Налшык дунейпсо кинофестивалым и къалащхьэ мэхъу
2019-10-22
- Жэпуэгъуэм и 14 — 18-хэм Налшык и Музыкэ театрым къыщызэIуахащ Дунейпсо киномкIэ «FEST-хиты» тхьэмахуэр. Фестивалыр къызэрагъэпэщащ УФ-мрэ КъБР-мрэ щэнхабзэмкIэ я министерствэхэм, республикэм и кинематографистхэм я зэгухьэныгъэр щIыгъуу.
- Киномрэ театрымрэ я «Амурская осень» фестиваль зэIухам и президент, режиссёр, сценарист, продюсер Новожилов Сергей зэхыхьэр къыщызэIуихым, абы кърихьэлIахэр хигъэгъуэзащ Дунейпсо киномкIэ «FEST-хиты» тхьэмахуэм хыхьэу, республикэм щыпсэухэмрэ и хьэщIэхэмрэ фестиваль зэмылIэужьыгъуэхэм нэхъыфIу къыщалъыта, дамыгъэ лъапIэхэр зыхуагъэфэща фильмхэм зэрырагъэплъынум. Новожиловым къызэхуэсахэм яригъэцIыхуащ зи лэжьыгъэхэр Налшык къалэ щызыгъэлъэгъуэну кърагъэблэгъахэр.
- Фестивалыр къызэIуахащ псоми фIыуэ ялъэгъуа, Гайдай Леонид и «Кавказская пленница» фильмымкIэ. Абы еплъа нэужь, кърихьэлIахэр IущIащ роль нэхъыщхьэр абы щызыгъэзэщIа, кином, театрым, циркым я актрисэ Варлей Наталье. Ар цIэрыIуэ ирихъуащ «Кавказская пленница, или Новые приключения Шурика» фильмым щигъэзэщIа Нинэ и ролым.
- Дуней псор зэзыгъэлъэгъуа, Налшык къалэм япэу щыхьэщIа Варлей Наталье и гуапэу къыхигъэщащ ди щIыналъэм и щIыуэпсым и дахагъымрэ и хьэуам и къабзагъэмрэ телъыджэ зэрыщыхъуар икIи ахэр зэи зэрыщымыгъупщэнур. Псом хуэмыдэу нэхъ игу дыхьахэм ящыщу къигъэлъэгъуащ хьэщIэ фIыуэ зылъагъу, зи нэгу зэлъыIуха налшыкдэсхэм ядилъэгъуа гуапагъэр.
- — Циркми, Станиславскэм и театрми сызэрыщылэжьам, кино 60-м щIигъум сызэрыщыджэгуам емылъытауэ, «Кавказская пленница» фильмым щызгъэзэщIа Нинэ и ролыр цIыхухэм нэхъ ягу къинэжащ икIи а цIэр къыскIэрыпщIауэ иджыри къыздэсым нэхъыбэр «Нинэщ» къызэрызэджэр, — жиIащ Варлей Наталье.
- Кином теухуа зэIущIэм и программэм хыхьэу, Налшык и къэрал киноконцерт гъэлъэгъуапIэм утыку къыщрахьащ Потапов Владимир и «Крик тишины», Галибин Александр и «Сестрёнка», Мышкин Андрей и «Песнь Лингшуи», Устюговэ Екатеринэ и «Право выбора. Вера», Меркьюри Александррэ Баршак Александррэ я «Однажды в Резекне» урысей фильмыщIэхэр. Фестивалым и етIуанэ махуэм ягъэлъэгъуащ япон, къыргъыз кинематографистхэм траха фильмхэр. Ахэр я лэжьыгъэщ япон режиссёр, «Евразия» дунейпсо фестивалым и унафэщI Масуям Ренарэ къыргъыз режиссёр Дайырбеков Айбекрэ. КърихьэлIахэм щIэщыгъуэ ящыхъуащ Дайырбековым и «Песнь древа», Злобин Алексей и «Лорик» лэжьыгъэхэр. Кавказ Ищхъэрэм и кинохроникэм и студием и фильмофондым хыхьэу утыку кърахьащ Гаспарянц Рафаэль и «Кольцо старого шейха», «По следам Карабаира» лэжьыгъэ цIэрыIуэхэр.
- ТЕКIУЖЬ Заретэ.
- Сурэтхэр Къарей Элинэ трихащ.