ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ

АДЫГЭ ПСАЛЪЭ

Гъуазджэм и щэхухэм дихьэх ныбжьыщIэхэр

2017-10-24

  • СурэтыщI гъуазджэхэмкIэ музейм къыщызэIуахащ «Радуга палитры» выставкэр. Абы щагъэлъагъуэ Налшык къалэм и Сабий художественнэ школым и гъэсэнхэм я лэжьыгъэ купщIафIэхэр. Зэхыхьэр иригъэкIуэкIащ музейм и унафэщI Ремхен Еленэ.
  •  
  • Токъуий Мадинэ цIыкIухэр егъэлъапIэ.

  • — Выставкэм зи сурэтхэр утыку къыщрахьа ныбжьыщIэхэми абы кърихьэлIа псоми си гуапэу сынывохъуэхъу. Сабий художественнэ школым и унафэщI Зэхъуэхъу Валерэ, егъэджакIуэхэм фIыщIэ    ин яхуэфащэщ щIэблэр сурэтыщI гъуазджэм зэрыдрагъэхьэхым, абы и щэхухэм зэрыщагъэгъуазэм, я гъэсэнхэм я лэжьыгъэ щхьэпэхэр хэIущIыIу зэращIым папщIэ. ЦIыкIухэм я Iэдакъэ къыщIэкIа, сабиипсэ хуабагърэ гу къабзагъэкIэ гъэнщIа сурэтхэр телъыджэщ икIи а лэжьыгъэхэм ущеплъкIэ я зэфIэкIым уегъэгуфIэ икIи уегъэгушхуэ. НыбжьыщIэхэм сынывохъуэхъу гукъыдэжрэ дэрэжэгъуэрэ фыщымыщIэу лъагапIэщIэ-хэм фыхуэкIуэну, — жиIащ КъБР-м ЩэнхабзэмкIэ и министерствэм профессиональнэ гъуазджэмрэ художественнэ егъэджэныгъэмкIэ и къудамэм и унафэщI ПащIэ Рамед икIи я министерствэм къыбгъэдэкI щIыхь тхылъыр зыхуагъэфэща егъэджакIуэ пажэхэм ар яритыжащ.
  • Налшык къалэ администрацэм ЩэнхабзэмкIэ и управленэм и унафэщI Токъуий Мадинэ къыхигъэщащ сурэтыщI ныбжьыщIэхэм зэрызаужьымрэ я ехъулIэныгъэхэм кIуэ пэтми зэрыхагъахъуэмрэ гуапэ зэрыщыхъур. Зи лIыкIуэ IуэхущIапIэм къыбгъэдэкIыу хуагъэфэща фIыщIэ тхылъыр абы Зэхъуэхъу     Валерэ иритыжащ, щIэблэм я эстетикэ гъэсэныгъэм хэлъхьэныгъэфI зэрыхуищIымрэ республикэм и щэнхабзэ гъащIэм жыджэру зэрыхэтымрэ папщIэ. Апхуэдэу гъэлъэгъуэныгъэм къыхэжаныкIа ныбжьыщIэхэм абы щIыхь тхылъхэр яритащ икIи абыхэм ехъуэхъуащ сурэтыщI цIэрыIуэ къищIыкIыну, я унафэщIым и лъагъуэм ирикIуэну. ЗэрыжаIэщи, зэчий зыбгъэдэлъым лъэныкъуэ куэдым ехъулIэныгъэ-
  • хэр щиIэщ. Абы и щыхьэтщ зэхыхьэм щагъэлъэпIа, сурэт щIынми уэрэд жыIэнми хуэIэзэ Жьакуэ Асте-мыр.
  • КъБР-м и СурэтыщIхэм я зэгухьэныгъэм и унафэщI Темыркъан Геннадий игу къигъэкIыжащ Налшык къалэм и Сабий художественнэ школым зэрыщеджар, абы и егъэджакIуэхэр я лэжьыгъэм зэрыхуэIэижьыр. Темыркъаным жиIащ IуэхущIапIэм и гъэсэнхэм я лэжьыгъэхэр сыт щыгъуи псоми гъэщIэгъуэн зэращыхъур зэфIэкI ин зэраIэм щыхьэт зэрытехъуэр, еджапIэм екIуалIэ щIэблэм псэгъэгуфIэ-дахагъэ яхэлъу, хэкупсэу къызэрыхъур я егъэджакIуэхэм зэрафIыщIэр. Абы зэхыхьэм щигъэпэжащ сурэт щIынымкIэ Минск, Саратов, Къэзан къалэхэм щекIуэкIа урысейпсо зэпеуэхэм мы гъэм пашэ щыхъуа ныбжьыщIэхэр.
  • Выставкэм хагъэхьащ ныбжьыщIэхэм иужьрей илъэсхэм я Iэдакъэ къыщIэкIа лэжьыгъэ гъэщIэгъуэнхэр. Гъэлъэгъуэныгъэм хагъэхьа сурэтхэм, декоративно-прикладной гъуазджэм и хьэпшыпхэм ущеплъкIэ умыгъэщIэгъуэн плъэкIыртэкъым, зэрыт ныбжьми емылъытауэ, сабийхэм гъуазджэм и унэтIыныгъэ зэмылIэужьыгъуэхэм — живописым, графикэм, скульптурэм, декоративно-прикладной гъуазджэм — зэрыхуэIэижьыр. Лэжьыгъэхэм щынэрылъагъут гъуазджэр зи псэм хэпщIа цIыкIухэм щалъхуа щIыналъэр, абы и щIыуэпсыр зыпащI зэрыщымыIэр, IуэрыIуатэм хэт лIыхъужьхэм я шыфэлIыфэхэм фIыуэ зэрыщыгъуазэр. Выставкэм къызэщI-
  • рагъэубыда лэжьыгъэхэр щыхьэт зэрытехъуэщи, ныбжьыщIэхэм я дунейр таурыхъ пэлъытэу щхъуэкIэплъыкIэу, плъыфэбэу, щIэщыгъуэу зэхэлъщ. Аращ а сурэтхэм сабийхэм я нэкIэ дунейм ущIрагъэплъыр, ахэр телъыджэ щIыпщыхъур. Дэтхэнэ зы сурэтри дахагъэм и гъуджэ пэлъытэщ, гупсысэ гуэрхэр псэм къыщызыгъэушщ.
  • Зэхъуэхъу Валерэ фIыщIэ хуищIащ гъэлъэгъуэныгъэр къызэзыгъэпэщахэмрэ абы кърихьэлIахэмрэ.
  •  
  • ТЕКIУЖЬ  Заретэ.
  • Сурэтхэр Къарей Элинэ трихащ.