ТекIуэныгъэ Иным и «Фэеплъ IэмыщIэ»
2019-06-25
- Хэку зауэшхуэм зэрыщIидзэрэ илъэс 78-рэ зэрырикъум ехьэлIауэ УФ-м ЗыхъумэжыныгъэмкIэ и министерствэм къыхилъхьа «Фэеплъ IэмыщIэ» урысейпсо Iуэхум Къэбэрдей-Балъкъэрри хэтащ.
- Iуащхьэмахуэ щIыналъэр яхъумэурэ зи псэр зыта зауэлIхэм я фэеплъу Терскол дэтым деж цIыху щитIым щIигъу щызэхуэсат мэкъуауэгъуэм и 22-м. Кавказыр зыхъума сэлэт 225-м я хьэдэхэр щIэлъщ абдеж.
- Iуэхум кърихьэлIащ Къэбэрдей-Балъкъэр Республикэм и Iэтащхьэм и къалэнхэр пIалъэкIэ зыгъэзащIэ КIуэкIуэ Казбек, КъБР-м къегъэщIылIа федеральнэ инспектор нэхъыщхьэ Ткачев Евгений, Хэку зауэшхуэм хэта Этезов Нажмудин, КъБР-м и Правительствэм хэтхэр, зауэмрэ лэжьыгъэмрэ я ветеранхэр, УФ-м ЗыхъумэжыныгъэмкIэ и министерствэм, Урысейм и МЧС-м я лIыкIуэхэр, ДОСААФ-м и курсантхэр, «Юнармия» зэгухьэныгъэм хэт ныбжьыщIэхэр, нэгъуэщIхэри.
- — Фашизмэм текIуэным теухуауэ совет цIыхухэм яхузэфIэкIар къэлъытэгъуейщ. Совет сэлэтырщ фашизмэм и лъэр щIэзыудар, дуней псом мамырыгъэр къахуэзызэуар. ИкIи дэ ди къалэнщ лIыхъужьыгъэм и щапхъэу абыхэм къагъэлъэгъуахэр ди гум щытхъумэныр, къытщIэхъуэ щIэблэр щыгъуазэ тщIыныр, Хэку зауэшхуэм ТекIуэныгъэ Иныр къызэрыщытхьам и тхыдэр зэрахьэкIыу зыми яхуэдмыдэныр, — жиIащ КIуэкIуэ Казбек.
- Этезов Нажмудин къыщыпсалъэм КIуэкIуэ Казбек фIыщIэ хуищIащ нэхъыжьхэр зэрыщымыгъупщэм папщIэ. Абы къыхигъэщащ Хэкур хъумэным, ар егъэфIэкIуэным теухуауэ иджырей щIалэгъуалэм куэдкIэ зэращыгугъыр.
- Ткачев Евгений жиIащ ТекIуэныгъэ Иныр къытхуэзыхьа ди нэхъыжьхэр, Хэкур хъумэным зи гъащIэр щIэзыта совет зауэлIхэр зэрытщымыгъупщэм и нэщэнэу мы зэIущIэр къызэрилъытэр.
- «Мемориал Эльбрус» къэлъыхъуакIуэ гупым хэтхэм я гъусэу, КIуэкIуэ Казбекрэ Этезов Нажмудинрэ Iуащхьэмахуэ лъапэ деж щыхэкIуэдахэм я кхъащхьэм щIы IэмыщIэ къытрахри, сэмбым иракIутащ. ЩIы IэмыщIэр ирагъэхьынущ УФ-м IэщэкIэ ЗэщIэузэда и Къарухэм я члисэ нэхъыщхьэу Москва пэмыжыжьэу щыIэ «Патриот» паркым деж иIэм.
- ЗэIущIэм и кIэухым къызэхуэсахэм Хэку зауэшхуэм хэкIуэдахэм я фэеплъым удз гъэгъахэр тралъхьащ. Iуэхум хэту, Iуащхьэмахуэ и Iэгъуэблагъэм къыщагъуэтыжа совет Iэщэхэм я гъэлъэгъуэныгъи Терскол дэт курыт еджапIэм щекIуэкIащ.
- НафIэдз Мухьэмэд.