ЦIыхухэм я гукъыдэжыр къаIэт
2018-08-04
- Иджыблагъэ Профсоюзхэм щэнхабзэмкIэ я унэм щекIуэкIащ Адыгэ-абхъаз пшыналъэхэмрэ къафэхэмкIэ «Бзабзэ» гупым и концертышхуэ. Фигу къэдгъэкIыжынщи, ар зэхэзышар, гупым и художественнэ унафэщIыр ди республикэми гъунэгъу щIыналъэхэми фIыуэ къыщацIыху шыкIэпшынауэ, композитор, IуэрыIуатэдж, адыгэ макъамэ Iэмэпсымэхэр зыщI Иуаз Зуберщ.
- Зэман кIэщIым къриубыдэу цIыхубэм фIыуэ илъэгъуа, зи зэфIэкIым дихьэха къэфакIуэхэм, уэрэджыIакIуэхэм я утыку итыкIэр иджыри зэ зрагъэлъагъуну куэд къекIуэлIат. Псоми я нэгум гуфIэр кърихырт, я псэр зыхуэныкъуэ, я лъым хэт зыгуэр къызэрагъуэтыжам щыхьэт техъуэу.
- Зыр зым кIэлъыкIуэу утыкум къихьэ артистхэм япыплъхьэн щыIэкъым. Я IэщIагъэм фIыуэ зэрыхащIыкIым къыдэкIуэу, я лэжьыгъэхэри хэщыпыхьа дыдэу къыхэхащи, гур ягъэгуфIэ, псэм йодэхащIэ, пкъынэм хо- хьэ.
- Убых лъапэрыфэхэр, адыгэ пшыналъэ шэрашэхэр, ислъэмей щIэлъэтхэр, макъ гуакIуэкIэ ягъэзащIэ лъэпкъ уэрэдхэр… — дэтхэнэр жыпIэн, къулейщ «Бзабзэм» и программэр. Артист нэIурытхэу Шурдым Жансэт, Къардэн Тимур, пшынауэхэу Тхьэлыджокъуэ Сюзаннэрэ Iэпсэ Дианэрэ, Къуныжь Вячеслав, Къунаш Темыркъан, Къущхьэ Iэсият (хореограф), Щоджэн МэчрэIил (балетмейстер), нэгъуэщI куэдми я зэфIэкIым щыгъуазэхэри, ахэр иджы япэу зылъагъухэри хьэщыкъ зэрахуэхъуам шэч хэлъкъым.
- Концертыр щиухам цIыхухэр зэбгрыкIыжыну хуейтэкъым. Адыгэ гъуазджэм и губгъуэм иджыри тIэкIу зыщаплъыхьыну зэрагуапэр цIыхухэм я нэгум къищырт. «Бзабзэм» и къыкIэлъыкIуэ концертым ахэр зэрыпэплъэнур слъагъу хуэдэщ.
- ИСТЭПАН Залинэ.
- Сурэтыр Къарей Элинэ трихащ.