ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ

АДЫГЭ ПСАЛЪЭ

Лъэпкъ  макъамэхэм  я  хъумакIуэ

2018-07-10

  • СурэтыщI гъуазджэхэмкIэ музейм, Ткаченкэ Андрей и цIэр зезыхьэм, утыку къыщрахьащ ГъуазджэхэмкIэ Кавказ Ищхъэрэ къэрал институтым цIыхубэ макъамэ IэмэпсымэхэмкIэ и кафедрэм и доцент, пшынауэ цIэрыIуэ Лыджыдэ Алий и Iэдакъэ къыщIэкIа «Адыгская народная инструментальная музыка» тхылъым и япэ Iыхьэр. Нотэхэр щызэхуэхьэса лэжьыгъэр бзищкIэ — адыгэбзэкIэ, урысыбзэкIэ, инджылызыбзэкIэ — дунейм къытехьащ.

  • Пшыхьыр езыгъэкIуэкIа ЗэшэкIуий Оксанэ къыхигъэщащ Лыджыдэ Алий республикэм и мызакъуэу, нэгъуэщI щIыналъэхэми зэрыщыцIэрыIуэр, егъэджэныгъэ Iуэхум къыдэкIуэу, щэнхабзэ проектхэми жыджэру зэрыхэтыр, урысейпсо, дунейпсо зэпеуэхэм я лауреат зэрыхъуар, Урысейм и къалэ куэдым ехъулIэныгъэхэр иIэу концертхэр зэрыщитар. Лыджыдэм Осетие Ищхъэрэ — Алание республикэм и джаз оркестрым щIыгъуу ит концертхэми яфIэфIу цIыху куэд йоплъ. Зэхыхьэм утыку къыщрахьа тхылъым и пэ Лыджыдэм и Iэдакъэ къыщIэкIащ «Играйте, танцуйте» альбомыр. ЦIыхубэм фIыуэ ялъагъу пшынауэм роль нэхъыщхьэр щигъэзэщIащ адыгэ узэщIакIуэ Къудащ Елбэздыкъуэ теухуа фильмым.
  • Адыгэ макъамэ Iэмэпсымэхэм теухуа къэхутэныгъэ лэжьыгъэхэр щIэныгъэлI куэдым ирагъэкIуэкIащ. Ди республикэми, нэгъуэщI щIыпIэхэми щыпсэу, гъуазджэм, щэнхабзэм, щIэныгъэм, тхыдэм я лэжьакIуэхэми гъэщIэгъуэн ящыхъуащ Лыджыдэм и Iэдакъэ къыщIэкIа «Адыгская народная инструментальная музыка» тхылъыр. Абы пшынауэм лэжьыгъэ 15 хигъэхьащ.
  • Зэхыхьэм хэтащ икIи къыщыпсэлъащ лэжьыгъэм рецензэ хуэзытха, КъБР-м щэнхабзэмкIэ, щIэныгъэмкIэ щIыхь зиIэ и лэжьакIуэ, искусствоведенэм и доктор Ащхъуэт Беслъэн, УФ-м гъуазджэхэмкIэ щIыхь зиIэ и лэжьакIуэ, композитор, усакIуэ ХьэIупэ ДжэбрэIил, тхылъыр зыгъэдэха, КъБР-м и цIыхубэ сурэтыщI Бгъэжьнокъуэ Заурбэч, КъБР-м щэнхабзэмкIэ щIыхь зиIэ и лэжьакIуэ, дунейпсо зэ-пеуэхэм я лауреат, Кавказ Ищхъэрэм ГъуазджэхэмкIэ и къэрал институтым и профессор Шэрыб Валерэ сымэ.
  • Къэпсэлъахэм зи IэщIагъэр фIыуэ зылъагъу, гу къабзэрэ псэ хьэлэлкIэ абы пэрыт Лыджыдэм и лэжьыгъэм и пщIэр къалъытащ икIи къыхагъэщащ гъуазджэмрэ щэнхабзэмрэ я лэжьакIуэхэм, сабий музыкэ школхэм я еджакIуэхэм, студентхэм ар зэрахуэщхьэпэнур, къызэрыгуэкI цIыхухэм я дежкIи абы мыхьэнэ зэриIэр.
  • Пшыхь гуапэм зыкърезыгъэхьэлIахэм Лыджыдэ Алий лъэпкъ макъамэхэмрэ къафэжьхэмрэ яхуеуащ.
  •  
  • ТЕКIУЖЬ Заретэ.101