ХъуэпсапIэхэр нахуапIэ мэхъу
2022-06-01
- Урысейм и щIыналъэхэм ящыщу социальнэ туризмэмкIэ программэр зыгъэзащIэ хэгъэгу зыбжанэм яхэтщ Къэбэрдей-Балъкъэрри. Ар хуэунэтIащ сабий зеиншэхэм, адэ-анэхэм я нэIэм щIэмыту къэнахэм, апхуэдэуи балигъыпIэ имыувахэм я IуэхухэмкIэ щыIэ комиссэм и учётым щытхэу зи ныбжьыр илъэси 7-м щегъэжьауэ 14-м нэсхэм нэгузегъэужь Iуэхугъуэхэр, зыплъыхьакIуэхэр къахузэгъэпэщыным.
- Мы махуэхэм социальнэ туризмэм и программэмкIэ Налшык кърагъэблэгъащ Шэджэм, Iуащхьэмахуэ районхэм щыщ сабий 28-рэ. Абыхэм къалэм зыщрагъэплъыхьащ, КъБР-м и Лъэпкъ музейм къыщызэрагъэпэща гъэлъэгъуэныгъэми яшащ, ХьэтIохъущокъуэм и жыг хадэм я нэгу зыщрагъэужьащ.
- Сабийхэр хъумэным и дунейпсо махуэм ирихьэлIэу ягъэзащIэ проектым Налшык дэт аттракционхэм я паркри къыхыхьащ. Абы и лэжьакIуэхэм цIыкIухэм я хъуэпсапIэхэр нахуапIэ хуащIу, щхьэж зыхуей хъыринэ зэмылIэужьыгъуэхэм пщIэншэу ирагъэсащ, апхуэдэуи паркым ит шхапIэхэм ерыскъы щIэщыгъуэхэмкIэ шэджагъуашхэ щрагъэщIащ.
- Мыпхуэдэ псапащIэ Iуэхухэр социальнэ проектым хэту «Путешествие» туроперато-рым иджы ебгъуанэу къызэрегъэпэщ.
- Тхьэхущынэ Ланэ.