Шурдым Миленэ Истамбыл щытокIуэ
2019-05-25
- Зеикъуэ щыщ уэрэджыIакIуэ ныбжьыщIэхэм я зэфIэкI иджыблагъэ Истамбыл щагъэлъэгъуащ. Уэрэд жыIэнымкIэ егъэджакIуэ Ахъмэт Эльвирэ и гъэсэнхэу Шурдым Миленэрэ (илъэс 11) Къуршэ Арианэрэ (илъэси 10) Тыркум щекIуэкIа «Тырку дуней-2019» зэпеуэм екIуу хэтащ.
- КъэпщытакIуэ гупыр зэдэарэзыуэ бжьыпэр хуагъэфэщащ «Псы ежэх цIыкIу» уэрэдыр жызыIа Шурдым Миленэ. «Анэ» уэрэдыр дахэу зыгъэзэщIа Къуршэ Арианэ ещанэ увыпIэр къихьащ.
- Мы зэпеуэр тыркубзэхэр зыIурылъхэм я деж зэрыщрагъэкIуэкIам емылъытауэ, адыгэ пщащэ цIыкIуитIым я уэрэдхэр балъкъэрыбзэкIэ щагъэзащIэм, увыпIэ нэхъыщхьэхэр кърамытын яхузэфIэкIакъым. Ахъмэт Эльвирэ дызэрыщигъэгъуэзамкIэ, хъыджэбз цIыкIухэм я макъ дахэр, артист зэфIэкI иныр къэпщытакIуэ гупым телъыджэ ящыхъуат. Къыхэгъэщыпхъэщ къэрал 28-м къикIахэр япэ увыпIэм зэрыщIэбэнар.
- Шурдым Миленэ и ехъулIэныгъэм теухуа нэгъуэщI хъыбари мы махуэхэм къэIуащ. УэрэджыIакIуэ ныбжьыщIэхэм папщIэ къызэрагъэпэщауэ Москва щекIуэкI «Ты — звезда» урысейпсо теленэтыным ар щытекIуащ.
- Чылар Аринэ.