НэхъыфIхэмкIэ зэдогуашэ
2015-12-09
- Налшык къалэ дэт, Пушкиным и цIэр зезыхьэ 5нэ курыт еджапIэм щекIуэкIащ граждан, хэкупсэ гъэсэныгъэхэмкIэ республикэм щызэфIагъэкI лэжьыгъэхэр къызэщIэкъуэжыным, нэхъыфIхэмкIэ зэдэгуэшэным теухуа семинар.
- ХьэщIэхэу къахуеблэгъат КъэбэрдейБалъкъэрым и Парламентым ЕгъэджэныгъэмкIэ, щIэныгъэмрэ щIалэгъуалэ политикэмкIэ и комитетым и унафэщI Азычэ Светланэ, Ветеранхэм я Налшык къалэ советым и тхьэмадэ Абдуллаев Мустэфа, КъБРм егъэджэныгъэмкIэ, щIэныгъэмрэ щIалэгъуалэм я IуэхухэмкIэ и министрым и къуэдзэ Геккиев СулътIан, КъБРм Граждан, жылагъуэ институтхэм ядэлэжьэнымрэ лъэпкъ IуэхухэмкIэ и управленэм и унафэщI КIурашын Анзор сымэ. Конференцым кърихьэлIат школым и унафэщI Емуз Светланэ, абы и къуэдзэхэу Щауэ Спартак, Iэрыпщ Мурат, Мэлбахъуэ Тимборэ и цIэр зезыхьэ библиотекэм и лэжьакIуэ ПащIэ Тамарэ сымэ, нэгъуэщIхэри.
- ЗэIущIэр къызэIуихащ Азычэ Светланэ. Ар тепсэлъыхьащ гъэ еджэгъуэ блэкIам мы Iуэхум теухуа уэ зэфIагъэкIахэм, абыхэм яIэ мыхьэнэм, дяпэкIи ирагъэкIуэкIыну ягу илъхэми я гугъу ищIащ.
- Школым и унафэщI Емуз Светланэ и псалъэм къыхигъэщащ граждан, хэкупсэ гъэсэныгъэхэмкIэ республикэм щекIуэкI сыт хуэдэ зэхьэзэхуэми я еджакIуэхэм ехъулIэныгъэхэр къызэрыщахьыр икIи абыкIэ зэрыгушхуэр. Нобэрей зэIущIэр я Iуэху зехьэкIэмкIэ, яIэ ехъулIэныгъэхэмкIэ псоми ядэгуэшэн мурадкIэ къызэрызэрагъэпэщари къыхигъэщащ.
- Абдуллаев Мустэфа жиIащ курыт еджапIэмрэ граждан, хэкупсэ гъэсэныгъэмрэ зэпыщIэныгъэ зэраIэр, сабийхэр абы щIэпIыкIын зэрыхуейр. Абы гу зэрылъитамкIэ, республикэм а Iуэхум теухуауэ илъэс блэкIам зэхьэзэхуэ, зэIущIэ щэ бжыгъэхэр щекIуэкIащ, еджакIуэ цIыкIухэри жыджэру абы хэтащ.
- ЕджапIэмрэ библиотекэмрэ а Iуэхум пыщIэныгъэу хуаIэм теухуауэ щытащ ПащIэ Тамарэ ищIа докладыр.
- АдэкIэ утыку кърахьащ семинарым теухуа гъэлъэгъуэныгъэхэр, ирагъэкIуэкIа зэхьэзэхуэхэм, абыхэм пашэныгъэр щызыIыгъахэм я гугъуи ящIащ.
- ХЬЭРЭДУРЭ Аллэ.