Гъэ еджэгъуэр зэхуащIыж
2017-06-10
- Къып Мухьэмэд и цIэр зезыхьэ ГъуазджэхэмкIэ сабий школым, Къулъкъужын Ищхъэрэ къуажэм дэтым, гъэ еджэгъуэр щызэхуащIыжащ. Ар адыгэ хабзэм и махуэшхуэ щIыкIэу къызэрагъэпэщащ.
- Зэхыхьэм и хьэщIащ Бахъсэн район администрацэм и Iэтащхьэм и къуэдзэ Iэхъуэбэч Ан-дзор, КъБР-м и цIыхубэ сурэтыщI, ХудожествэхэмкIэ Европэм и академием хэт КIыщ Мухьэдинрэ абы и щхьэгъусэ Мосс Жаклинрэ, УФ-мрэ КъБР-мрэ я СурэтыщIхэм я зэгухьэныгъэм хэт Бгъэжьнокъуэ Заурбэч, журналист икIи режиссёр Думэныщ Фарид.
- Зэхыхьэр къыщызэIуахым адыгэ лъэпкъ хабзэхэм тепсэлъыхьащ, школ пщIантIэм и Iэгъуэблагъэм щагъэува пасэрей лъэпкъ хьэпшыпхэмрэ Iэмэпсымэхэмрэ ягъэлъэгъуащ, абыхэм я тхыдэм и гугъу ящIащ.
- Школым и гъэсэнхэм къафэм щаIэ зэфIэкIхэр утыку кърахьащ. Къызэхуэсахэм я пащхьэм абыхэм щагъэлъэгъуащ лъэпкъ къафэ гъуазджэм и курыхымрэ и дахагъэмрэ. КърихьэлIахэмрэ хьэщIэхэмрэ ягу дыхьащ музыкант ныбжьыщIэхэм я пшынэ гъэбзэрэбзэкIэр. Абыхэм гукъинэж ящыхъуащ пасэрей къафэм и макъамэр зэрагъэзэщIар.
- Пшыхьым и программэм къафэмрэ макъамэмрэ къадэкIуэу хуэфащэ увыпIэ щаубыдащ лъэпкъ шхыныгъуэхэми. Адыгэ фащэ екIухэр зыщыгъ еджакIуэхэм ахэр утыку кърахьащ икIи щхьэхуэу къытеувыIащ дэтхэнэри зэрагъэхьэзырамрэ къызыхащIыкIамрэ. ХьэщIэ цIэрыIуэхэм къыхагъэщащ языныкъуэ шхыныгъуэхэр зэрагъэхьэзыр щIыкIэм и мызакъуэу, абыхэм я цIэхэри зэрамыщIэр.
- ЕджакIуэхэм мастер-класс ятащ щхьэщIэлъэныкъуэр зэрагуэшым теухуауэ. ХьэщIэхэм я дежкIэ саугъэтыфI хъуащ пасэрей, иджырей адыгэ уэрэдхэр шыкIэпшынэкIэ зыгъэзащIэ ХьэхъупащIэ Амырхъан а Iуэхум къызэрырихьэлIар. Апхуэдэу щIэщыгъуэт КIыщ Мухьэдин, ГъуазджэхэмкIэ сабий шко-лым и унафэщI КIуж Ритэ сымэ ягъэлъэгъуа пасэрей адыгэ джэгукIэр.
- ГуфIэгъуэ зэхыхьэхэм зэрыщыхабзэу, пшыхьыр «Удж хэш» къафэмкIэ зэхуащIыжащ.
- Бахъсэн район администрацэм и пресс-IуэхущIапIэ.