Къапэщылъхэр мащIэкъым
2014-03-01
- КъБР-м и Правительствэм и Унэм дыгъуасэ щызэхэтащ республикэм Узыншагъэр хъумэнымкIэ и министерствэм къызэригъэпэща зэIущIэ. Абы къыщапщытэжащ республикэм Узыншагъэр хъумэнымрэ курортхэмкIэ и министерствэр блэкIа илъэсым зэрылэжьар.
- ЗэIущIэм хэтащ Къэбэрдей-Балъкъэр Республикэм и Iэтащхьэм и къалэнхэр пIалъэкIэ зыгъэзащIэ КIуэкIуэ Юрий, УФ-м и Президентым и полномочнэ лIыкIуэу Кавказ Ищхъэрэ Федеральнэ округым щыIэм и аппаратым Къэбэрдей-БалъкъэрымкIэ и федеральнэ инспектор нэхъыщхьэ Вербицкий Алексей, Правительствэм и УнафэщI Храмов Константин, республикэм и Парламентым и УнафэщIым и къуэдзэ Саенкэ Татьянэ, КъБР-м и Iэтащхьэм и къэрал чэнджэщэгъу Къэрмокъуэ Хьэчим, ведомствэ щхьэхуэхэм, район администрацэхэм я Iэтащхьэхэр, медицинэ IуэхущIапIэхэм я дохутыр нэхъыщхьэхэр.
- КъБР-м узыншагъэр хъумэнымкIэ и министр Шэт Ирмэ зэIущIэр зэрекIуэкIынум къызэхуэсахэр щигъэгъуазэри, зыубгъуауэ тепсэлъыхьащ 2013 гъэм министерствэм и лэжьыгъэр зэрекIуэкIам икIи адэкIэ къапэщылъ къалэнхэм. Абы и гугъу ищIащ я унэтIыныгъэм щызыIэрагъэхьа ехъулIэныгъэхэм, апхуэдэуи къыхигъэщащ зыIууэ гугъуехьхэмрэ абыхэм я хэкIыпIэ хъунухэмрэ.
- Апхуэдэу зыпэрыт IэнатIэм щекIуэкI лэжьыгъэр зыхуэдэр къагъэлъагъуэу зэIущIэм къыщыпсэлъащ Iэмал зимыIэ медицинэ страхованэмкIэ щIыналъэ фондым, УФ-м узыншагъэр хъумэн IэнатIэм кIэлъыплъынымкIэ IуэхущIапIэм и къудамэу КъБР-м щыIэм я унафэщIхэу Литовченкэ Татьянэрэ Расторгуевэ Светланэрэ.
- Къэпсэлъахэм жаIахэм едэIуа иужь, КъБР-м и Iэтащхьэм и къалэнхэр пIалъэкIэ зыгъэзащIэ КIуэкIуэ Юрий жиIащ узыншагъэр хъумэн IэнатIэр гулъытэ нэхъыбэ зыхуэщIын хуей унэтIыныгъэхэм зэращыщыр, къытеувыIащ сымаджэхэр хущхъуэкIэ къызэгъэпэщыным, щIэуэ ягъэува медицинэ Iэмэпсымэхэм ирилэжьэн IэщIагъэлIхэр гъэхьэзырыным, дохутырхэм я Iэзагъэм хэгъэхъуэным теухуауэ лэжьыгъэ пыухыкIахэр зэфIэгъэкIын зэрыхуейм.
- — Узыншагъэр хъумэн IэнатIэм щыIэ гугъуехьхэр нобэкъым къыщыкъуэкIар, ахэр илъэс бжыгъэкIэ зэтрихьащ, — жиIащ КIуэкIуэ Юрий. – Ауэ, дауэ мыхъуми, дэ ди къалэнщ псори дызэкъуэувэу а унэтIыныгъэр зэредгъэфIэкIуэным дыхущIэкъуну.
- КIуэкIуэ Юрий зэIущIэм къыщипсэлъар ди газетым и къыкIэлъыкIуэ номерым тетынущ.
- ЩхьэщэмыщI Изэ.