Ухуэныгъэм пыщIа Iуэхухэм топсэлъыхь
2019-05-16
- Социальнэ мыхьэнэ зиIэ ухуэныгъэхэр нэгъэсыжыным, фэтэр куэд хъу унэхэр капитальнэу зэгъэпэщыжыным ехьэлIа республикэ программэм хуэгъэзауэ къащтауэ щыта унафэхэр гъэзэщIа зэрыхъум щыхэплъа зэIущIэ иджыблагъэ иригъэкIуэкIащ КъБР-м и Iэтащхьэм и къалэнхэр пIалъэкIэ зыгъэзащIэ КIуэкIуэ К. В.
- ЩIыналъэм и унафэщIым къыхигъэщхьэхукIащ ухуэныгъэм ехьэлIауэ зыхуагъэувыжа къалэнхэр нэгъэсауэ икIи я пIалъэм къриубыдэу гъэзэщIэн зэрыхуейр. «Финанс кIэлъыплъыныгъэри техническэ кIэлъыплъыныгъэри нэхъри гъэткIиипхъэщ», — жиIащ абы.
- 2019 гъэм капитальнэ ухуэныгъэмкIэ реестрым ухуэныгъэщIэу 62-рэ итщ. Абыхэм трагъэкIуэдэну бюджет ахъшэр сом меларди 2-рэ мелуан 300-м щIегъу. Дызэрыт илъэсым къриубыдэу хьэзыр ящIыну ухуэныгъэ 27-м яхэтщ Дзэлыкъуэкъуажэ посёлкэм дащIыхь физкультурэ комплексыр, Сэрмакъ, нэгъуэщI къуажэ зыбжани псыкIэ къызэрызэрагъэпэщыну системэхэр.
- Гъуэгу хозяйствэм и лъэныкъуэ-кIэ къапщтэмэ, 2019 — 2020 гъэхэм ирагъэфIэкIуэнущ «Новопавловск — Прохладнэ — Мэздэгу», «Дей — Курп Ищхъэрэ — Осетие Ищхъэрэ — Аланием и гъунапкъэ», «Бабугент — Безенги», «Шэджэм ЕтIуанэ — Булунгу» гъуэгухэр, капитальнэу зэрагъэпэщыжынущ «Щхьэлыкъуэ — Каменкэ», «Балъкъ — Ингушлы» (Каменномост къуажэм нэс), «Куба — Псыхъурей — Кремконстантиновкэ», «Яныкъуей — Лашынкъей», «Дзэлыкъуэкъуажэ — Зольскэ — Белокаменкэ», «Прохладнэ — Елъхъуэт», «Прохладнэ — Лесной — Солдатскэ», «Налшык — Нарткъалэ», «Аруан — Уштулу» автомобиль гъуэгум къыхэкIыу Жэмтхьэлэ къуажэм екIуалIэ гъуэгухэр. Апхуэдэу гъуэгухэм шынагъуэншагъэ къыщызэгъэпэщыным, уэздыгъэхэр щыфIэдзэным гулъытэ хэха хуащIынущ.
- Зытепсэлъыхьахэм ящыщщ КъБР-м и Iэтащхьэм и къалэнхэр пIалъэкIэ зыгъэзащIэр республикэм и районхэм щыщыIам къалэухуэ лэжьыгъэм и IуэхукIэ законодательствэр гъэзэщIэным, щIыналъэ планхэр зэрызэхалъхьэ программэхэр гъэхьэзырыным, транспорт, социальнэ, коммунальнэ инфраструктурэм зегъэужьыным хуэгъэзауэ къыхилъхьауэ щыта унафэхэр зэрагъэзащIэр.
- ЗэIущIэм къыщаIэта Iуэхухэм теухуа докладхэр ящIащ КъБР-м и Правительствэм и УнафэщIым и япэ къуэдзэ КIэрэф М. А., КъБР-м и Правительствэм и УнафэщIым и къуэдзэ — КъБР-м инфраструктурэмрэ бжыгъэхэр зи лъабжьэ зыужьыныгъэмкIэ и министр Бэлэтокъуэ В. Хь., КъБР-м ухуэныгъэмрэ гъуэгу хозяйствэмкIэ и министр Къуныжь В. Хь. сымэ.
- КъБР-м и Iэтащхьэмрэ Правительствэмрэ
- я пресс-IуэхущIапIэ.