Республикэр ирогушхуэ
2013-12-26
- КъБР-м Спортымрэ туризмэмкIэ и министерствэм щекIуэкIа пресс-конференцым Къэбэрдей-Балъкъэрым и спортсменхэм текIуэныгъэхэр щызыIэрагъэхьа Iэпщэрыбанэ бэнэкIэмкIэ Волгодонск къалэм (Ростов область) щекIуэкIа Урысей чемпионатым кърикIуахэр щызэхалъхьэжащ.
- Журналистхэм яхуэзащ спортымрэ туризмэмкIэ и министрым и къалэнхэр зыгъэзащIэ АфIэунэ Аслъэн, абы и къуэдзэ Мамхэгъ Хьэчим, тренер Дыджэ Алим, зэIущIэр зытеухуа бэнакIуэхэу Мырзэкъан Азэмэт, Беслъэней Нурмухьэмэд, Шорэ Альберт, Тенджыз Арсен, Тхьэкъуахъуэ Мартин, АфIэунэ Аскэрхъан, Борэн Алим сымэ.
- АфIэунэ Аслъэн щIалэхэм я ехъулIэныгъэхэмкIэ ехъуэхъуащ, псоми я зэхуэдэ Iуэхум хуащI хэлъхьэныгъэм папщIэ фIыщIэ яхуищIащ.
- — Фи ехъулIэныгъэхэм зэрыхэвгъахъуэм, тренерхэм я лэжьыгъэм я фIыгъэкIэ Iэпщэрыбанэ бэнэкIэр Урысейм СпортымкIэ и министерствэм республикэм лъабжьэ быдэ щызиIэ лIэужьыгъуэхэм хигъэхьащ. Абы зэхьэзэхуэ, зыгъэсэныгъэ инхэм хэтынымкIэ Iэмал къитынущ, мылъку-техникэ дэIэпыкъуныгъэ кърикIуэнущ,- жиIащ министрым.
- Спортсменхэм я тренерхэу Мамхэгъхэ Хьэчимрэ Iэдэмрэ «Уф-м щIыхь зиIэ и тренер» цIэ лъапIэр къыхуагъэфэщащ.
- УАРДЭ Жансурэт.