Пелликоне и фэеплъ зэпеуэм адыгэ щIалэхэр къыщыхожаныкI
2020-01-21
- Италием и бэнакIуэ цIэрыIуэу, иужькIэ я федерацэм и тхьэмадэу щыта Пелликоне Маттео и фэеплъ зэхьэзэхуэ иджыблагъэ Рим къалэм щекIуэкIащ. А зэпеуэм мы гъэми спортсмен цIэрыIуэ куэд къызэхуишэсат. Абыхэм ящыщт дуней псом щэнейрэ и чемпион, Олимп Джэгухэм дыжьын медалыр къыщызыхьа Махуэ Билал.
-
Махуэ Билал Темботхэ Ахьмэдхъанрэ Анзоррэ я гъусэу.
- Килограмми 125-м нэсхэм я зэпеуэм Махуэр гугъуу хыхьащ. Нэрылъагъут ар куэд щIауэ зэхьэзэхуэ инхэм зэрыхэмытар икIи я гуащIагъым мащIэу зэрыщыужар. Аращ къызыхэкIар Венгрием щыщ Лигетти Даниэл хуабжьу гугъу зэрыдехьар. Билал абы зэрефIэкIыфар 4:3-уэщ.
- ИужькIэ адыгэ щIалэр 8:0-у текIуащ Канадэм къикIа Дхеси Амарвир. Финал ныкъуэм къыщыпэщIэува, Венесуэлэм щыщ Урбанейя Луиси 10:0-у хигъэщIащ.
- Упэплъэ хъунут Махуэм адэкIи къыпэлъэщын щымыIэу. АрщхьэкIэ ди пелуаныр зэпеуэ гуащIэхэм иджыри хуэмыхьэзырыщэу къыщIэкIащ. Ираным къикIа Заре Амир и ебгъэрыкIуэныгъэ лъэщхэм ар 3:5-уэ къапикIуэтащ.
- Махуэ Билал Италием дыжьын медалыр щызыIэригъэхьащ. Ар зыхэта зэхьэзэхуэм и лъэщагъым и щыхьэтщ Олимп чемпион Снайдер Кайл ещанэ фIэкIа зэрымыхъуар. Килограмм 97-м нэс зи хьэлъагъхэм я зэпеуэм американ бэнакIуэ цIэрыIуэр финалым и Iыхьэ плIанэм щытридзащ Ираным икIа Мохаммадиан Мохаммад.
- Урысейм Спорт бэнэкIэмкIэ и федерацэм и тхьэмадэ Мамиашвили Михаил гулъытэншэу къигъэнакъым Махуэр утыку къызэрихьэжа щIыкIэр. «Сэ срогушхуэ Билал, — жиIащ абы. — Апхуэдиз гугъуехьхэр къызэринэкIри, ар зэпеуэхэм лъэ быдэкIэ къыхыхьэжащ икIи ехъулIэныгъэхэр иIэну ди гуапэщ. Псом ящхьэр узыншэнырщ икIи Олимп Джэгухэм дыкIуэну хуит дыкъэзыщI лицензэр Венгрием и къалащхьэ Будапешт гъатхэпэм и 19 — 22-хэм щызэхэтыну зэхьэзэхуэм щызыIэригъэхьэнырщ. Токио дыщэ медалхэр къыщытхуэзыхьыну хуабжьу дызыщыгугъхэм Билал ящыщ зыщ».
- Илъэс пщыкIубл фIэкIа зи мыныбжь Тембот Ахьмэдхъан Италием хуабжьу дыщигъэгуфIащ. 2018 гъэм ныбжьыщIэхэм я Гъэмахуэ Олимп Джэгухэм я чемпион хъуа бэнакIуэ щIалэ дыдэм килограмм 79-м нэс зи хьэлъагъ балигъхэм я деж дыжьыныр щызыIэригъэхьащ. Финалым хуэзышэ зэIущIэм ар 9:0-у щытекIуащ хэгъэрейхэм ящыщ Лумию Кармел. Ди жагъуэ зэрыхъунщи, иужькIэ къыхигъэщIащ Украинэм къикIа Михайлов Василий.
- Махуэ Билал дэщIыгъуу бэнэкIэ хуитымкIэ Пелликоне Маттео и фэеплъ зэхьэзэхуэм Италием зэрыщыхэтамрэ абы дыжьын медалыр къызэрыщихьамрэ Тембот Ахьмэдхъан и дежкIэ куэд и уасэщ. А щIалэхэм ягъусэу Рим щыIащ икIи зэпеуэхэм хуигъэхьэзыращ Урысей Федерацэм и ныбжьыщIэ командэ къыхэхам и тренер нэхъыжь Тембот Анзор.
- Мы гъэм иджыри зэхьэзэхуэ зыбжанэм хэтынущ Махуэ Билалрэ Тембот Ахьмэдхъанрэ. Италием щыIар дызыхыхьа олимп лъэхъэнэм и щIэдзапIэ къудейуэ аращ.
- Жыласэ Заурбэч.