Мамрэш Светланэ и ехъулIэныгъэхэр
2019-12-07
- Федеральнэ телевиденэм нэхъ щIэупщIэ щызиIэу къалъытэ «Голос» шоум и еянэ зэпеуэм хэтщ Къэбэрдей-Балъкъэрым щыщ, «Гоголь центр» театрым и артисткэ Мамрэш Светланэрэ уэрэджыIакIуэ Бэрбэч Аскэррэ.
- Аруан районым хыхьэ Нарткъалэ щыщ Мамрэш Светланэ курыт еджапIэр дыщэ медалкIэ къиухащ. Журналист IэщIагъэм дихьэхми, зэрыцIыкIурэ театрым, уэрэд жыIэным зэфIэкI щызиIэ хъыджэбзыр Щепкиным и цIэр зезыхьэ (Москва) театр училищэм щIэтIысхьащ. Светланэ режиссёр цIэрыIуэ Серебренников Кирилл и лэжьыгъэхэм зэпымыууэ кIэлъыплъу, ахэр игу ирихьу къекIуэкIати, Серебренниковым иригъэджэну гуп къызэрыхихыр къыщищIэм, и тхылъхэр «Щепкэм» къыщIихыжри, МХАТ-м и къэпщытакIуэ гупым иритащ. Илъэс зыбжанэ ипэкIэ абы къиухыжащ Ипполитов-Иванов и цIэр зезыхьэ музыкэ-педагогикэ институтым оперэмкIэ и факультетыр. Мамрэшыр театр спектакль, фильм куэдым гукъинэжу щыджэгуащ. Апхуэдэхэщ «Побег», «Побег-2», «Чужая мать», «Измена», «Взрослые дочери», «Паук», «Оптисты», «Довлатов», «А у нас во дворе» фильмхэр, нэгъуэщIхэри.
- Мамрэш Светланэ и уэрэд жыIэкIэр ягу ирихьу къэпщытакIуэ гупым хэтахэу Меладзе Константин, Гагаринэ Полинэ, Шнуров Сергей сымэ зыкъагъэзат, абы дэлэжьэну хуейуэ, езым къыхихар продюсер Меладзе Константинщ.
- Мамрэш Светланэ 2009 гъэм телеэкранхэмкIэ ягъэлъэгъуа «Иван Грозный» фильмым щигъэзэщIащ урыс пащтыхь Грозный Иван IV щхьэгъусэ хуэхъуа Гуащэнэ (Марие) и ролыр икIи ар абы къехъулIауэ къалъытащ.
- Светланэ 2015 гъэм япэу Налшык зыкъыщигъэлъэгъуат, «ХьэтIэхъущокъуэм и хадэ» фестивалым хыхьэу. Абы оперэ ариехэр гъэзэщIэным щиIэ зэфIэкIым шэч къытрихьэжынукъым «Девять» спектаклым «Птица» уэрэдыр зэрыщигъэзащIэр зэ зэхэзыхам. «Гоголь-центр» театрым Серебренников Кирилл нэгъабэ щигъэува «Барокко» спектаклыр япэу щагъэлъагъуэм гукъинэжу хэтащ ди хэкуэгъу пщащэр. КъищынэмыщIауэ, Москва и консерваторэм и аспирант Орлов Даниил и гъусэу Светланэ жыджэру зыкъыщигъэлъэгъуащ УФ-м и Композиторхэм я зэгухьэныгъэмрэ Прокофьевым и цIэр зезыхьэ музеймрэ къызэрагъэпэща «Нелекторий «Петя и волки» проектым. Иджы дыдэ уэрэджыIакIуэ цIэрыIуэ Тишман Марк Инстаграмым щиIэ напэкIуэцIым щызэбгригъэхащ и клипыщIэм Мамрэш Светланэ зэрыхэтым теухуа хъыбарыр. Артистхэм нэхъапэIуэкIи щызэдэлэжьэну къахуихуащ Марк и «Январь» уэрэдым хуищIа клипым.
- Ди хэкуэгъу хъыджэбзыр «Голос» проектым и зэфIэкI зэрыщеплъыжыр гуапэщ. Светланэ театрымрэ киномрэ щиIэ ехъулIэныгъэхэм дыкIэлъоплъ икIи дрогушхуэ.
- ТЕКIУЖЬ Заретэ.