ПщIэ лъагэ зыхуэфащэхэр
2020-03-11
- Хабзэ дахэ зэрыхъуащи, ЦIыхубзхэм я дунейпсо махуэр Налшык Iэтауэ щагъэлъэпIащ.
- Къэрал киноконцерт гъэлъэгъуапIэм и пэIущIэ пэшым «Бгырыс бзылъхугъэхэр (пасэрей сурэтхэр)» фIэщыгъэм щIэт гъэлъэгъуэныгъэ хьэлэмэт къыщызэIуахат. Абы щыплъагъурт лъэпкъ фащэ екIухэмкIэ хуэпа, зи псэукIэ, дуней тетыкIэ, гупсысэкIэ зэмыщхь цIыхубзхэр. ГъэщIэгъуэнракъэ, абыхэм щхьэж езым и хъыбар къиIуэтэж хуэдэт. КъищынэмыщIауэ, утыку кърахьат сурэтыщI ныбжьыщIэ цIыкIухэм я анэхэм я теплъэу ящIахэр. ГъэщIэгъуэн дыдэт къэзылъхуам и гуапагъэмрэ абы и лъагъуныгъэмрэ сабийхэм зыхалъагъуэм ухэплъэну. Дауи, а цIыкIухэм ящыщ дэтхэнэри и анэр нэхъ дахэу къызэригъэлъагъуэным яужь итащ.
- Пшыхьым къекIуэлIат анэшхуэ, анэ, шыпхъу, пхъу, щхьэгъусэ къалэн мытыншхэр, ауэ щыхъукIи пщIэ лъагэ зыпылъ пщэрылъхэр зыгъэзащIэ цIыхубзхэр.
- ГуфIэгъуэ зэхыхьэр езыгъэкIуэкIхэр псалъэ дыгъэлхэм, образ дахэ- хэм, гукъыдэжыр къэзыIэт хъуэхъухэмрэ гушыIэхэмрэ щымысхьыжу «хагъэпскIыхьырт» абы щIэсхэр.
- Къэбэрдей-Балъкъэрым и Iэтащхьэ КIуэкIуэ Казбек къыбгъэдэкI хъуэхъу тхыгъэм пшыхьым къыщеджащ абы и Администрацэм и УнафэщI Къуэдзокъуэ Мухьэмэд. Ар къызэхуэсахэм ехъуэхъуащ гукъыдэж щымыщIэу, я гурыфIыгъуэр мыкIуэщIу, ефIакIуэу, гъагъэу куэдрэ псэуну.
- Гукъеуи, щхьэжагъуи зэзыгъэтIылъэкIыу а пшыхьым къекIуэлIа цIыхубзхэм я дэрэжэгъуэм гур хигъахъуэрт.
- Я уэрэд, къафэ екIухэмкIэ пшыхьыр ягъэдэхащ «Кабардинка», «Балкария», «Терские казаки» къэфакIуэ гупхэм, республикэм и артист пажэхэм. Псом хуэмыдэу къызэхуэсахэм ягу ирихьащ нэхъ цIыкIу дыдэхэм ягъэзэщIа къафэхэмрэ абыхэм цIыхубзхэм яхуэгъэзауэ жаIа псалъэ гуапэхэмрэ.
- ИНАРОКЪУЭ Данэ.
- Сурэтхэр Къарей Элинэ трихащ.