Путин Владимир япэ иригъэщхэр
2013-12-13
- Дыгъэгъазэм и 12-м УФ-м и Президент Путин Владимир Урысей Федерацэм и Федеральнэ Зэхуэсым Зэрызыхуигъазэр утыку кърихьащ.
- ФедерацэмкIэ Советым хэтхэмрэ Къэрал Думэм и депутатхэмрэ защыхуигъазэм къэралым и Iэтащхьэм жиIащ мазэ зыбжанэ и пэкIэ и къулыкъум щыпэрыувэм къытригъэдза тхыгъэхэмрэ май унафэхэмрэ и Iуэху бгъэдыхьэкIэр IупщIу къыхэщу зэрыщытар. Ахэр ехьэлIат гъащIэм и унэтIыныгъэ псоми: экономикэм, псэукIэм, къэрал кIуэцI политикэм, дунейпсо Iуэхухэм, шынагъуэншагъэр къызэгъэпэщыным, нэгъуэщIхэми. Иджы щыщIэдзауэ екIуэкI лэжьыгъэхэрщ, мурадхэрщ Путин Владимир и Зэрызыхуигъазэм лъабжьэ хуэхъуар. Ар къытеувыIащ къэкIуэнум зэрыхуэкIуэ лъэбакъуэщIэхэм хэлъ щхьэхуэныгъэхэм, Урысейм и иджырей зыужьыныгъэмрэ и къэкIуэнумрэ дэ тщыщ дэтхэнэ зыми хищIыхьын хуей къалэнхэм.
- Ди къэралым и унафэщIым къыхигъэщахэм я гугъу пщIымэ, къэбгъэлъагъуэ хъунущ Урысей Федерацэм лъэпкъ зэныбжьэгъугъэр щыгъэбыдэным цIыхубэр къызэрыхуриджар. «Псори дызэкъуэту иужь дитыпхъэщ а Iуэхум, лъэпкъ зэгурыIуэныгъэр тхъумэн, жылагъуэм я зэкъуэтыныгъэмрэ Урысей къэралыгъуэшхуэм и лъэщагъымрэ дыхуэсакъын хуейщ», — жиIащ Путиным Федеральнэ Зэхуэсым хэтхэм защыхуигъазэм.
- — Зэныкъуэкъумрэ зэгурымыIуэныгъэмрэ къэзышэр щэнхабзэм пэIэщIэ, зи хабзэм пщIэ хуэзымыщI цIыху щхьэхуэхэрщ, — дыщIигъуащ абы.
- ИлъэсипщI блэкIам къащтауэ нобэр къыздэсым лажьэ демографие программэхэм сэбэпынагъ куэд къызэрыпэкIуар жиIащ Президентым. Къэралым ис цIыху бжыгъэр зэпIэзэрыт зэрыхъуам и мызакъуэу, къалъхур нэхъыбэ хъууэ хуежьащ. БлэкIа щIышылэ-фокIадэ мазэхэм тепщIыхьмэ, цIыху мин 200-кIэ нэхъыбэ дыхъуащ. ЛIэм нэхърэ къалъхум я бжыгъэм зэрыхэхъуам щыгуфIыкIыу пэшым щIэсхэм Iэгуауэ яIэтащ.
- — Урысейр хуэныкъуэщ щIэныгъэ зыбгъэдэлъ, губзыгъэ, лэжьыгъэм зыщызымыдзей IэщIагъэлIхэм. Ди деж къэкIуэну хуей куэд щыIэщ. Ахъшэ къалэжьу кIуэжын мыхъуу, Урысейр зи хэкуу къэзылъытэ куэд зэрыщыIэм дыщыгъуазэщ. Ауэ щыхъукIэ, иджыпсту щыIэ унафэхэр зыкIи сэбэп хъуркъым а IуэхумкIэ, УФ-м и гражданствэр абы и цIыхуу нэгъуэщI щIыпIэ щыпсэум къыдихын папщIэ лъэпощхьэпо куэд ирохьэлIэ. Унафэ сощI а Iуэхур нэхъ псынщIэу зэрызэфIэкIыну Iэмалхэр яубзыхуу, урысыбзэм ирипсалъэ ди лъэпкъэгъухэмрэ Урысей къэралыгъуэмрэ Совет Союзымрэ къыщалъхуахэм я бынхэу хамэ къэралхэм щыпсэу ди хэкуэгъухэмрэ а Iуэхур тынш щащIыну.
- Дзэм хэтхэмрэ ветеранхэмрэ унэ етыным, щIалэгъуалэм лэжьыгъэ яIэным, социальнэ IэнатIэ пэрытхэм гулъытэ яхуэщIыным, лъэпкъхэм я лъапIэныгъэхэр щахъумэ институтхэм зегъэубгъуным, лъэпкъ зыхэщIыкIыр Iэпэдэгъэлэл тщIы зэрымыхъунум, Iулъхьэм ебэныным, нэгъуэщIхэми теухуауэ ялэжьахэмрэ дяпэкIэ ящIэну я мурадхэмрэ убгъуауэ тепсэлъыхьащ Президентыр.
- — Сэ захузогъазэ Урысей Федерацэм хыхьэ хэгъуэгухэм я Iэтащхьэхэм, губернаторхэм, къалэшхуэхэм я унафэщIхэм. Зыужьыныгъэм папщIэ зэфIэкIын хуей псоми фэри фи гуащIэ хэлъын хуейщ. Махуэ къэс цIыхубэм фадэлэжьэн, хъер къызыпэкIуэн Iуэхухэр фубзыхупхъэщ.
- — Куэдрэ жысIащ иджыри къытызогъэзэж. Урысейр лъэщ хъун папщIэ абы и цIыху, дэ, нэхъыбэ дыхъун, хабзэ щхьэхуэхэм дытетын, лэжьыгъэм, творчествэм дыщынэхъыфIын хуейщ, — жиIащ Путин Владимир.
- НэщIэпыджэ Замирэ.