Гундэлэнрэ Зеикъуэрэ къыщыхъуахэм егъэпIейтей
2018-10-11
- Бахъсэн щIыналъэм и администрацэм щекIуэкIащ къуажэдэс щIалэгъуалэм я лIыкIуэхэр, къуажэхэм я администрацэхэм я Iэтащхьэхэр, дин лэжьакIуэхэр, спортым дихьэххэр зыхэта зэIущIэ.Абы щытепсэлъыхьащ мы гъэм фокIадэм и 18 — 19-хэм Гундэлэнрэ Зеикъуэрэ къыщыхъуахэм.
- Ирагъэблэгъахэм ящыщт Бахъсэн районым и прокурор Бэшорэ Аслъэнрэ Урысейм и МВД-м хабзэхэр хъумэнымкIэ и полицэм и «Бахъсэн» къудамэм и унафэщIым и къуэдзэ Алэкъул Армедрэ.
- ЗэIущIэр къыщызэIуихым Бахъсэн районым и администрацэм и Iэтащхьэ Балъкъыз Артур къызэхуэсахэр къыхуриджащ зэIухауэ икIи къехьэкI-нехьэкI хэмылъу а махуэхэм къэхъуахэр къызыхэкIа щхьэусыгъуэхэм тепсэлъыхьыну.
- «Ди дежкIэ мыхьэнэшхуэ иIэщ ди щIалэгъуалэр хабзэм ебэкъуэныр къызыхэкIар зэдгъэщIэну, ди щIалэхэм гъэсэны-гъэ тэмэм едгъэгъуэтын папщIэ тIэщIэкIахэр зэдгъэлъагъужыну», — къыхигъэщхьэхукIащ районым и администрацэм и Iэтащхьэм.
- Къэхъуа псоми куууэ егупсысын зэрыхуейм тепсэлъыхьащ щIыналъэм и администрацэм хабзэхъумэ IэнатIэхэм ядэлэжьэнымрэ коррупцэм пэщIэтынымкIэ и къудамэм и унафэщI Тохъутэмыщ Мухьэмэд. Абы къыхилъхьащ Iуэхур егъэфIэкIуэжынымкIэ лэжьыпхъэхэр.
- ПсыкIэху къуажэм и администрацэм и Iэтащхьэ Мамхэгъ Хьэчим ягу къигъэкIыжащ ныбжьыщIэхэр лъэпкъ, щэнхабзэ лъапIэныгъэхэм, зэгъунэгъуфI зэхущытыкIэхэм хузэщIэзэгъэушэ гупсысэхэм дегъэхьэхын зэрыхуейр. Апхуэдэу зэIущIэм къыщыхагъэщхьэхукIащ районым и депутатхэм къуажэдэсхэм драгъэкIуэкI лэжьыгъэр ирагъэфIэкIуэну и чэзу зэрыхъуар.
- Ислъамым цIыхухэр зыщыщ лъэпкъхэмкIэ зэрызэхимыгъэжыр жиIащ Кременчуг-Констатиновскэ къуажэм и ефэнды Гъут Артур. Абы дин лэжьакIуэхэр къыхуриджащ щIалэгъуалэм, ахэр зыIууэ гугъуехьхэм нэхъ гулъытэшхуэ хуащIыну. Къуажэхэм щолажьэ нэхъыжьхэм я советхэр, абыхэм лэжьыгъэшхуэ зэфIагъэкIыфынущ щIалэгъуалэр гъуэгу захуэ трагъэтын и лъэныкъуэкIэ.
- Ди лъэпкъхэр фIыуэ зэрызэхущытым икIи зэрызэрылъагъум я щапхъэхэр къихьащ Жанхъуэтекъуэ къуажэм и администрацэм и Iэтащхьэ Хьэмырзэ Заурбий. Ар езыр балъкъэрхэм я гъусэу мэпсэу.
- Хабзэхъумэ органхэм я лIыкIуэхэм къызэхуэсахэр къыхураджащ ядэIэпыкъуну, дзыхь хуащIыну. Абыхэм къыхагъэщхьэхукIащ яубыда щIалэхэм я нэхъыбэм ялэжьхэм къарикIуэнкIэ хъунухэр нэхъ пасэу гурагъэIуауэ зэрыщытар. АрщхьэкIэ зэремыдэIуам и зэранкIэ тезыр зэмылIэужьыгъуэхэр къатехуащ.
- ЗэIущIэм къыщащтащ апхуэдэ Iуэхугъуэхэр дяпэкIэ къэмыгъэхъун папщIэ зэфIагъэкIынухэм теухуа унафэ.
- Чылар Аринэ.