Нартсанэ зэIузэпэщ ящI
2018-04-12
- Къэбэрдей тIуащIэкIэ зэджэу щыта щIыпIэм хиубыдэ Кисловодск (Нартсанэ) европей къалэ-курортхэм я зэгухьэныгъэм хагъэхьэну мурад щыIэщ. А Iуэхур зэрыкIуатэм и нэIэ тетщ УФ-м ФедерацэмкIэ и Советым и УнафэщI Матвиенкэ Валентинэ. Иджыблагъэ ар аргуэру мы къалэм щыIащ, Курорт паркым, Нартсанэ галереем, нэгъуэщI щIыпIэхэми щекIуэкI лэжьыгъэм зыщигъэгъуэзащ.
-
Кисловодск къалэм и зы теплъэ .
-
Лермонтовым и фэеплъ.
-
Курорт паркым и зыплъыхьыпIэ.
- — Илъэситху блэкIам Кисловодск хэпщIыкIыу зихъуэжащ, гъуэгухэр, унэ IуплъапIэхэр, уэрамхэр нэхъыфI, нэхъ дахэ хъуащ, скверхэм я бжыгъэм къыхэхъуащ, — жиIащ Матвиенкэ. — Нэхъыщхьэращи, цIыхухэм фIыуэ ялъагъу я къалэр. Ахэращ ГуэлыщIэм пэгъунэгъуу илъэс куэд лъандэрэ кIэрыхубжьэрыхухэр зэрызэтракIутэм и хъыбар къызэзыгъэщIар. Ар къэбгъэхъу мыхъунщ, сыту жыпIэмэ Кавказ Минеральнэ Псыхэр щIыналъэм щыIэ псыр зыкIи нэхъ пудкъым щIыдагъэм нэхърэ. Аращ минеральнэ псыхэм дахуэсакъын щIыхуейр.
- Матвиенкэ зэрыжиIамкIэ, ГуэлыщIэ щIыпIэр ягъэкъэбзэжыныр экологие шынагъуэншагъэм теухуауэ зэфIахыну лэжьыгъэм щыщу ягъэбелджылащ, икIи мы гъэм къриубыдэу щIы гектари 4-р ягъэсэжу абдеж жыгрэ удзрэ щыхасэжын хуейщ.
- Унафэ икIэщIыпIэкIэ тращIыхьыну къапэщылъщ «Россия» кинотеатрым. Ар илъэс 20 лъандэрэ цIыху зыщIэмыхьэж, мащIэ-мащIэурэ хэкIуэдэж унэщ, абы щыгъуэми Кисловодск къалэ администрацэм къыпэщыту, къалэкум ит уэрамым фэ къытримыгъауэу.
- Матвиенкэ мыарэзыми, жиIащ мыпхуэдэ IуэхущIапIэм зыгуэрым и мылъку къыхебгъэлъхьэну зэры-мытыншыр къызэрыгурыIуэр (фейдэ щIэх къызэримытыжынум къыхэкIыу), ауэ икIэщIыпIэкIэ зы унафэм хуэкIуэн зэрыхуейр.
- ИлъэситI хъуащ Матвиенкэ Кисловодск къакIуэурэ Iуэхур зытетым зыщигъэгъуазэу, лэжьыгъэ къапэщылъхэр яубзыхуу къызэрекIуэкIрэ. Абы и фIыгъэщ Колоннадэм пэгъунэгъуу щыта сату щIапIэхэр ягъэIэпхъуэу а уэрамыр къабзэ, хуит зэрыхъужар, Курорт бульваркIэ зэджэр удз гъэгъахэмкIэ зэрагъэщIэрэщIар, Каскад дэкIуеипIэ зэхэкъутар къыпхуэмыцIыхужыну зыхуей зэрыхуагъэзар.
- Нартсанэ къызэрыщIэрэщIэжынум шэч хэлъкъым, ар къэрал Iуэху щыхъуакIэ. Къалэ-курорту зрагъэужьыну зыхуагугъа Налшыки «и насып къикIыну» дыхуэхъуэпсэнырщ зэкIэ къытхуэнэр.