Кавказ Ищхъэрэм и гъуазджэр Мэзкуу щагъэлъагъуэ
2019-10-31
- Мэзкуу дэт «Artplay» IуэхущIапIэм и хьэщIэщышхуэм жэпуэгъуэм и 25-м щегъэжьауэ и 31 пщIондэ щекIуэкIащ Кавказым щыщ гъуазджэрылажьэхэм я IэдакъэщIэкIхэр утыку къыщрахьэ гъэлъэгъуэныгъэ телъыджэ: «Биеннале современного искусства Кавказа». Ар зэрекIуэкIамрэ абы хэтахэмрэ къыдегъэцIыху езым и цIэр зезыхьэ альбомым.
- «Кавказым и иджырей гъуазджэр» Президент Фондым и унафэщI Астемыр Заирэ щыгъуазэ дещI Iуэхур кърахьэжьа зэрыхъуа щIыкIэмрэ абы и щхьэусыгъуэхэмрэ: «Мы гъэлъэгъуэныгъэр едгъэкIуэкIыну мурад щIэтщIар Кавказ Ищхъэрэм щыпсэу, лъэпкъ щхьэхуэхэм къыхэкIа сурэтыщIхэм, сурэттеххэм, цIыху IэпэIэсэхэм я IэдакъэщIэкIхэр къэрал утыкушхуэм кърахьэну Iэмал яIэн щхьэкIэщ. Зи гугъу тщIыр а лэжьыгъэхэр Кавказ Ищхъэрэм теухуауэ зэрыщытракъым, абы щыпсэу, щылажьэ, дунейпсо гъуазджэм дэгъуэгурыкIуэну Iэзагърэ зэфIэкIрэ зиIэ цIыху гъэщIэгъуэнхэм я IэдакъэщIэкIхэм дуней псор щыгъуазэу щытын зэрыхуейрщ, Урысейм щылажьэ адрей гъуазджэрылажьэхэм къакIэрымыхуу».
- ЦIыхуи 136-рэ зыхэта гъэлъэгъуэныгъэм утыку къыщрахьащ IэдакъэщIэкI 500-м щIигъу. Ди гуапэ мыхъуу къанэркъым абы ди щIыналъэм щыщ цIыху гуащIафIэ куэдым я лэжьыгъэхэр зэрыхэхуар: Црым Руслан, Мэзлохэ Эдуардрэ Русланрэ, Аккизов Керим, Хъалилэ Миланэ, ХьэцIыкIу Миланэ, Колкутин Андрей, АбытIэ Данэ, нэгъуэщIхэми. Гъэлъэгъуэныгъэм теухуа тхылъым къыдегъэцIыху Америкэм къыщыхъуа, Мэзкуу щылажьэ адыгэ сурэтыщI цIэрыIуэ Чэгъэду Зак, КъШР-м щыщ Урыс Ренат, Иорданием щыпсэу Къэрэгъул Зейнэ сыми.
- Псом ялейуэ дрогушхуэ къэралым и щыхьэрым щекIуэкIа, пщIэшхуэ зиIэ мы гъэлъэгъуэныгъэм «Адыгэ псалъэ» газетым и сурэттех, гъуазджэм и къудамэ зыбжанэм хуэIэзэ Къарей Элинэ зэрыхэтар. Тхылъым ихуащ Элинэ илъэс куэд щIауэ зэлэжь «Бжэхэр» зыфIища сурэт гупым щыщ зы. Фигу къэдгъэкIыжынщи, Къарей Элинэ къиухащ Кавказ Ищхъэрэм ГъуазджэхэмкIэ и институтыр. Ар хэтщ Урысейм и Журналистхэм я зэгухьэныгъэм, 2006 гъэ лъандэрэ «Свой стиль» клубым и гъэлъэгъуэныгъэхэм и лэжьыгъэхэр утыку къыщрехьэ. Сурэт зэрытрихым нэмыщI, адыгэ пщащэм пхъэм къыхэщIыкIа IэдакъэщIэкI дахащэхэр ещI, уеблэмэ, бзылъхугъэхэм зызагъэщIэращIэ тхьэгъухэм лъэпкъ тхыдэм епха сурэтхэр ятрещIыхь, абы зезыгъэсэну хуей ныбжьыщIэхэми ядолажьэ. ФIыуэ тлъагъу ди лэжьэгъум дяпэкIи и ехъулIэныгъэфIхэмкIэ дигъэгуфIэну, и IэщIагъэм гурыфIыгъуэ хихыу псэуну дохъуэхъу.
- ЧЭРИМ Марианнэ.
- Сурэтхэр Къарей Элинэ трихащ.