Псори щIэщыгъуэщ, дахэщ, хэIэтыкIащ
2014-02-13
- Ди газетым хъыбарегъащIэу зэрытетащи, Къэбэрдей-Балъкъэр Республикэм щэнхабзэмкIэ и министрым и къалэнхэр зыгъэзащIэ Фырэ Руслан иригъэкIуэкIащ Сочэ щекIуэкI ЩIымахуэ Олимп Джэгухэм зэрыщыIа махуэхэм, абы щилъэгъуахэм ятеухуа пресс-конференц. Республикэм и телевиденэхэм, радиом, газетхэм я журналистхэм яфIэгъэщIэгъуэнт тхыдэм къыхэнэну Iуэху дахэм ехьэлIа сыт хуэдэ хъыбарри.
- — Ди республикэм дежкIэ Олимпиадэр тIэкIу нэхъ пасэу щIидзащ, — къыхигъэщащ министрым, — сыту жыпIэмэ, Дунейпсо Олимп комитетым и сессиер къыщызэIуих зэIущIэм (мазаем и 4-м), ди къэралым и Президент Путин Владимир, езы комитетым и унафэщIыр, къэралхэм я лIыщхьэхэр зыщIэсам, хэтащ «Кабардинка» къэрал академическэ къэфакIуэ ансамблым и артистхэр — Кавказ Ищхъэрэм икIа гуп закъуэр. Аращи, «Кабардинка»-р абы лъандэ- рэ Сочэ щыIэщ. ИтIанэ хэIэтыкIауэ езы Олимпиадэ хужьыр къызэIуа-хащ.
- Къыхэбгъэщмэ, япэрей Сочэмрэ иджы дызрихьэлIамрэ, зэрыжаIэу, шурэ лъэсрэ я зэхуакущ. ГъуэгукIи, ухуэныгъэкIи, езы къалэм и теплъэ псомкIи къапщтэмэ, щIэращIэщ, зиужьащ, дэнэ щIыпIэ къикIа цIыхуми утемыукIытыхьу ебгъэлъагъу хъуну. «Фыщт» стадионращи, нэри пэри ехь, къэбгъэлъагъуэмэ, Налшык нэхъ ин дыдэу дэт унэшхуэхэм ящыщу зыбгъупщI ихуэну абрагъуэщ.
- Арэзы укъэзымыщI гуэрхэр и къызэгъэпэщыкIэм хэслъэгъуами, псори дахэт, щIэщыгъуэт, хэIэтыкIат. ГъэщIэгъуэныщэт Урысей Федерацэм и лъэпкъхэм я гъэлъэгъуэныгъэр. Кавказ Ищхъэрэ федеральнэ округым хыхьэ щIыналъэхэр дызэгурыIуэу зэгъусэу утыку къитхьа экспозицэм дэтхэнэ щIыналъэми и щэнхабзэ хъугъуэфIыгъуэхэр, лъэпкъхэр дызыхуэIэзэхэр щыдгъэлъагъуэ плIанэпэ щхьэхуэхэр щыхухэтхат. IэщIагъэм и щэхухэм зэрыщыхагъэгъуазэм къыдэкIуэу, хьэпшып, сурэт зэмылIэужьыгъуэу здэтшахэр тыгъэ яхуэтщIырт хьэщIэхэм. «Адыгэ унэр»-щэ! Абы дэтхэнэри щыгъуазэ щыхъурт лъэпкъым и тхыдэмрэ и хабзэхэмрэ.
- ЖыпIэнуракъэ, Сочэ адыгэхэм я щIыналъэу зэрыщытам теухуауэ жаIа щымыIэу къызыщыхъухэр мымащIэми, дэ абы щыдгъэлъэгъуа щэнхабзэ программэр (ди республикэм икIауэ абы хэта творческэ гупыр цIыху 60 хъурт) лъэпкъыр зэрыпсэур, зэрефIакIуэр дуней псом къыщащIэнымкIэ хэлъхьэныгъэфIу си щхьэкIэ къызолъытэ. Слъэгъуа псом къызита гупсысэм укъытеувыIэмэ, гуфIэр зи нэгу кърих цIыхухэм дэнэкIи уазэрыщыIущIэр гухэхъуэт. Уеблэмэ, билетхэр зыIэрагъэхьэным текIуадэ зэманри къайхьэлъэкIыртэкъым, гуфIэжу, дэрэжэгъуэ яIэу я Iуэху яужь ихьэжырт.
- ЯпэкIэ дызыщыгъуазэу дежьа программэм къыдэкIуэу, Олимп паркым щекIуэкIа концертхэм иужькIэ, «Кабардинка»-м и къафэхэм мызэ-мытIэу щIэупщIэ иIащ. Псалъэм папщIэ, цIыху 200 хъу хьэщIэ хэIэтыкIахэм папщIэ къызэрагъэпэща концертым къафиплI щигъэзэщIащ абы. Шынагъуэншагъэр къызэзыгъэпэщ IэнатIэм и лэжьакIуэхэр ди гупым и концерт щIэлъэIуати, тхуэгъэщIэхъуакъым. Апхуэдэуи Лондон дэт Урысей-британ унэм «Кабардинка»-р ирагъэблэгъэну зэрыхуейми щыгъуазэ дащIащ, — жиIащ Фырэ Руслан.
- АдэкIэ Фырэр къатеувыIащ езы спорт зэхьэзэхуэхэм, апхуэдэуи журналистхэм я упщIэхэм жэуап иритащ. Министрым жиIащ ди республикэм ираша видеохэр экранышхуэкIэ дахэу къызэрагъэлъэгъуар, режиссёр лэжьыгъэм щыщIэныгъэу хилъэгъуахэм къытеувыIащ (Iуэхум щIыхуэнабдзэгубдзаплъэр езыр зэрырежиссёрыр арагъэнщ), Олимпиадэр зэрызэхуащIыжым иращIэкIыну гуфIэгъуэ зэхыхьэхэр нэхъ щIэщыгъуэж хъуну зэрыщыгугъыр, абы хуагъэхьэзыра хорым ди республикэм щыщ сабии 10 зэрыхэтынур, нэгъуэщIхэри.
- ИСТЭПАН Залинэ.