Хэкужьым щIыхуэ къытенэркъым
2018-08-04
- Щамым къикIыжу Хэкум къэзыгъэзэжахэм яхьэлIа лъэпощхьэпор мащIэкъым. Ауэ узыгъэгужьейуэ зэфIумыхыфынуи щыткъым. Псоми езым ехьэлIа кIуапIэрэ Iэмалрэ яIэжщ. Арами, дызэмыупщIыжу къанэркъым: «Сыт мы Iуэхум щынэхъыщхьэу къэплъытэ хъунур?»
- Абы и жэуапым дыщолъыхъуэ Къэрэшей-Шэрджэсым къихьэжауэ щыта ди лъэпкъэгъухэм я нэхъыбэр здекIуэлIа, илъэс бжыгъэкIэ зи нэIэ щIэта Али-Бэрдыкъуэ (Хьэгъундыкъуей) къуажэм. Абы и Iэтащхьэ Иуан Руслан ди псэлъэгъущ.
- — Щамым къикIыжа ди лъэпкъэгъухэр мы къуажэм къызэрыдыхьэрэ, ди деж щыпсэухэм ящыщу зы цIыху къэнакъым абыхэм зыгуэркIэ емыгуэпауэ. Къуажэм и бзылъхугъэ советым кърихьэжьэри, къэкIуэжа унагъуэхэм гъэш хуахьыныр хабзэ хъуауэ щытащ. Ахэр пIалъэкIэ зыщIэдгъэтIысхьэн хапIэ къуажэм къыщыдмыгъуэтуи къэнакъым. Иужьым Арэшыкъуэ РэIуф унэ яхуиухуащ, Аргун Олеги щIапIэ къищэхужри иригъэтIысхьащ. НобэкIэ я псэупIэкIэ зэпэщщ.
- — Къэзыгъэзэжа ди лъэпкъэгъухэм гукъеуэ нэхъыщхьэу къалъыкъуэкIауэ къэплъытэр сыт?
- — Нобэ Хэкужьым щыпсэу адыгэхэм я гукъеуэ дыдэхэращ къэкIуэжахэми я гу- къеуэр. Паспорт зэрагъэпэщыныр Iуэхум хэпхмэ, ди IэщIагъэкIэ нэгъэсауэ IэнатIэ зэрыдмыгъуэтыр, лэжьапIэншэр зэрымымащIэр — аращ къэкIуэжа ди лъэпкъэгъухэ-ри зыпэщIэхуэр. Ауэ ар уизыгъэкIуэтын гугъуехьу къэслъытэркъым. Тхьэм и шыкуркIэ, къэзыгъэзэжахэр иджы я лъэпкъ, я къуажэ, я гукъеуэр зыхэзыщIэ, закъыщIэзыгъэкъуэну хьэзыр цIыху яхэсщ. Аращ нэхъыщхьэу къэслъытэр.
- Хэкужьым къихьэжахэм, ди къуажэм, районым щыпсэухэм Аргун Олег мылъку-кIи, лэжьапIэ IэнатIэ къаритынымкIи, псэупIэ яхуиухуэнымкIи, яхузэригъэпэщыжыным-кIи зэрызащIигъакъуэр къыхэгъэщыпхъэщ. Абы и щапхъэр куэдщ.
- Ди лъэпкъэгъухэр мы къуажэм къызэ- рыдыхьэжрэ зыдэIэпыкъупхъэу ди нэIэ зытетхэм ахэр яхэдгъэхьэри, Хасэми жылэми зыщIагъэкъуащ. Унагъуэ щхьэхуэхэм къыщыщIэдзауэ, хьэрычэтыщIэхэм я деж щыщIэкIыжу гуфIэгъуэми нэщхъеягъуэми къыхэкIа ерыскъы Щамым къикIыжахэм къыхуамыхьу, езыхэм яшхакъым. ХьэрычэтыщIэхэращи, псалъэм папщIэ, АбытIэ Мухьэмэд илъэс къэси кърихьэлIэж лэжьы-гъэм щыщ къахуригъашэу щытащ.
- Хэкужьым щIыхуэ къытенэркъым. Ар щхьэщытхъугъэкъым, атIэ Iэмал имыIэу бгъэлъэгъуапхъэ Iуэхущ. Нобэ хамэ хэкум щыпсэухэм ялъагъун, къагурыIуэн хуейщ — паспортым, тхылъхэм япыщIа гугъуехь гуэрхэр щыIэми, Хэкужьым къагъэзэжмэ, зыри утыкум къинэнукъым, хапIэншэ, псэупIэншэ хъунукъым.
- Епсэлъар БЕМЫРЗЭ Зурабщ.