ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ

АДЫГЭ ПСАЛЪЭ

АдрыщI ныджэм дэту зыкъэзылъытэжым Iэр хуэсшия къудейуэ аращ, мыдрыщI къызэпрысшыну

2018-03-31

  •  Къармэ Iэсият и тхылъыщIэм теухуауэ
  •  УщыIэщ — Ужейкъым — Зыпшыхьыжакъым хьэлыгъуанэу! Уэ усакIуэшхуэу укъэслъытауэ, лъэтеувэ пхузощI-ри, пхуэзгъэфэща лъагапIэм лъэ быдэкIэ щыув, щыгъагъэ, дыщэплъ-дыщэхуу зэрылъэлъ усыгъэ къэгъэщI.
  •  
  • КЪАРМЭ Iэсият умыцIыхуххэуи, и усэхэм уеджэну «хэтIысхьи», нэгъэсауэ зэрыадыгэр, бзэм зэрыхуэшэрыуэр занщIэу хьэкъ пщохъу. И псэр здынэсам уэри узэрыхуишэфыр гъэщIэгъуэныщэщ. Унэсмэ, и усэ Iуфэм деж усакIуэм и гъусэу ущотIысэхри, гупсэхуу зыбогъэпсэху. И IэдакъэщIэкIхэм гъуазэ хуэхъуа гупсысэхэмкIэ дэнэ нэс уимышами, си Iуэхущ хэбгъуатэмэ зы псалъэ бгъунлъа. Хъарзынэкъэ-тIэ пшэщIа уи гупсысэр уи бзэм и къупхъэм ибгъэзагъэу, ар зыхуэптха уи лъэпкъэгъухэми гузэгъэгъуэ ептыну!
  • Зызумысыжынщи, тхылъым уеджэху куэдрэ къыпхуохуэ, псым тес къазым хуэдэу, усэм «ущыдесых», умыщIэххэу мывэшхуэми ущыжьэхихьэ. УблэсыкIын хьисэпкIэ дэбдзыхрэ — усэм и купщIэм утрихауэ бжы! АрщхьэкIэ а мывэу къыпщыхъуа псалъэ мыцIыхум и мыхьэнэр тхылъым и кIэм къыщыбогъуэтыж. УкъэувыIэу ар зыгурумыгъаIуэмэ, усакIуэм къыбжиIэну зыхуейм ублихагъэххэщ, дыщэ кIанэ цIыкIу и уасэ усэм кIэрыхуащи, ар псэншэ къыпщыхъуми, зи ягъэжыр уэращ.
  • Зи усэр адыгэбзэ хэплъыхьакIэ къуа Iэсият а бзэр и сабиигъуэм къыздрихауэ хэлъщ и лъым, и акъылуи ирогупсысэ, и гупсысэр ирегъэщIэращIэ. АбыкIэ и лэжьыгъэхэм ящетIэгъэф адыгэ фащэ, игу хуэмызагъэмэ гухьэр дахэкIэ егъэщIэрэщIэж, арэзы зытехъуар дыщэ уагъэ пщэхъукIэ уи пащхьэ кърешэф.
  • ЯгъэIу языныкъуэ еджагъэжьхэм хъурылъхухэм я къэухьым бзылъхугъэм ейр мащIэу къыкIэрыхуу. Пэжи-пцIыи?! УсакIуэхэм къахуех уэгьийр сщIэркъым пшэкIухьым щIезгъэщхьыр. А къэхъугъэр дахэми, пIалъэкIэщ щыплъагъур. АтIэ, Iэсият а уэгьийм гупсысэ мышкIуру къыхуихьу хъуар ебз, еIулIэ, едыжри, зы бзыхьэхуи къыдэмыхуэу усэ Iэрамэу егъэтIылъыж. Мы цIыхубзыр хуейкъым гъуэгуи гъуси (усакIуэхэм я щIасэщ я закъуэну!). Апхуэдэу щытми, закъуэныгъэр щIагъуэ?!
  • СыкъэфщIмэ хуит, сыхуейт Къармэхэ я пхъур езгъэпщэну и усэ-гупсысэкIэ нэщIысахэмкIэ усакIуэшхуэу слъытэ, адэжь щIыналъэм зи псэр хэлъ Бещтокъуэ Хьэбас. А зэзгъэщхьитIым хъэтI зырыз яIэжми, лъэпкъым я гум хуилъым и инагъымрэ ар къызэраIуэтэф я бзэм и шэрыуагъымрэ папщIэ зэбгъурыбгъэувэну къалэжьу къызолъытэ. Си гугъэщ бахъсэныпс зэфар зэнзэныпсу зи хьэлэл Хьэбас балъкъыпс ефа Iэсият зытримыгъэгусэну, езы Къармэм хуэзгъэфэща увыпIэр тIэкIу езгъэлеиIуауэ къыщыхъуу зыкъысхуримытIэну.
  • Сэри усакIуэу сабж, сатыр зызогъэкIуфри. Сыт си усакIуэ сэ, Iэсият елъытауэ, и Iэпэр субыду утыку исшэну сыхуит къысщыхъужыну?! Ауэ сэ ар пщэрылъ къысхуэзыщIа тхьэмадэм и псалъэкIэ адрыщI ныджэм дэту зыкъэзылъытэжым Iэр хуэсшия къудейуэ аращ, мыдрыщI къызэпрысшыну. Си щтаучымкIэ Къармэ Iэсият и вагъуэр пызгъэнэну дзыхь къысхуищIами, ХьэфIыцIэ Мухьэмэд ар къыIэщIэсхыфынкъым. Бжы, Iэсият, щтаучыр тхьэмадэм IэщIэслъхьэжауи, нурыбэ ухъу абы пхупигъэна уи вагъуэр!
  • Си гуапэщ, Iэсият, адыгэ лъэпкъ усыгъэм и псынащхьэр куэдрэ зыхъумэну уи усэхэр вагъуэбэ зэрыбыну къытхуэблэну!
  •  
  • ПХЫТIЫКI Юрэ.