
- Апхуэдэ щIыкIэкIэ, 2020 — 2021 гъэхэм я зэпеуэр щыщIадза шыщхьэуIу мазэм иригъэкIуэкIа джэгугъуиплIым зыми щыпэмылъэща «Спартак-Налшыкым» къыкIэлъыкIуэр фо кIадэ дыдэ хуэхъуащ. Дыщыгугъынщ жэпуэгъуэри къытемыхьэлъэну.
- Иджы щыгъуазэ фыхуэтщIынщ Урысей Федерацэм футболымкIэ и етIуанэ дивизионым и Япэ гупым щекIуэкI зэхьэзэхуэм ипкъ иткIэ иужьу зэхэта джэгугъуэм кърикIуа бжыгъэхэм: «Биолог-Новокубанск» (Прогресс) — «Анжи» (Мэхъэчкъалэ) — 1:1, «Краснодар-3» (Краснодар) — «Кубань» (Краснодар) — 0:1, «Легион Динамо» (Мэхъэчкъалэ) — «Интер» (Черкесск) — 4:1, «Кубань-Холдинг» (Павловскэ) — «Мэхъэчкъалэ» (Мэхъэчкъалэ) — 3:0, «ЕсэнтIыгу» (ЕсэнтIыгу) — «Динамо-Ставрополь» (Ставрополь) — 2:0, «Дружба» (Мейкъуапэ) — «Мэшыкъуэ-КМВ» (Псыхуабэ) — 1:1. СКА (Дон Iус Ростов) — «ТIуапсы» (ТIуапсы) зэIущIэр гъатхэм ягъэIэпхъуащ.
- ФокIадэм и 25 — 27 махуэхэм зэхэтыну къыкIэлъыкIуэ джэгугъуэр «Спартак-Налшыкым» блегъэкI. Ар иджы утыку къыщихьэнур Мэхъэчкъалэ и «Анжи»-р къыщригъэблэгъэну жэпуэгъуэм и 4-рщ.
- Жыласэ Заурбэч.