Хабзэм тетыным хуаущий
2023-01-26
- Аруан районым и полицейхэм школакIуэ цIыкIухэм драгъэкIуэкI гъуэгум шынагъуэншэу щызекIуэным и дерсхэр.
Урысей МВД-м Аруан районым щиIэ къудамэм и Къэрал автоинспекцэм и лэжьакIуэхэм «Сабийхэр — гъуэгум» республикэпсо Iуэхум хыхьэу, гъуэгум зэрыщызекIуапхъэ хабзэхэр ирагъэщIэн мурадкIэ квест-джэгукIэ къызэрагъэпэщащ Псыгуэнсу къуажэм и курыт школ №1-м и пэщIэдзэ классхэм щеджэхэм папщIэ.- ШколакIуэхэм зрагъэщIащ гъуэгу дамыгъэхэмрэ светофор плъыфэхэмрэ я мыхьэнэр, къызэхуэсахэм ирагъэлъэгъуащ тематикэ гъэлъэгъуэныгъэ цIыкIухэр, транспортхэм теухуа къуажэхьхэр къащIэри, автомашинэ щызекIуэ щIыпIэм шынагъуэншэу зэрыщызэпрыкIыпхъэри зэпкърахащ.
- Полицэм и лэжьакIуэхэр сабийхэм яхутепсэлъыхьащ жэщым къаблэ пкъыгъуэхэр лъэсырыкIуэхэм яIэн зэрыхуейм икIи дэтхэнэми апхуэдэхэр иратащ.
- — Гъуэгум щысакъыныр сабийхэм щыцIыкIум къыщыщIэдзауэ яхэлъхьэныр къытщIэхъуэ щIэблэр гъэсэным, лъэсырыкIуэхэм я гъащIэр хъумэным и унэтIыныгъэ нэхъыщхьэщ, — жаIащ автоинспекторхэм.
- IуэхущIапIэм и гъэсакIуэхэм къыхагъэщащ мыпхуэдэ дерсхэр егъэкIуэкIыным сабийхэм жэуаплыныгъэ зэрахилъхьэр, гъуэгухэм набдзэгубдзаплъэу щыщытыным къызэрыхуриджэр.
- ЗэIущIэм и кIэухыу сабийхэм ягъэхьэзыращ гъуэгум зэрыщызекIуэ хабзэм (ПДД) теты-ным балигъхэр къыхуезыджэ видеозыхуэгъэзэныгъэ икIи ар адэ-анэхэм я чатхэм иралъхьащ.
- БАХЪСЭН Ланэ.