КъБКъУ-м и бжэхэр къыхузэIуах
2018-10-20
- Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетыр ящыщщ Кавказ Ищхъэрэм и еджапIэ нэхъыфIхэм. Абы щIэс студентищэхэм щIэныгъэ куу зэрырагъэгъуэтыным хущIокъу егъэджакIуэхэр, IэщIагъэлIхэр. Университетым иIэ къудамэхэмрэ абы щызэфIах егъэджэныгъэ унэтIыныгъэхэмрэ мы махуэхэм щыгъуазэ хуащI республикэм и курыт школхэм я класс нэхъыжьхэм щеджэхэр.
- «Бжэ зэIухахэм я махуэхэр» къызыхуэтыншэу къыщызэрагъэпэщащ университетым. ШколакIуэхэм къыхахыну IэщIагъэмрэ зыхуеджэну унэтIыныгъэмкIэ чэнджэщ щхьэпэхэр щрату, Iуэхум жыджэру хэтщ КъБКъУ-м и щIэны- гъэ лабораторэхэр, еджапIэ центрхэр. Ар IэмалыфIщ ныбжьыщIэхэр IэщIагъэхэм дегъэхьэхынымкIэ, я къэкIуэнур зыхуэдэ хъунур нэхъ пасэу яубзыхунымкIэ. Iуэхугъуэм теухуа хъыбархэр нэхъапэIуэкIэ щагъэIуауэ щытащ университетым и сайтым. Абы и фIыгъэкIэ «бжэ зэIухахэм» цIыху куэд кърихьэлIащ: еджакIуэхэри, адэ-анэхэри, егъэджакIуэхэри.
- — Мы Iуэхугъуэ щхьэпэм къызэщIиубыдэхэм ящыщщ дерс зэIухахэр егъэкIуэкIынри. Псори зэхэту школакIуэхэм папщIэ ягъэхьэзыращ Iуэхугъуэ 40-м щIигъу къыщыгъэлъэгъуа программэ хэха, — жиIащ КъБКъУ-м ныбжьыщIэхэр еджапIэ нэхъыщхьэм хуэгъэхьэзырынымкIэ и къудамэм и унафэщIым и къуэдзэ Корсаковэ Галинэ.
- Университетым и кафедрэхэм школакIуэхэм къащыIущIащ гу зэIухакIэ. ЕгъэджакIуэхэми ахэр гупсэхуу щыгъуазэ хуащIащ щхьэж иригъэдж предметымрэ IэщIагъэмрэ зыхуэдэм. КъинэмыщIауэ, ныбжьыщIэхэм папщIэ къызэрагъэпэщат экскурсиехэр, джэгукIэ зэмылIэужьыгъуэхэр, зэпеуэхэр, «стIол хъурей» зэIущIэхэр, проект хьэлэмэтхэм я презентацэхэр, нэгъуэщIхэри.
- Ялъэгъуамрэ зыхэта IуэхугъуэхэмкIэ арэзы хъууэ, къыхахыну IэщIагъэхэми нэхъыфIу егупсысыну Iэмал ягъуэту екIуэкIащ а зэхуэзэхэр.
- КЪАРДЭН Маритэ.