Ныр Роксанэ пашэхэм яхохьэ
2019-05-25
- «IэщIагъэлI ныбжьыщIэхэр» (WorldskillsRussia) VII Лъэпкъ чемпионатым и кIэух Iыхьэм кIуэнухэр къыщыхах зэхьэзэхуэ иджыблагъэ щызэхэтащ Ярослав къалэм дэт педагогикэ колледжым. АбыкIэ хъыбар дигъэщIащ КъБКъУ-м и пресс-IэнатIэм.
- Къэбэрдей-Балъкъэрым щыщу а зэпеуэм хэтащ КъБКъУ-м и педколледжым и студенткэхэу Ныр Роксанэ, КIэлъыджэ Аминэ, Цечоевэ Хавэ сымэ. Ахэр ягъэхьэзыращ колледжым и егъэджакIуэхэу, эксперт-компатриотхэу Къызэрыс ФатIимэ, Кузьменкэ Людмилэ, Созаевэ Жаннетэ.
- Ди пщащэхэм ящыщ дэтхэнэми зэпеуэм щIэныгъэфIрэ зэфIэкI лъагэрэ къыщигъэлъэгъуащ, арщхьэкIэ псоми яхуэдэжтэкъым Ныр Роксанэ хулъэкIар. «Зи школ кIуэгъуэ нэмысахэм яхуэгъэза гъэсэныгъэ» унэтIыныгъэмкIэ зэпеуахэм ар яхэтати, зэхьэзэхуэм къапигъэтIылъ къалэнхэм къызыхуэтыншэу пэлъэщащ. Псори зэхэту Роксанэ къыпэщIэтащ Урысей Федерацэм хыхьэ щIыналъэ 80-м къикIа лIыкIуэхэр. Абыхэм ящыщ дэтхэнэми наIуэ къищIащ сабийхэм лъэныкъуэ куэдкIэ уазэрыдэлэжьэфынум и мардэхэр. Апхуэдэхэт, къапщтэмэ, зыхэщIэгъуэу текстым къахуеджэныр, джэгукIэр зи лъабжьэ дерс егъэкIуэкIыныр, робототехникэр къагъэсэбэпу егъэсэныр, гъуэгум зэрыщызекIуэн хуей хабзэхэр егъэщIэ-ныр.
- А псоми къызыхуэтыншэу пэлъэщащ Нырыр икIи «IэщIагъэлI ныбжьыщIэхэр» (WorldskillsRussia) VII Лъэпкъ чемпионатым и кIэух Iыхьэм кIуэнухэм яхэхуащ. Роксани ар зэпеуэм хуэзыхьэзыра Къызэрыс ФатIими ди гуапэу дохъуэхъу зыIэрагъэхьа ехъулIэныгъэ лъагэмкIэ. АдэкIэ зыхэтыну зэпеуэми текIуэныгъэ къыщихьыну дыщогугъ.
- Фигу къэдгъэкIыжынщи, «IэщIагъэлI ныбжьыщIэхэр» чемпионатым и урысейпсо Iыхьэм и кIэух зэпеуэр Къэзан щекIуэкIынущ.
- ЖЫЛАСЭ Маритэ.