ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ

АДЫГЭ ПСАЛЪЭ

И лэжьэкIэм къыхуихьа пщIэ

2018-07-10

  • РСФСР-м щIыхь зиIэ, УФ-м и цIыхубэ артисткэ, театрымрэ киномрэ я актрисэ, роль куэд урысей киноми театр зэхуэмыдэхэми щызыгъэзэщIа, цIыхубз роль мынэхъыщхьэу ищIахэм ящыщу («Небеса обетованные», «Изображая жертву» лэжьыгъэхэм) нэхъыфIу къалъытахэм къыпэкIуэу «Ника» саугъэтыр тIэу къызрата бзылъхугъэ цIэрыIуэ АхъуэджакIуэ Лие Мэжид и пхъур илъэс 80 ирикъуащ.

  • «АхъуэджакIуэ» адыгэ пщы лъэпкъым къыхэкIа хъыджэбз цIыкIур 1938 гъэм бадзэуэгъуэм и 9-м Украинэм хыхьэ Днепропетровск къалэм къыщалъхуащ. Ар къыщыхъуащ Адыгэ Республикэм и Мейкъуапэ къалэм. Абы и адэ-анэр гъуазджэм и лэжьакIуэт: и адэ Мэжид Сэлихь и къуэр Адыгэ драмэ театрым и къызэгъэпэщакIуэт икIи и режиссёр нэхъыщхьэт, и анэ Юлие Александр и пхъур а IуэхущIапIэм и актрисэт. Фигу къэдгъэкIыжынщи, «Старые клячи» фильмым хэт зэадэзэпхъум я ролхэр зыгъэзэщIар Мэжидрэ Лиерэщ. Иужьрей илъэсхэм Лие и адэр нэф хъуауэ псэуащ. И анэ Юлие жьэн уз пкърытти, и щхьэгъусэри ицIэлат. Ахэр хьэлъэ щыхъум, Лие цIыкIу Сталиным письмо хуитхауэ щытащ, къыдэIэпыкъуну елъэIуу. Зыхуэгъэзам тхыгъэр Iэрыхьар фIэщщIыгъуейщ, ауэ хущхъуэ гъуэтыгъуейхэр къратат.
  • ГъущI цIуугъэнэхэмрэ дыщэмрэ ехьэлIауэ Москва дэт институтым 1956 гъэм Лие щIэтIысхьэри, зы илъэсрэ ныкъуэкIэ щеджащ. ИтIанэ Луначарский А. В. и цIэр зезыхьэ ГИТИС-р къиухащ (1962 гъэм). 1961 гъэм щыщIэдзауэ Москва ТЮЗ-м щылэжьащ. «Современник» театрым 1977 гъэм щегъэжьауэ щыIащ. И япэ лэжьыгъэ нэхъ ин дыдэхэм щыщщ Виктюк Роман игъэувауэ щыта «Квартира Коломбины» спектаклыр. Режиссёрым Лие къритат зэуэ роль нэхъыщхьиплI.
  • Сценэм АхъуэджакIуэм щигъэзэщIащ роль зэхуэмыдэ Iэджэ. И зэфIэкI псор утыку кърихьэн мурадкIэ, ар 1990 гъэхэм икухэм уней театрым кIуащ. Колядэ Николай и пьесэм къытращIыкIа «Персидская сирень» спектаклым (режиссёрыр Мильграм Борисщ) ехъулIэныгъэшхуэ иIауэ щытащ. Театрым щыщылэжьа илъэсхэм абы сценэм «къыщипсэуащ» образ зэмылIэужьыгъуэ куэд. Апхуэдэщ, псалъэм папщIэ, Драгунский Виктор и «Денисинские рассказы», Думбадзе Николай и «Я, бабушка, Илико и Илларион», Михалков Сергей и «Дорогой мальчик», Рощин Михаил и «Эшелон» пьесэхэм къытращIыкIахэр, нэгъуэщIхэри.
  • «Селестина» спектаклым 2012 гъэм щыджэгуу, Лие джалэри и Iэр икъутауэ, и дзажэри чауэ щытащ. Абы къыхэкIыу «Современник» театрым ар зыхэт спектакль псори гъэлъэгъуэныр зэпигъэуауэ, гастролхэри къигъэувыIауэ зэрыщытар. Ар щIыжытIэр Лие нэгъуэщIкIэ зэрыпхузэмыхъуэкIырщ.
  • 1973 гъэм щыщIэдзауэ кином хэтщ АхъуэджакIуэ Лие. Ар япэ зыхэта «Ищу человека» фильмым Варнэ, Локарнэ къалэхэм щекIуэкIа дунейпсо кинофестивалхэм саугъэтхэр къыщыхуагъэфэщащ. Абы къыкIэлъыкIуащ «Ирония судьбы, или С лёгким паром!» (Таня и ролыр), «Москва слезам не верит» (Ольгэ Павловнэ), «Гараж» (Малаевэ), «Сукины дети» (Нанайцевэ), «Странное Рождество» (Люся), нэгъуэщI Iэджи. ЖыпIэнурамэ, АхъуэджакIуэм и лэжьыгъэр зэи зэпыуакъым, 1981 гъэм ар фильми 6-м хэтащ,1983, 1984, 1986 гъэхэм псоми лэжьыгъэ щырыщ щиIащ, 2007 гъэм — 5! Иужьрей ролыр абы «Кроткая» фильмым щигъэзэщIащ 2017 гъэм.
  • И роль нэхъыфIхэм ящыщщ «Двадцать дней без войны» фильмым щигъэзэщIа роль цIыкIур. ЦIыхубэм фIыуэ актрисэр щилъэгъуар, ар гукъинэж щыщыхъуар Рязанов Эльдар и фильмхэм щыджэгуа иужьщ. 1991 гъэм «Советский экран» журналым иригъэкIуэкIа IэIэтым ипкъ иткIэ, АхъуэджакIуэр илъэсым и актрисэу къалъытат.
  • Лие хуэжыджэрщ жылагъуэ лэжьыгъэм, «Современник» театрым и труппэм хэтщ, зыми емыщхь и джэгукIэ гъэщIэгъуэнымкIэ цIыхухэм я гукъыдэжыр къиIэту.
  • Зэман зэхуэмыдэхэм ар я щхьэгъусэу щытащ Театр ЦIыкIум и актер Носик Валерий, сурэтыщI Кочейшвили Борис, 2001 гъэм Москва щыпсэу сурэттех Персиянинов Владимир дэкIуащ. Лие и илъэс 80-р, сыт щыгъуи хуэдэу, щэху цIыкIуу, и щхьэгъусэм щIыгъуу я дачэм щигъэлъэпIащ.
  • ИСТЭПАН Залинэ.