ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ

АДЫГЭ ПСАЛЪЭ

Егъэджэныгъэ IэнатIэм зрагъэужь

2017-11-22

  • КъБР-м ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ и министерствэм щэкIуэгъуэм и 14-м къыщызэIуахащ «Шэджэм щIыналъэм егъэджэныгъэ IэнатIэр зэрыщыгъэувамрэ абы зыщегъэужьынымкIэ щыIэ Iэмалхэмрэ» выставкэр.
  •  
  • Абы кърихьэлIащ КъБР-м и Правительствэм и УнафэщIым и къуэдзэ, ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ и министр Емуз Нинэ, КъБР-м щэнхабзэмкIэ и министр Къумахуэ Мухьэдин, Дунейпсо Адыгэ Хасэм и тхьэмадэ Сэхъурокъуэ Хьэутий, нэгъуэщIхэри.
  • — Сэ фIыщIэ яхуэсщIыну сыхуейщ нобэрей ди зэIущIэм кърихьэлIа псоми. Мыпхуэдэ зэхьэзэхуэхэр нэхъыбэрэ егъэкIуэкIыпхъэщ, ди щIэблэм заужьын, ефIэкIуэн папщIэ, — жиIащ Емуз Нинэ, япэ псалъэр щыхуагъэфащэм.
  • Щыгъуазэ фыхуэтщIынщи, 2018 гъэр иухыху министерствэм апхуэдэ Iуэхухэр щригъэкIуэкIынущ республикэм и муниципалитет псоми. Абыхэм кърикIуахэр щызэхалъхьэжынущ 2018 гъэм и кIэухым траухуа республикэпсо выставкэм. Шэджэм районым выстэвкэм щегъэлъагъуэ зи школ кIуэгъуэ мыхъуа сабийхэр щаIыгъ IуэхущIапIэу 6-м, апхуэдэ зы уней IуэхущIапIэм, курыт щIэныгъэ щрагъэгъуэт школ 18-м, я лIыкIуэхэм я лэжьыгъэр. Ар лIэужьыгъуэ куэду зэхэтщ.
  • «Цыхэр дахэу зэIущэн», «Iэзагъэшхуэ къэгъэлъэгъуэн», «Адыгэ дамыгъэ» унэтIыныгъэхэмкIэ щагъэлъагъуэ хьэпшып гъэщIэрэщIахэр хуэгъэзащ ныбжьыщIэхэм я художественно-эстетикэ зэхэщIыкIым зегъэужьыным.
  • Выставкэм щагъэлъагъуэ Щхьэлыкъуэ къуажэм (Шэджэм щIына-лъэ) и курыт школ №2-м и музейм и проектыр. КъБР-м и цIыхубэ усакIуэ КIыщокъуэ Алим къызэралъхурэ илъэси 100 щрикъум ирихьэлIэу 2014 гъэм школым къыщызэIуахауэ щытащ а цIыху цIэрыIуэм и музей. 2016 гъэм ягъэзащIэу хуежьащ «КIыщокъуэ Алим и школ музей» проектыр. Иджы абы щыщ хьэпшыпхэр выставкэм къашащ.
  • ГъэщIэгъуэнщ Шэджэм ЕтIуанэ къуажэм и школ №2-мрэ №3-мрэ я еджакIуэхэм я лэжьыгъэхэр. Ап-хуэ-дэу выставкэм еплъхэр да-      хьэхынущ Нартан къуажэм, Шэджэм къалэм щыщ ныбжьыщIэ-  хэм выставкэм хуагъэхьэзырахэм.
  • А махуэм ягъэлъэпIащ «ЕгъэджакIуэ нэхъыфI — 2017» зэхьэзэхуэм къыщыхэжаныкIахэри. Апхуэдэ зэпеуэхэр къызэгъэпэщынымкIэ, къызыхуэтыншэу егъэкIуэкIынымкIэ зи къарум емыблэжу а Iуэхум хэлэжьыхь, Къэбэрдей-Балъкъэрым и Парламентым ЕгъэджэныгъэмкIэ, щIэныгъэмрэ щIалэгъуалэ политикэмкIэ и комитетым и унафэщI Азычэ Светланэ фIыщIэ тхылъ иратащ.
  • «ЕгъэджакIуэ нэхъыфI — 2017» зэпеуэм щытекIуащ: Нарткъалэ дэт школ №6-м математикэмкIэ щезыгъаджэ Бахъуэ Анфусэ; Налшык дэт школ №9-м тхыдэмкIэ и егъэджакIуэ ТекIуий Алисэ; Май къалэм щыIэ, курыт щIэныгъэ щрагъэгъуэт школ №2-м инджылызыбзэр щезыгъэдж Кабичук Татьянэ; Тэрч къалэм дэт школ №3-м и пэщIэдзэ классхэм  я егъэджакIуэ Емкъуж Залинэ; Шэджэм ЕтIуанэ къуажэм щыIэ школ №2-м математикэмкIэ и егъэджа- кIуэ Къалэ Джульеттэ; Урыху дэт школ №2-м урысыбзэмрэ литературэмкIэ и егъэджакIуэ ХьэцIыкIу Рае; Балъкъэр Ипщэ къуажэм дэт школ №2-м балъкъэрыбзэмрэ литературэмкIэ и егъэджакIуэ Текуевэ  Мадинэ сымэ.
  • ЖЫЛОКЪУЭ  Лусаннэ.