Нобэрэ пщэдейрэ
2019-07-11
- Бадзэуэгъуэм и 11, махуэку
- ЦIыху бжыгъэм хэхъуэным и дунейпсо махуэщ
- Шоколадым и дунейпсо махуэщ
- Монголием щагъэлъапIэ я цIыхубэ революцэм и махуэр
- 1700 гъэм Берлин къыщызэIуахащ Германием щIэныгъэхэмкIэ и академиер. Абы и япэ президенту хахат дуней псом щыцIэрыIуэ нэмыцэ философ икIи математик Лейбниц Готфрид.
- 1941 гъэм щIидзащ Киев къалэр хъумэжыным теухуа зауэ гуащIэм.
- 1958 гъэм «Кабардинка» къэрал къэфакIуэ ансамблыр Монголием кIуащ, абы и лъэпкъ махуэшхуэм хэтын папщIэ.
- 1987 гъэм ЩIы хъурейм цIыхуу щыпсэур меларди 5 ирикъуащ.
- 1998 гъэм Москва къыщызэIуахащ НыбжьыщIэхэм я дунейпсо спорт джэгухэр. А зэпеуэхэр егъэкIуэкIыныр къыхалъхьат Москва къалэм и Правительствэмрэ Урысейм и Олимп комитетымрэ. Абы хэтащ къэрали 131-м я лIыкIуэ ныбжьыщIэхэр, спорт лIэужьыгъуэ 14-кIэ зэпеуащ.
- Биологие щIэныгъэхэм я доктор, профессор, КъБР-м щIэныгъэхэмкIэ щIыхь зиIэ и лэжьакIуэ КIэрэф Майе и ныбжьыр илъэс 87-рэ ирокъу.
- Италием щыщ модельер цIэрыIуэ, хьэрычэтыщIэ, а къэралым и цIыху нэхъ къулей дыдэхэм ящыщ Армани Джорджо и ныбжьыр илъэс 85-рэ ирокъу.
- КъБР-м и цIыхубэ артист Къуныжь Алим и ныбжьыр илъэс 71-рэ ирокъу.
- Совет хоккеист цIэрыIуэ, СССР-м спортымкIэ щIыхь зиIэ и мастер Анисин Вячеслав и ныбжьыр илъэс 68-рэ ирокъу.
- Дунейм и щытыкIэнур
- «pogoda.yandex.ru» сайтым зэритымкIэ, Налшык пшэр техьэ-текIыу щыщытынущ. Хуабэр махуэм градус 28 — 30, жэщым градус 19 — 21-рэ щыхъунущ.
- Бадзэуэгъуэм и 12, мэрем
- Сурэттехым и дунейпсо махуэщ
- ЦIыхухэр къызэрырашэкI кхъухьлъатэхэм я бортпроводникхэм я дунейпсо махуэщ
- Белоруссием и налог IуэхущIапIэхэм я лэжьакIуэхэм я махуэщ
- 1590 гъэм Саратов къалэм и лъабжьэр ягъэтIылъащ.
- 1641 гъэм Астрахань хъаныдзэм Балъкъ и деж щригъэкIуэкIа зауэм хэкIуэдащ Къундет зэшхэр — Чэлимэтрэ Елдаррэ.
- 1783 гъэм Бытырбыху къыщызэIуахащ Театр Иныр, иужькIэ Мариинскэ цIэр зыфIащыжар.
- 1862 гъэм США-м и дзэм къулыкъу щызыщIэхэм хуагъэфащэ дамыгъэ нэхъ лъапIэ дыдэр — ЩIыхьым и Медалыр — ягъэуващ.
- 1917 гъэм Япэ дунейпсо зауэм химие Iэщэ — иприт газыр — къыщагъэсэбэпауэ щытащ. Инджылызхэмрэ франджыхэмрэ я дзэхэм я ебгъэрыкIуэныгъэр къызэпиудын мурадкIэ, дунейм зэи къыщымыхъуауэ, Германием химие Iэщэ Бельгием и къалэ Ипр деж къыщигъэсэбэпащ. Зауэр щекIуэкIа щIыпIэм и цIэр фIащауэ щытащ а щхъухь лIэужьыгъуэм.
- 1943 гъэм Прохоровкэ къуажэм деж щекIуэкIащ ЕтIуанэ дунейпсо зауэм щынэхъ гуащIэ дыдэу къалъыта, лъэныкъуитIми я танкхэр щызэпэщIэта зауэр. ЛъэныкъуитIми я танкыу абы хэтащ 1200-м щIигъу, кхъухьлъатэхэри я дэIэпыкъуэгъуу.
- 1988 гъэм Нагорнэ Карабахым и областной советым унафэ къищтащ а щIыналъэр Азербайджаным къызэрыхэкIым теухуауэ.
- 1998 гъэм Франджым футболымкIэ и командэ къыхэхар апхуэдэ лъагапIэ зэи нэмысауэ, дуней псом и чемпион хъуащ. КIэух зэIущIэм ар Бразилием и командэм 3:0-у щытекIуат.
- 2001 гъэм Москва къыщызэIуахащ Дунейпсо Олимп Комитетым и 112-нэ сессиер. Олимп зэщIэхъееныгъэм къыпэщыт зи чэзу къалэнхэм тепсэлъыхьыным къыдэкIуэу, абы щаубзыхуащ 2008 гъэм зи чэзу Джэгухэр щекIуэкIыну щIыпIэри. Абы теухуауэ Iэ зыIэта цIыхуи 126-м я нэхъыбапIэм нэхъ яфIэтэмэму къыщIэкIащ зэпеуэхэр Китайм и къалащхьэ Пекин щызэхэтыныр. Сессием апхуэдэуи щыхахащ Дунейпсо Олимп Комитетым и президентыщIэри. А къулыкъур хуагъэфэщат Бельгием щыщ Рогге Жак.
- 2009 гъэм Литвам и президенту Грибаускайте Даля хахащ, а къулыкъум цIыхубз нэхъапэм зэи темытауэ.
- Чилим щыщ усакIуэ, Нобель и саугъэтыр зрата Нерудэ Паблэ (и цIэ дыдэр Рикардэ Элизер Нефтали Рейес Басуальтощ) къызэралъхурэ илъэси 115-рэ ирокъу.
- УФ-м, КъБР-м щIыхь зиIэ я сурэтыщI ТхьэкIумашэ Михаил и ныбжьыр илъэс 92-рэ ирокъу.
- УэрэджыIакIуэ цIэрыIуэ, СССР-м и цIыхубэ артисткэ Толкуновэ Валентинэ къызэралъхурэ илъэс 73-рэ ирокъу.
- Сценарийхэр зытх, кинорежиссёр цIэрыIуэ, УФ-м и цIыхубэ артист Лунгин Павел и ныбжьыр илъэс 70 ирокъу.
- Социологие щIэныгъэхэм я доктор, АКъУ-м и профессор, Адыгэ Республикэм и Iэтащхьэу илъэс куэдкIэ лэжьа ТхьэкIушынэ Аслъэнджэрий и ныбжьыр илъэс 72-рэ ирокъу.
- Дзюдо спорт лIэужьыгъуэмкIэ дунейм и чемпион Лъэцэр Хьэзрэт и ныбжьыр илъэс 61-рэ ирокъу.
- Урысей актёр, УФ-м и цIыхубэ артист Домогаров Александр и ныбжьыр илъэс 56-рэ ирокъу.
- Дунейм и щытыкIэнур
- «pogoda.yandex.ru» сайтым зэритымкIэ, Налшык пшэр техьэ-текIыу щыщытынущ, пIалъэ-пIалъэкIэрэ уэшх къыщешхынущ. Хуабэр махуэм градус 20 — 21-рэ, жэщым градус 17 — 18 щыхъунущ.