«Шынагъуэншэ къалэ»
2019-10-19
- Къэбэрдей-Балъкъэр къэрал мэкъумэш университетым иджыблагъэ щекIуэкIащ УФ-м и Лъэпкъ гвардием илъэс къэс къызэригъэпэщ фестивалым и щIыналъэ Iыхьэр. Абы кърихьэлIат республикэм и еджапIэ нэхъыщхьэхэм, курыт школхэм, ХьэтIохъущыкъуей къуажэ дэт кадет школым я гъэсэнхэр, «Урысейпсо цIыхубэ фронтым» и лэжьакIуэхэр, нэгъуэщIхэри.
- Фестивалыр къызэIуихащ Урысей гвардием КъБР-м щиIэ къудамэм и унафэщIым и къуэдзэ, полицэм и полковник ХьэщIэмыз Заурбэч.
- — Согугъэ Лъэпкъ гвардием и дзэм теухуауэ щIэщыгъуэ куэд нобэрей зэIущIэм къыщыфщIэну. Языныкъуэхэми IэщIагъэ къыхэхынымкIэ фестивалыр дэIэпыкъуэгъу яхуэхъуну къысщохъу, — жиIащ абы хьэщIэхэм защыхуигъазэм.
- Фестивалым хэтахэм зыщагъэгъуэзащ кинологхэм, саперхэм, кхъухьлъатэзехуэ хуэмыныкъуэ кхъухьлъатэхэм я лэжьыгъэм, дзэр зэрызэщIэузэда я Iэщэ-фащэм. Урысей гвардием и лэжьакIуэхэр тепсэлъыхьащ управленэм къепха еджапIэ нэхъыщхьэхэм узэрыщIэхуэну Iэмалхэм, езыхэм я пщэ къыдэхуэ къалэнхэм, нэгъуэщIхэми.
- СОБР-м и «Iуащхьэмахуэ» медицинэ къудамэм и лэжьакIуэхэм хьэщIэхэм ирагъэлъэгъуащ «дэIэпыкъуэгъу псынщIэм» зи къупщхьэ къутам, уIэгъэ хъуахэм хуащIэфыр.
- КъищынэмыщIауэ, фестивалым щекIуэкIащ Росгвардием игъэзащIэ лэжьыгъэм теухуа сурэт гъэлъэгъуэныгъэ.
- Махуэр игъэдэхащ Звёзднэ жылэм щыIэ дзэ частым и оркестрымрэ ХьэтIохъущыкъуей къуажэм дэт кадет школым и гъэсэнхэмрэ ягъэхьэзыра концертым.
- Фырэ Анфисэ.