ЩIыхьым и шууей
2019-10-15
- КъБР-м и цIыхубэ тхакIуэ, РСФСР-м и Къэрал саугъэтым и лауреат, Социалист Лэжьыгъэм и ЛIыхъужь КIыщокъуэ Алим Пщымахуэ и къуэр къызэралъхурэ илъэси 105-рэ зэрырикъур мы махуэхэм ди республикэм Iэтауэ щагъэлъапIэ.
- Дауэдапщэхэм я зы Iыхьэу щытащ жэпуэгъуэм и 10-м Музыкэ театрым щызэхэта литературэ-макъамэ пшыхьыр. ТхакIуэ цIэрыIуэм хуэгъэпса пшыхьым хэтащ КъБР-м и Iэтащхьэм и Администрацэм и УнафэщI Къуэдзокъуэ Мухьэмэд, КъБР-м и Парламентым и УнафэщI Егоровэ Татьянэ, КъБР-м и Правительствэм и УнафэщIым и къалэнхэр зыгъэзащIэ Мусуков Алий, КъБР-м и Парламентым, Правительствэм, жылагъуэ зэгухьэныгъэхэм я лIыкIуэхэр. Къеблэгъат Урысейм и ТхакIуэхэм я зэгухьэныгъэм и правленэм хэт Латынин Валерий, «Литературная Россия» газетым и редактор нэхъыщхьэ Огрызкэ Вячеслав, Осетие Ищхъэрэ — Аланием, Къэзахъстаным, Абхъазым, Къыргъызым, Тыркум я лIыкIуэхэр, Кавказ Ищхъэрэм и щIыналъэхэм я тхакIуэхэм я зэгухьэныгъэхэм я тхьэма- дэхэр.
- ЗэIущIэм и пэщIэдзэм Къуэдзокъуэ Мухьэмэд къеджащ КъБР-м и Iэтащхьэм фестивалым хэтхэм зэрызахуигъэза фIэхъус псалъэм: «КIыщокъуэ Алим и цIэр хуэфащэ дыдэу ябгъурытщ Кавказ Ищхъэрэр зэрыгушхуэ и тхакIуэхэм. Абы и творческэ Iэужьым и беягъыр а тхакIуэм и уардагъым хуэфэщэжщ. Алим и IэдакъэщIэкIхэр къэралым, дуней псом и литературэм я фIыпIэм щыщщ», — итщ абы.
- КъБР-м щэнхабзэмкIэ и министрым и къалэнхэр зыгъэзащIэ Къумахуэ Мухьэдин и къэпсэлъэныгъэр теухуат КIыщокъуэм и гъащIэмрэ и творчествэмрэ, къикIуа гъуэгуанэ мытыншым, ауэ Хэкум, лъэпкъым я дежкIэ мыхьэнэ лъагэ зиIэм.
- Усыгъэм хэлъ мэгъу къарум, абы цIыхухэр, лъэпкъхэр зэрызэкъуигъэувэм кIэщIу тепсэлъыхьащ Латынин Валерий.
- — Литературэм КIыщокъуэ Алим хуэдэ цIыху инхэр зэрыхэтым и фIыгъэщ ЮНЕСКО-м и жьауэм щIэт «Къыу хужьхэм я махуэ» Iуэху дахэр къызэрырахьэжьар. Апхуэдэщ «ЩIыхьым и ЛIыхъужь» фестивалри, нэгъуэщI литературэ дауэдапщэхэри. Политикэ Iуэхухэм цIыхухэр, лъэпкъхэр зэпэIэщIэ щащI, щызэщагъэIей къэхъуми, литературэм, псом хуэмыдэу усыгъэм, зэкъуегъэувэ. КIыщокъуэ Алим тхакIуэ, усакIуэ бэлыхьым и мызакъуэу, ар щIыхьым и лIыхъужьщ», — жиIащ Латыниным.
- Осетие Ищхъэрэ — Аланием и Лъэпкъ музейм и унафэщI Засеев Мераб КIыщокъуэм хуэгъэпсауэ итха усэм къызэхуэсахэм къахуеджащ.
- Лъэпкъым, къуэпсым и къарум, КIыщокъуэм адыгэ дунейм щиубыд увыпIэм, абы лъэпкъым къыхуигъэна Iэужь дахэм теухуауэ псалъэ гуапэ куэд щыжаIащ а пшыхьым.
- ЩоджэнцIыкIу Алий и цIэр зезыхьэ Къэбэрдей къэрал драмэ театрым и артистхэр тхакIуэм и IэдакъэщIэкI курыххэм гум хыхьэу къыщеджащ абы. КIыщокъуэм и усэр зи лъабжьэ уэрэдхэр жаIащ КъБР-м и цIыхубэ артисткэ Сокъур Ольгэ, Бэч Азэмэт, ДыщэкI Артур, Хьэкъул Оксанэ, КъБР-м щыхь зиIэ и артистхэу, Музыкэ театрым и солистхэу Мамбэт Мадинэ, Гуазэ Тимур сымэ, нэгъуэщIхэми. «Кабардинка» къэрал академическэ ансамблым игъэзэщIащ и къафэ нэхъыфIхэм ящыщ зыбжанэ.
- Щомахуэ Залинэ.
- Сурэтхэр Къарей Элинэ трихащ.